താന്‍ കര്‍ണനെപ്പോലെയെന്ന് ശിവദാസന്‍ നായര്‍... ജമീലയുടെ ആക്ഷേപം ഹീനം

തിരുവനന്തപുരം: മഹാഭാരത്തിലെ കര്‍ണനെപ്പോലെ താന്‍ വേദന കടിച്ചിപിടിച്ച് സഹിച്ചു നില്‍ക്കുകയായിരുന്നുവെന്ന് കെ ശിവദാസന്‍ നായര്‍. ജമീല പ്രകാശം തന്നെ കടിച്ചപ്പോഴും തിരിച്ച് ആക്രമിക്കാതെ സംയമനം പാലിച്ചുവെന്നും ശിവദാസന്‍ നായര്‍ പറയുന്നു.

നിയമസഭയില്‍ ലൈംഗികച്ചുവയോടെ ശിവദാസന്‍ നായര്‍ ആക്രമിച്ചു എന്ന് ചിത്രങ്ങള്‍ സഹിതം കഴിഞ്ഞ ദിവസം ജമീല പ്രകാശം കഴിഞ്ഞ ദിവസം പത്രസമ്മേളനം നടത്തി ആക്ഷേപം ഉന്നയിച്ചിരുന്നു. അതിന് മറുപടിയുമായി വീഡിയോ ദൃശ്യങ്ങളുമായാണ് ശിവദാസന്‍ നായര്‍ രംഗത്തെത്തിയത്.

എല്‍ഡിഎഫ് വനിത എംഎല്‍എമാരെ ആക്രമിച്ചെന്ന ആരോപണം കെട്ടിച്ചമച്ചതാണെന്നാണ് ശിവദാസന്‍ നായര്‍ പറയുന്നത്. മുഖ്യമന്ത്രിയെ ആക്രമിക്കാന്‍ ശ്രമിച്ചപ്പോഴാണ് തടഞ്ഞത്. കെഎം മാണിക്കെതിരെ ജമീല പ്രകാശം പത്രങ്ങള്‍ വലിച്ചെറിഞ്ഞുവെന്നും അദ്ദേഹം പറഞ്ഞു.

ഹീനമായ ആക്ഷേപങ്ങളാണ് തനിക്കെതിരെ ഉന്നയിച്ചത്. സഹോദരനേയും സുഹൃത്തിയനേയും തിരിച്ചറിയാനുള്ള വിവേകം ഉണ്ടാകണം. താന്‍ ജമീല പ്രകാശത്തെ ആക്രമിച്ചിട്ടില്ല. ഭരണപക്ഷ എംഎല്‍എമാര്‍ ആരേയും ആക്രമിച്ചിട്ടില്ലെന്നും അദ്ദേഹം പറഞ്ഞു.

എന്നാല്‍ ജമീല പ്രകാശം പരാതി ഉന്നയിച്ച അസഭ്യ വര്‍ഷത്തെക്കുറിച്ച് വ്യക്തമായ ഉത്തരം നല്‍കാന്‍ ശിവദാസന്‍ നായര്‍ തയ്യാറായില്ല. പരസ്പരം ആക്രോശിക്കുന്നുണ്ടായിരുന്നു എന്നായിരുന്നു അദ്ദേഹത്തിന്റെ മറുപടി.

English summary

K Sivadasan Nair rejects Jameela Prakasham's allegations through video