'വല്ലവരും ഇനിയും ഉണ്ടെങ്കിൽ അവരും കുടുങ്ങട്ടെ, അയ്യപ്പന്‍ വെറുതേ വിടുമോ'? ശബരിമലക്കേസിൽ ഇഡിക്ക് മുന്നിൽ ജയറാം

കൊച്ചി: ശബരിമല സ്വർണക്കൊള്ളക്കേസിൽ ചോദ്യം ചെയ്യലിന് വേണ്ടി എൻഫോഴ്സ്മെൻഡ് ഡയറക്ടറേറ്റിന് മുന്നിൽ ഹാജരായി നടൻ ജയറാം. ശബരിമല കേസുമായി ബന്ധപ്പെട്ട സാമ്പത്തിക ഇടപാടുകളാണ് ഇഡി അന്വേഷിക്കുന്നത്. നോട്ടീസ് നൽകി വിളിപ്പിച്ചതിനെ തുടർന്നാണ് ഇഡിയുടെ കൊച്ചി ഓഫീസിൽ മൊഴി നൽകാൻ നടൻ എത്തിയത്.

ശബരിമല സ്വർണക്കൊള്ളക്കേസിൽ എസ്ഐടി നേരത്തെ ജയറാമിനെ ചോദ്യം ചെയ്തിരുന്നു. കേസിലെ ഒന്നാം പ്രതിയായ ഉണ്ണിക്കൃഷ്ണൻ പോറ്റിയുമായി ജയറാമിന് അടുത്ത ബന്ധമുളളതായി കണ്ടെത്തിയിരുന്നു. ശബരിമലയിലെ ദ്വാരപാലക പാളികൾ ജയറാമിന്റെ വീട്ടിൽ കൊണ്ട് പോയി പൂജിച്ചത് അടക്കമുളള വിവരങ്ങൾ പുറത്ത് വന്നിരുന്നു. പോറ്റിയുമായി സുഹൃത്ത്ബന്ധം മാത്രമാണ് ഉളളതെന്നാണ് ജയറാം പറയുന്നത്.

ഏതെങ്കിലും തരത്തിലും സാമ്പത്തിക ഇടപാടുകൾ ഇവർ തമ്മിലുണ്ടോ എന്ന് അറിയുന്നതിന് വേണ്ടിയാണ് ജയറാമിനെ ഇഡി വിളിപ്പിച്ചിരിക്കുന്നത് എന്നാണ് വിവരം. അതേസമയം ശബരിമലയിൽ തട്ടിപ്പ് നടന്നിട്ടുണ്ടെങ്കിൽ അതിന് പിന്നിലുളളവരെ വെളിച്ചത്ത് കൊണ്ട് വരണമെന്നും അയ്യപ്പൻ അവരെ വെറുതെ വിടില്ലെന്നുമാണ് ഇഡിക്ക് മുന്നിൽ ഹാജരാകാൻ എത്തിയ ജയറാം മാധ്യമങ്ങളോട് പ്രതികരിച്ചത്.

ജയറാമിന്റെ പ്രതികരണം: '' ശബരിമല എന്ന് പറയുന്നത് മലയാളികളെ സംബന്ധിച്ചിടത്തോളം പ്രത്യേക വികാരമാണ്. എത്രയോ ക്ഷേത്രങ്ങള്‍ നമുക്ക് ഉണ്ടെങ്കിലും ശബരിമല എന്ന് പറയുന്നത് ഓരോ ഭാരതീയനെ സംബന്ധിച്ചും, ജാതി-മത ഭേദമന്യേ ആളുകളെത്തുന്ന വലിയ ഒരു പുണ്യസ്ഥലം ആണ്. അവിടെ ഇത്തരമൊരു തട്ടിപ്പ് എന്തെങ്കിലും നടന്നിട്ടുണ്ടെങ്കില്‍ അത് 100 ശതമാനം വെളിച്ചത്ത് കൊണ്ട് വരാനും അതിനകത്ത് ബന്ധപ്പെട്ടിട്ടുളളവരെയെല്ലാം വെളിച്ചത്ത് കൊണ്ടുവരാനും ഓരോ മലയാളിയും ബാധ്യസ്ഥരാണ്. ആ മലയാളികളുടെ കൂട്ടത്തില്‍പ്പെട്ട ഒരാളാണ് താനും.

കഴിഞ്ഞ് പത്ത് മുപ്പത്തിയെട്ട് വര്‍ഷക്കാലം കേരളത്തിന് അകത്തും പുറത്തും ഉളള എത്രയോ ക്ഷേത്രങ്ങളില്‍ പല തരത്തിലുളള പൂജകള്‍, ആനയെ നടയ്ക്കിരുത്തല്‍,ആനക്കൊട്ടില്‍ സമര്‍പ്പണം, നട സമര്‍പ്പണം പോലുളള കാര്യങ്ങളില്‍ ആദ്യം ക്ഷണിക്കുന്നത് തന്നെയാണ്. കഴിവതും താന്‍ പോകാറുമുണ്ട്.

അത്തരത്തിലാണ് ഇതുമായി ബന്ധപ്പെട്ട ആളുകള്‍ തന്നെ പൂജയ്ക്ക് വിളിക്കുകയും നടകൊണ്ട് പോകാനും മറ്റും പല പ്രാവശ്യം തന്നെ വിളിച്ച് കൊണ്ട് പോയിട്ടുണ്ട്. ഇതിന്റെയൊക്കെ പിന്നില്‍ കള്ളത്തരങ്ങള്‍ എന്തെങ്കിലും നടന്നിട്ടുണ്ടോ എന്നത് അന്വേഷിക്കാന്‍ കോടതിയും ബന്ധപ്പെട്ട ആളുകളുമെല്ലാം ഇതിന്റെ പിറകേയുണ്ട്. തന്നില്‍ നിന്നും ഇഡിക്ക് ഉപകാരപ്രദമായ എന്തെങ്കിലും കാര്യങ്ങള്‍ കിട്ടുകയാണെങ്കില്‍ സത്യം വെളിച്ചത്ത് കൊണ്ട് വരാന്‍ അത് നല്ലതല്ലേ. അത്തരം കാര്യങ്ങള്‍ ചോദിച്ചറിയാന്‍ വേണ്ടിയാണ് തന്നെ വിളിച്ചിട്ടുളളത്.

എല്ലാം ഭംഗിയായി പര്യവസാനിക്കട്ടെ. ഇനിയും വല്ലവരും കുടുങ്ങാനുണ്ടെങ്കില്‍ അവരും കുടുങ്ങട്ടെ. അയ്യപ്പന്‍ വെറുതേ വിടുമോ അവരെയൊക്കെ. 50 വര്‍ഷത്തിന് മുകളിലായി ശബരിമലയ്ക്ക് പോകുന്ന ഭക്തനാണ് താന്‍. അപ്പോള്‍ തന്റെയും കൂടി കടമയാണ് ഇത് ക്ലീനാക്കുക എന്നത്'' , ജയറാം പറഞ്ഞു.