കേരളത്തിന് നന്ദിയെന്ന് ജിഷ്ണുവിന്റെ കുടുംബം; അവിഷ്ണയെ ആശുപത്രിയിലേക്ക് മാറ്റി
തിരുവനന്തപുരം: സംസ്ഥാന സര്ക്കാരിന്റെ പ്രതിച്ഛായയ്ക്കുതന്നെ കോട്ടംതട്ടുന്ന രീതിയില് ഉയര്ന്നുവന്ന സമരം അവസാനിച്ചതോടെ കേരളത്തിന് നന്ദി പറഞ്ഞ് ജിഷ്ണുവിന്റെ കുടുംബം. സമരത്തിന് തങ്ങള്ക്കൊപ്പം നിന്ന എല്ലാവര്ക്കും നന്ദിയുണ്ടെന്ന് കുടുംബം പറഞ്ഞു. നീതിക്ക് വേണ്ടിയുള്ള പോരാട്ടമായിരുന്നു. മറിച്ചൊരു തെറ്റിദ്ധാരണയും വേണ്ട. തങ്ങള്ക്ക് മറ്റുള്ളവരുമായി ബന്ധമില്ലെന്നും ജിഷ്ണുവിന്റെ അമ്മാവന് ശ്രീജിത്ത് പറഞ്ഞു.
പമ്പാടി നെഹ്റു കോളേജിലെ വിദ്യാര്ഥിയായിരുന്ന ജിഷ്ണുവിന്റെ മരണത്തിന് കാരണക്കാരായ പ്രതികളെ എല്ലാവരേയും പിടികൂടുമെന്ന് സര്ക്കാര് രേഖാമുലം ഉറപ്പ് നല്കിയ സാഹചര്യത്തിലാണ് കുടുംബം ഒന്നടങ്കം നടത്തിവന്ന സമരം അവസാനിപ്പിച്ചത്. നിരാഹാരം അഞ്ചാം ദിവസമാണ് ഒത്തുതീര്പ്പിലെത്തി സമരം തീരാന് വഴിതെളിഞ്ഞത്.
വിദ്യാഭ്യാസ പ്രവര്ത്തകനായ ഷാജര്ഖാനും അദ്ദേഹത്തിന്റെ ഭാര്യയും തങ്ങളുടെ ആവശ്യപ്രകാരമാണ് വന്നത്. അവരെ മോചിപ്പിക്കാമെന്ന് സര്ക്കാര് ഉറപ്പുനല്കിയിട്ടുണ്ട്. അതേസമയം, തങ്ങള്ക്ക് തോക്ക് സ്വാമിയുമായും കെ.എം ഷാജഹാനുമായും ബന്ധമില്ലെന്നും ശ്രീജിത്ത് പറഞ്ഞു. പോലീസിന്റെ ഭാഗത്ത് വീഴ്ചകളുണ്ടായിട്ടുണ്ടെങ്കില് നടപടി എടുക്കാമെന്ന് ജിഷ്ണുവിന്റെ അമ്മ മഹിജയുമായി ഫോണില് സംസാരിച്ച മുഖ്യമന്ത്രി ഉറപ്പു നല്കിയിട്ടുണ്ട്.
അതിനിടെ വീട്ടില് നിരാഹാരം കിടക്കുകയായിരുന്ന ജിഷ്ണുവിന്റെ സഹോദരിയെ ആശുപത്രിയിലേക്ക് മാറ്റി. നാട്ടുകാരുടെയും ബന്ധുക്കളുടെയും സാന്നിധ്യത്തില് വടകര സഹകരണ ആശുപത്രിയിലേക്കാണ് മാറ്റിയത്.