'ഉമ്മാക്കി കാട്ടിയാല്‍ പേടിച്ച് ഓടുന്നവരല്ല കോണ്‍ഗ്രസ്സ്';ശബരിയുടെ അറസ്റ്റ്;പ്രതികരിച്ച് കെ സുധാകരൻ

Published: Tuesday, July 19, 2022, 20:31 [IST]

തിരുവനന്തപുരം : വിമാനത്താവളത്തിൽ വച്ച് മുഖ്യമന്ത്രി പിണറായി വിജയനെ വധിക്കാൻ ശ്രമിച്ചെന്ന കേസിൽ കെ എസ് ശബരിനാഥനെ അറസ്റ്റ് ചെയ്തതിനോട് പ്രതികരിച്ച കെ പി സി സി പ്രസിഡന്റ് കെ സുധാകരൻ. അറസ്റ്റിനെ ഒന്നും കോൺഗ്രസ് പേടിക്കുന്നില്ലെന്ന് വ്യക്തമാക്കിയാണ് കെ സുധാകരൻ പ്രതികരിച്ചത്.

അധികാരം ദുർവിനിയോഗം ചെയ്താണ് ശബരിയെ അറസ്റ്റ് ചെയ്തിരിക്കുന്നതെന്നും അദ്ദേഹം പറഞ്ഞു. അറസ്റ്റ് ചെയ്തത് നിയമ വിധേയമല്ല. ഇത്തരത്തിൽ അറസ്റ്റ് ചെയ്ത് ഞങ്ങളെ തളർത്താം എന്ന് വിചാരിക്കുന്നത് പടുവിഡ്ഢിത്തമാണ്. പൊലീസ് കോടതിയെ കളവു പറഞ്ഞ് തെറ്റിദ്ധരിപ്പിച്ചിരിക്കുകയാണ്.

മുഖ്യമന്ത്രി പിണറായി വിജയന്റെ നിർദ്ദേശ പ്രകാരം കോടതിയെ തെറ്റിദ്ധരിപ്പിക്കാൻ കൂട്ടുനിന്ന പോലീസ് ജീവനക്കാർക്കും സർക്കാർ അഭിഭാഷകനെതിരെയും കേസെടുക്കണമെന്നും അദ്ദേഹം ആവശ്യപ്പെട്ടു.

ശബരിയെ അറസ്റ്റ് ചെയ്ത സർക്കാർ നടപടിയെ കോൺഗ്രസ് നിയമപരമായും രാഷ്ട്രീയപരമായും നേരിടാനാണ് തീരുമാനിച്ചിരിക്കുന്നത്. നിങ്ങൾ വിചാരിക്കുന്ന കോൺഗ്രസുകാർ ഇത്തരം ഉമ്മാക്കി കാട്ടിയാല്‍ പേടിച്ച് ഓടുന്നവരല്ല. മുഖ്യമന്ത്രി പിണറായി അദ്ദേഹത്തിന് വേണ്ടി വിടുപണിയെടുക്കുന്ന പൊലീസ് ഏമാന്‍മാരും ഓര്‍ക്കുന്നത് നല്ലതാണെന്നും കെ പി സി സി പ്രസിഡന്‍റ് മുന്നറിയിപ്പ് നൽകി.

അതേസമയം , സമാന വിഷയത്തിൽ പ്രതിപക്ഷ നേതാവ് വി ഡി സതീശനും പ്രതികരിച്ചിരുന്നു. സർക്കാറിന്റെ ഉന്നത തലത്തിൽ നടന്ന ഗൂഢാലോചനയെ തുടർന്നാണ് വധശ്രമ കേസ് ഉൾപ്പെടെ ചുമത്തി ശബരിനാഥനെ പോലീസ് അറസ്റ്റ് ചെയ്തിരിക്കുന്നതെന്ന് പ്രതിപക്ഷ നേതാവ് ആരോപിച്ചു .

പ്രതിഷേധിക്കാനുള്ള അവകാശം എല്ലാവർക്കും ഉണ്ട്. പ്രതിഷേധിച്ച കുട്ടികളെ തള്ളി നിലത്തിട്ട എൽ ഡി എഫ് കൺവീനറായ ഇ പി ജയരാജനെതിരെ കേസെടുക്കാൻ ഇവിടുത്തെ പോലീസ് തയ്യാറായിട്ടില്ലെന്നും വി ഡി സതീശൻ കൂട്ടിച്ചേർത്തു .

രാഷ്ട്രീയമായും നിയമപരമായും കെ എസ് ശബരിനാഥനെ സംരക്ഷിക്കുമെന്നും പ്രതിപക്ഷ നേതാവ് വി ഡി സതീശൻ വ്യക്തമാക്കി. സര്‍ക്കാര്‍ വൈര്യനിര്യാതന ബുദ്ധിയോടെ പ്രവര്‍ത്തിക്കുകയാണ്. വിമാനത്താവളത്തിൽ മുദ്രാവാക്യം വിളിച്ചതിന്റെ പേരിലാണ് യൂത്ത് കോൺഗ്രസ് പ്രവർത്തകർക്കെതിരെ വധശ്രമ കേസ് ചുമത്തിയത്.

ഈ പ്രവർത്തകരുടെ കയ്യിൽ മറ്റു ആയുധങ്ങൾ ഒന്നും ഇല്ലായിരുന്നു. പ്രതിഷേധം മാത്രമാണ് യൂത്ത് കോൺഗ്രസ് പ്രവർത്തകർ നടത്തിയതെന്ന് ജാമ്യ ഉത്തരവിൽ കോടതി പോലും വ്യക്തമാക്കിയത് . സമാന കേസിലാണ് ഇപ്പോൾ ശബരിനാഥനെ ഉൾപ്പെടുത്തിയിരിക്കുന്നതെന്നും അദ്ദേഹം പറഞ്ഞു .

Published On July 19, 2022