ജിഷയുടെ ഘാതകനെ അയല്വാസി തിരിച്ചറിഞ്ഞു... അത് അമീറുള് തന്നെ
കൊച്ചി: ജിഷ വധക്കേസില് പിടിയിലായ അമീറുള് ഇസ്ലാമിനെ ജിഷയുടെ അയല്വാസി തിരിച്ചറിഞ്ഞു. കാക്കനാട് ജില്ലാ ജയിലില് നടന്ന തിരിച്ചറിയല് പരേഡില് ആണ് പ്രതിയെ അയല്വാസി തിരിച്ചറിഞ്ഞത്.
ജിഷയുടെ അയല്വാസിയായ ശ്രീലേഖ മാത്രമാണ് തിരിച്ചറിയല് പരേഡിന് എത്തിയിരുന്നത്. ജിഷ കൊല്ലപ്പെട്ട ദിവസം വീട്ടില് നിന്ന് ഒരാള് പുറത്തേയ്ക്ക് ഇറങ്ങിയോടുന്നത് കണ്ടു എന്നായിരുന്നു ശ്രീലേഖ നേരത്തേ മൊഴി നല്കിയിരുന്നത്.
ഒന്നേകാല് മണിക്കൂര് നീണ്ട തിരിച്ചറിയല് പരേഡിലാണ് അമീറുള് ഇസ്ലാമിനെ ശ്രീലേഖ തിരിച്ചറിഞ്ഞത്. അമീറുള്ളിനെ കൂടാതെ രൂപസാദൃശ്യമുള്ള മറ്റ് ചിലരേയും ഹാജരാക്കിയിരുന്നു. മജിസ്ട്രേറ്റ് ഷിബു ഡാനിയല് ആണ് തിരിച്ചറിയല് പരേഡിന് നേതൃത്വം നല്കിയത്.
കേസില് ആറ് പ്രധാന സാക്ഷികളാണ് ഉള്ളത്. അതില് ഏറ്റവും പ്രധാനപ്പെട്ട സാക്ഷിയാണ് ശ്രീലേഖ. ഭര്ത്താവുമൊന്നിച്ചാണ് ശ്രീലേഖ തിരിച്ചറിയല് പരേഡിന് എത്തിയത്. തിരിച്ചറിയല് പരേഡിന് ശേഷം, അത് സംബന്ധിച്ച് എന്തെങ്കിലും പ്രതികരണം നടത്താന് ശ്രീലേഖ തയ്യാറായില്ല.