സ്വാതന്ത്രദിനത്തിലെ ജനംടിവിയുടെ വിവാദ പോസ്റ്റർ: ജനം ടിവിക്കെതിരെ പരാതി നൽകി കെഎസ് യു
തിരുവനന്തപുരം: സ്വാതന്ത്രദിനത്തില് ആശംസകള് അറിയിച്ചുകൊണ്ട് ജനം ടിവി പങ്കുവെച്ച പോസ്റ്റർ വലിയ വിവാദങ്ങള്ക്കാണ് ഇടംനല്കിയിരിക്കുന്നത്. ഗാന്ധി ചിത്രത്തിന് നേരെ തോക്ക് ചൂണ്ടുന്ന തരത്തിലുള്ള പോസ്റ്ററായിരുന്നു ജനം ടിവി ആദ്യം തങ്ങളുടെ സോഷ്യല് മീഡിയ പ്ലാറ്റ് ഫോമുകളില് പങ്കുവെച്ചത്. വലിയ രീതിയില് വിമർശനം ഉയർന്നതോടെ ഇത് പിന്നീട് എഡിറ്റ് ചെയ്യുകയും ചെയ്തു. പോസ്റ്ററില് ഗാന്ധിയുടെ ചിത്രം ഏറ്റവും ചെറുതാക്കി നല്കി, നെഹ്റുവിന് സ്ഥാനമില്ല എന്ന് തുടങ്ങിയ അരോപണങ്ങളും ശക്തമാണ്.
പോസ്റ്റർ സംബന്ധിച്ച ചർച്ചകള് സോഷ്യല് മീഡിയില് സജീവമായ തുടരുന്നതിനിടയിലാണ് ജനം ടിവിക്കെതിരെ കെ എസ് യു പൊലീസില് പരാതി നല്കിയിരിക്കുന്നത്. സ്വാതന്ത്ര്യസമരസേനാനികളെയും രാഷ്ട്രപിതാവിനെയും അപമാനിക്കുന്ന തരത്തിൽ പ്രചരണം നടത്തുകയും, ഗാന്ധി ചിത്രത്തിന് നേരെ തോക്ക് ചൂണ്ടുന്ന തരത്തിലെ ചിത്രങ്ങൾ ഉപയോഗിച്ച് സമൂഹത്തിൽ സ്പർദ വളർത്താനും ശ്രമം നടത്തിയെന്ന് കാണിച്ചാണ് പരാത.
കെ എസ് യു സംസ്ഥാന ജനറൽ സെക്രട്ടറി ആദേഷ് സുധർമ്മനാണ് ഇത് സംബന്ധിച്ച് സംസ്ഥാന പൊലീസ് മേധാവിക്ക് പരാതി നല്കിയിരിക്കുന്നത്. ചാനലിന്റെ ഇത്തരം ശ്രമങ്ങള്ക്കെതിരെ അടിയന്തരമായി കലാപാഹ്വാന കുറ്റം ഉള്പ്പെടെ ചുമത്തി നടപടികൾ സ്വീകരിക്കണമെന്നും കെ എസ് യു നല്കിയ പരാതിയില് ആവശ്യപ്പെടുന്നു.
ഡി ജി പിക്ക് നല്കിയ പരാതിയുടെ പൂർണ്ണ രൂപം
ബഹുമാനപ്പെട്ട സാർ,
നമ്മുടെ രാജ്യം 78 മത് സ്വാതന്ത്ര്യ ദിനം ആഘോഷിക്കുന്ന ഈ വേളയിൽ രാജ്യത്തിന്റെ സ്വാതന്ത്ര്യ സമര പോരാട്ടങ്ങളെ ധീരതയോടെ നയിച്ചിരുന്ന സ്വതന്ത്ര സമര സേനാനികളെ അപമാനിക്കുന്ന തരത്തിൽ ഫേസ്ബുക്ക് പോസ്റ്റിലൂടെ സന്ദേശം പ്രചരിപ്പിക്കുകയാണ് ജനം ടിവി എന്ന ചാനൽ.
ജനം ടിവി ചാനലിന്റെ ഔദ്യോഗിക ഫേസ്ബുക്ക് പേജിലൂടെ ആദ്യം പങ്കുവെച്ച സ്വാതന്ത്ര്യ സമര സേനാനികളുടെ ചിത്രത്തിൽ നമ്മുടെ രാഷ്ട്രപിതാവിനെ അപമാനിക്കുന്ന തരത്തിൽ, അദ്ദേഹത്തിന് നേർക്ക് തോക്ക് ചൂണ്ടുന്ന ചിത്രമാണ് പങ്കുവെച്ചിരുന്നത്. മഹാത്മാഗാന്ധിജിക്കെതിരായി വെടിയുതിർക്കുന്ന തരത്തിലുള്ള ചിത്രം പങ്കുവെച്ചത് വിവാദമായതോടെ ആ പോസ്റ്റ് പിൻവലിക്കുകയും മറ്റൊരു പോസ്റ്റ് ഫേസ്ബുക്കിൽ പ്രചരിപ്പിക്കുകയും ചെയ്തു.
രാജ്യത്തിന്റെ രാഷ്ട്രപിതാവിനെ അടക്കം അപമാനിച്ച, മുഴുവൻ സ്വാതന്ത്ര്യസമര സേനാനികളുടെയും ധീരസ്മരണകളെ അപമാനിച്ച, പൊതു സമൂഹത്തിനുള്ളിൽ സ്പർദ്ദയുണ്ടാക്കി കലാപം സൃഷ്ടിക്കാൻ ശ്രമിക്കുന്ന ഈ ജനം ടിവി ചാനലിന്റെ ശ്രമങ്ങൾക്കെതിരായി അടിയന്തര നടപടി കൈക്കൊള്ളണമെന്നും, രാജ്യത്തെയും രാജ്യത്തിന്റെ സ്വാതന്ത്ര്യസമരസേനാനികളെയും രാഷ്ട്രപിതാവിനെയും അപമാനിച്ചവർക്കെതിരെ കലാപ ആഹ്വാന കുറ്റം അടക്കം ചുമത്തി കേസ് നടപടികൾ സ്വീകരിക്കണമെന്നും അഭ്യർത്ഥിക്കുന്നു.
Click it and Unblock the Notifications
Sign in with Google