കാറുകൾ കൂട്ടിയിടിച്ച് അപകടം; മാപ്പിളപ്പാട്ട് ഗായകൻ ഫൈജാസ് മരിച്ചു

തലശ്ശേരി: മൈസൂരു സംസ്ഥാനന്തര പാതയിൽ പുന്നാട് കാറുകൾ കൂട്ടിയിടിച്ച് മാപ്പിളപ്പാട്ട് കലാകാരൻ മരിച്ചു. ഉളിയിൽ സ്വദേശി ഫൈജാസാണ് മരിച്ചത്. നിരവധി മാപ്പിളപ്പാട്ട് ആൽബങ്ങളിൽ ഉൾപ്പെട്ട പാടിയിട്ടുണ്ട് ഫൈജാസ് ഇരിട്ടി ഭാ​ഗത്തേക്ക് വരികയായിരുന്ന ചക്കരക്കല്ല് സ്വദേശികൾ സഞ്ചരിച്ച കാറും മട്ടന്നൂർ ഭാ​ഗത്തേക്ക് പോവുകയായിരുന്ന ഫൈജാസ് സഞ്ചരിച്ച കാറുമാണ് കൂട്ടിയിടിച്ചത്. അപകടത്തിൽ ഫൈജാസ് സഞ്ചരിച്ച കാറിന്റെ മുൻഭാ​ഗം പൂർണമായും തകർന്നു.

വാഹനത്തിന്റെ അകത്ത് കുടുങ്ങിക്കിടന്ന ഫൈജാസിനെ പോലീസും ഫയർ ഫോഴ്സുമെത്തി ഏറെ നേരത്തെ പരിശ്രമത്തിന് ഒടുവിലാണ് പുറത്തെടുത്ത് ആശുപത്രിയിൽ‌ എത്തിച്ചത്. അപ്പോഴേയ്ക്കും ഫൈജാസ് മരണപ്പെട്ടിരുന്നു. ചക്കരക്കല്ല് സ്വദേശികൾ സഞ്ചരിച്ച കാറിൽ 5 പേരാണ് ഉണ്ടായിരുന്നത്. ഇവരെ പരുക്കുകളോടെ കണ്ണൂരിൽ സ്വകാര്യ ആശുപത്രിയിൽ പ്രവേശിപ്പിച്ചു.

പതിവായി അപകടങ്ങൾ നടക്കുന്ന സ്ഥലമാണ് ഇതെന്നാണ് പറയുന്നത്. കീഴൂർക്കുന്നിനും പുന്നാടിനുമിടയിൽ നേരെയുള്ള റോഡും ഇറക്കവുമാണ്. ഇവിടെ വാഹനങ്ങൾ അമിതവേ​ഗതയിലാണ് സഞ്ചരിക്കാറുള്ളത്. ഇതിന് മുൻപും പ്രദേശത്ത് അപകട മരണങ്ങൾ
സംഭവിച്ചിട്ടുണ്ട്.