കങ്കണയും ശോഭനയും ഒന്നുമല്ല, ഏറ്റവും കൂടുതല്‍ തവണ മികച്ച നടിക്കുള്ള പുരസ്കാരം നേടിയത് ആരെന്ന് അറിയുമോ?

ഒരു ഇന്ത്യൻ കലാകാരന് അവരുടെ കരിയറിൽ രാജ്യത്തിന് അകത്ത് നിന്നും ലഭിക്കുന്ന ഏറ്റവും ആദരണീയമായ ബഹുമതിയാണ് ദേശീയ ചലച്ചിത്ര അവാർഡ്. ഇത്തരത്തില്‍ മികച്ച നടനുള്ള ദേശീയ അവാർഡ് നാല് തവണ നേടിയിട്ടുള്ള ഒരേയൊരു താരമാണ് അമിതാഭ് ബച്ചന്‍. കമല്‍ ഹാസന്‍, മമ്മൂട്ടി, അജയ് ദേവ്ഗണ്‍ എന്നിവർ മൂന്ന് തവണയും മോഹന്‍ലാല്‍, സഞ്ജീവ് കുമാർ, നസറുദ്ധീന്‍ ഷാ, ഓം പുരി, മിഥുന്‍ ചക്രബർത്തി, ധനുഷ് എന്നിവർ രണ്ട് തവണയും മികച്ച നടനുള്ള ദേശീയ അവാർഡ് കരസ്ഥമാക്കിയിട്ടുണ്ട്.

നടന്മാരുടെ കാര്യം ഇങ്ങനെയൊക്കെയാണെങ്കില്‍ ഏറ്റവും കൂടുതല്‍ തവണ മികച്ച നടിക്കുള്ള പുരസ്കാരം നേടിയത് ആരാണെന്ന് ചോദിച്ചാല്‍ പലർക്കും അറിയില്ലായിരിക്കാം. നർഗീസ് ദത്താണ് ആദ്യമായി മികച്ച നടിക്കുള്ള പുരസ്കാരം നേടിയവരാണ്. ഏറ്റവും അവസാനം ഈ പട്ടികയിലേക്ക് പേര് ചേർക്കപ്പെട്ടവർ ആലിയ ഭട്ടും കൃതി സനോനുമാണ്.

മികച്ച നടിക്കുള്ള ദേശീയ ചലച്ചിത്ര പുരസ്കാരം ഏറ്റവും കൂടുതല്‍ തവണ നേടിയത് ആരാണെന്ന് ചോദിച്ചാല്‍. അതിന് ഒരേയൊരു ഉത്തരമേയുള്ളു, ആ ഉത്തരമാണ് ഷബാന ആസ്മി. അഞ്ച് തവണ മികച്ച നടിക്കുള്ള ദേശീയ പുരസ്കാരം അവർ സ്വന്തമാക്കി. 1974-ൽ പുറത്തിറങ്ങിയ ശ്യാം ബെനഗലിന്റെ അങ്കുർ എന്ന ആദ്യ ചിത്രത്തിന് തന്നെ ദേശീയ അവാർഡ് സ്വന്തമാക്കാന്‍ സാധിച്ചു എന്നതും ശ്രദ്ധേയമാണ്.

തുടർച്ചയായി മൂന്ന് വർഷത്തിനുള്ളിൽ മൂന്ന് തവണ അവാർഡ് നേടി ഹാട്രിക് പുരസ്കാര നേട്ടം സ്വന്തമാക്കുകയും ചെയ്തു. ഇത്തരമൊരു നേട്ടം സ്വന്തമാക്കുന്ന ഇന്ത്യയിലെ ഏകതാരം കൂടിയാണ് ഷബാന ആസ്മി. മഹേഷ് ഭട്ടിന്റെ ആർത്ത് (1982), മൃണാൾ സെന്നിന്റെ കന്ധർ (1983), ഗൗതം ഘോഷിന്റെ പാർ (1984) എന്നീ ചിത്രങ്ങളിലൂടെയാണ് ഷബാന ഹാട്രിക് തികയ്ച്ചത്. 1999-ൽ തിയറ്ററുകളിൽ റിലീസ് ചെയ്ത വിനയ് ശുക്ലയുടെ ഗോഡ് മദറിലൂടെയാണ് ഷബാന ഏറ്റവും അവസാനമായി മികച്ച നടിക്കുള്ള പുരസ്താരം സ്വന്തമാക്കുന്നത്.

ഷബാന ആസ്മി കഴിഞ്ഞാല്‍ ഏറ്റവും കൂടുതല്‍ തവണ മികച്ച നടിക്കുള്ള ദേശീയ പുരസ്കാരം നേടിയ നടിമാർ ശാരദയും കങ്കണ റണാവത്തുമാണ്. ഇരുവരും മൂന്ന് തവണ പുരസ്കാരത്തിന് അർഹരായി. തബു, സ്മിതാ പാട്ടീൽ, ശോഭന, അർച്ചന എന്നിവർ കരിയറിൽ രണ്ടുതവണ പുരസ്കാരം നേടിയിട്ടുണ്ട്. മോനിഷ, മീരാ ജാസ്മിന്‍, പ്രിയാമണി, സുരഭി ലക്ഷ്മി, കീർത്തി സുരേഷ്, അപർണ ബാലമുരളി എന്നിവർക്ക് ഓരോ തവണയും ദേശീയ പുരസ്കാരം സ്വന്തമാക്കാന്‍ സാധിച്ചിട്ടുണ്ട്.

English summary

Kangana and Shobhana, Do you know who has won the best actress award the most times?