ജിഷ കൊലപാതകം; പ്രതിയെന്ന് സംശയിക്കുന്നയാളുടെ രേഖാചിത്രം പുറത്ത് വിട്ടു
കൊച്ചി: പെരുമ്പാവൂരില് അതിക്രൂരമായി കൊല്ലപ്പെട്ട ജിഷയുടെ ഘാതകനെന്ന് സംശയിക്കുന്ന വ്യക്തിയുടെ പുതിയ രേഖാചിത്രം പോലീസ് പുറത്ത് വിട്ടു. ഉദ്ദേശം അഞ്ച് അടി ഏഴ് ഇഞ്ച് ഉയരം, വെളുത്ത നിറം, മെലിഞ്ഞ ശരീരം, ചീകാത്ത മുടി എന്നീ അടയാളങ്ങളോട് കൂടിയതുമായ ആളിന്റെ രേഖാചിത്രമാണ് പുറത്ത് വിട്ടത്.
സാക്ഷിമൊഴികളുടെ അടിസ്ഥാനത്തിലാണ് പുതിയ രേഖാ ചിത്രം തയ്യാറാക്കിയത്. ജിഷ കൊല്ലപ്പെട്ട ദിവസം സംശയകരമായ സാഹചര്യത്തില് കണ്ടയാളുടെ രേഖാ ചിത്രങ്ങളാണ് പുതുതായി തയ്യാറാക്കിയത്.
ചിത്രവുമായി സാമ്യമുള്ള ആളെ കുറിച്ച് എന്തെങ്കിലും അറിവുണ്ടെങ്കില് എറണാകുളം റൂറല് ഡിപിസി 9497996979, പെരുമ്പാവൂര് ഡിവൈഎസ്പി 9497990078, കുറുപ്പംപടി എസ്ഐ 9497987121 എന്നീ നമ്പറുകളില് അറിയിക്കണമെന്ന് പോലീസ് അറിയിച്ചു.
ഇയാളുടെ പുതിയ രേഖാചിത്രം അന്വേഷണത്തിന്റെ ആദ്യഘട്ടത്തില് വരച്ചതില് നിന്ന് തികച്ചും വ്യത്യസ്തമാണ്. ജിഷയുടെ വീടിനു പുറത്ത് കണ്ട ആളുടെ രേഖാചിത്രം നേരത്തെ തയ്യാറാക്കിയെങ്കിലും അതുമായി സാമ്യമുള്ള ആരെയും കണ്ടെത്താന് കഴിഞ്ഞിരുന്നില്ല. അതേസമയം ജിഷ വധത്തില് പുതിയ ആരോപണങ്ങള് ഉന്നയിച്ച ജോമോന് പുത്തന്പുരയ്ക്കലിന്റെ മൊഴി അന്വേഷണ സംഘം എടുക്കുകയാണ്.