കഞ്ചിക്കോട് ബ്രുവറി; സർക്കാർ ആരോടും ഒന്നും പറഞ്ഞില്ല; മന്ത്രിസഭ യോഗത്തിന്റെ കുറിപ്പുമായി വിഡി സതീശന്
തിരുവനന്തപുരം: ഒയാസിസ് കൊമേഴ്ഷ്യല് പ്രൈവറ്റ് ലിമിറ്റഡ് കമ്പനിക്ക് കഞ്ചിക്കോട് മദ്യ നിര്മാണ പ്ലാന്റുകള് അനുവദിച്ചത് കൂടിയാലോചനകള്ക്ക് ശേഷമാണെന്ന സർക്കാർ വാദം തള്ളി പ്രതിപക്ഷ നേതാവ് വിഡി സതീശന്. പ്ലാന്റുകള് അനുവദിച്ചത് ആരോടും ചര്ച്ച ചെയ്യാതെയാണെന്നും മന്ത്രിസഭാ യോഗത്തിൽ പരിഗണനയ്ക്ക് വന്ന കുറിപ്പ് ഇതിന് തെളിവാണ് ഫേസ്ബുക്കില് പങ്കുവെച്ച കുറിപ്പിലൂടെ അദ്ദേഹം ചൂണ്ടിക്കാട്ടുന്നു.
ഒയാസിസിന് അനുമതി നല്കുന്നത് മറ്റൊരു വകുപ്പുമായും ആലോചിച്ചിട്ടില്ലെന്ന് മന്ത്രിസഭയുടെ പരിഗണയ്ക്ക് വന്ന കുറിപ്പില് എക്സൈസ് മന്ത്രി എം ബി രാജേഷ് തന്നെ വ്യക്തമാക്കുന്നു. സര്ക്കാരിലോ മുന്നണിയിലോ ആലോചിക്കാതെ മുഖ്യമന്ത്രിയും എക്സൈസ് മന്ത്രിയും ചേര്ന്നാണ് ഈ വിവാദ തീരുമാനം എടുത്തതെന്ന പ്രതിപക്ഷ വാദം അക്ഷരംപ്രതി ശരിവയ്ക്കുന്നതാണ് മന്ത്രിസഭ യോഗത്തിന്റെ കുറിപ്പെന്നും അദ്ദേഹം പറയുന്നു.
വിഡി സതീശന്റെ കുറിപ്പിന്റെ പൂർണ്ണ രൂപം ഇങ്ങനെ..
പാലക്കാട് ഉപതിരഞ്ഞെടുപ്പ് പ്രചരണം നടക്കവെ കഴിഞ്ഞ വര്ഷം നവംമ്പര് എട്ടിനാണ് എലപ്പുള്ളിയില് മദ്യനിര്മ്മാണ പ്ലാന്ിന് അനുമതി നല്കുന്നതുമായി ബന്ധപ്പെട്ട 32/G3/2024/ നികുതി എന്ന ഫയല് മന്ത്രിസഭ യോഗത്തിന് സമര്പ്പിക്കാനുള്ള ഉത്തരവ് മുഖ്യമന്ത്രി നല്കുന്നത്. അതുമായി ബന്ധപ്പെട്ട് മന്ത്രിസഭ യോഗത്തില് സമര്പ്പിച്ച കുറിപ്പാണ് പുറത്തു വിട്ടത്. മറ്റ് ഒരു വകുപ്പിന്റെയും അനുമതി തേടുകയോ മറ്റു വകുപ്പുകളുമായി ആശയവിനിമയം നടത്തുകയോ ചെയ്തിട്ടില്ലെന്ന് ഈ കുറിപ്പില് വ്യക്തമാക്കുന്നു.
സര്ക്കാരിലോ മുന്നണിയിലോ ആലോചിക്കാതെ മുഖ്യമന്ത്രിയും എക്സൈസ് മന്ത്രിയും ചേര്ന്നാണ് ഈ വിവാദ തീരുമാനം എടുത്തതെന്ന പ്രതിപക്ഷ വാദം അക്ഷരംപ്രതി ശരിവയ്ക്കുന്നതാണ് മന്ത്രിസഭ യോഗത്തിന്റെ കുറിപ്പ്. എന്തിനാണ് ഇത്രമാത്രം രഹസ്യ സ്വഭാവം? ഒയാസിസ് അല്ലാതെ മറ്റൊരു കമ്പനിയും ഇത്തരം പ്ലാന്റുകള് തുടങ്ങുന്നതിനെ കുറിച്ച് അറിഞ്ഞിട്ടില്ല. എത്ര കിട്ടിയെന്ന് ഇനിയെങ്കിലും വെളിപ്പെടുത്തണം.
മന്ത്രിസഭ യോഗത്തിന്റെ പരിഗണനയ്ക്കു വച്ച കുറിപ്പിലും ഒയാസിസ് കൊമേര്ഷ്യല് പ്രൈവറ്റ് ലിമിറ്റഡ് കമ്പനിയെ പ്രശംസിക്കുന്നുണ്ട്. ഹരിയാന, പഞ്ചാബ്, രാജസ്ഥാന്, മധ്യപ്രദേശ്, ഉത്തര്പ്രദേശ് സംസ്ഥാനങ്ങളില് 20 വര്ഷമായി നടത്തിവിജയിപ്പിച്ച പരിചയ സമ്പന്നത എന്നൊക്കെയാണ് പറയുന്നത്. പക്ഷെ അപ്പോഴും ഇതേ കമ്പനിയുടെ ഉടമ ഡല്ഹി മദ്യ നയ കോഴക്കേസില് അറസ്റ്റിലായതും ഹരിയാനയില് നാലു കിലോമീറ്റര് ദൂരത്തില് ബോര്വെല്ലിലൂടെ മാലിന്യം തള്ളി ഭൂഗര്ഭജലം മലിനപ്പെടുത്തിയതിന് നിയമ നടപടി നേരിടുന്നതും ബോധപൂര്വം മറച്ചുവച്ചു.
എക്സൈസ് മന്ത്രി നിരന്തരം ആവര്ത്തിക്കുന്ന ഒരു വാദം കൂടി മന്ത്രിസഭ നോട്ടില് പൊളിയുന്നുണ്ട്. മദ്യ ഉല്പാദനത്തിന് ആവശ്യമായ എക്സ്ട്രാ ന്യൂട്രല് ആല്ക്കഹോള് കേരളത്തില് തന്നെ ഉല്പാദിപ്പിക്കാന് പ്രോത്സാഹനം നല്കുമെന്നു മാത്രമാണ് 2023-24 ലെ മദ്യ നയത്തില് പറഞ്ഞിരിക്കുന്നത്. ഇക്കാര്യം മന്ത്രിസഭ യോഗത്തിന് മുന്നില് വന്ന കുറുപ്പില് സമ്മതിക്കുന്നുമുണ്ട്. ഈയൊരൊറ്റ തീരുമാനത്തിന്റെ ബലത്തിലാണ് എഥനോള് പ്ലാന്റ്, മള്ട്ടി ഫീഡ്സ് ഡിസ്റ്റിലേഷന് യൂണിറ്റ്, ഇന്ത്യന് നിര്മ്മിത വിദേശ മദ്യ ബോട്ടിലിംഗ് യൂണിറ്റ്, ബ്രൂവറി, മാള്ട്ട് സ്പിരിറ്റ് പ്ലാന്റ്, ബ്രാണ്ടി/വൈന് പ്ലാന്റ് എന്നിവയ്ക്ക് ഒറ്റയടിക്ക് അനുമതി നല്കിയത്.
Click it and Unblock the Notifications
Sign in with Google