രോഗിയ്ക്ക് ഇവിടെ മരുന്നില്ല: പരാതി അറിയിച്ചത് ആരോഗ്യമന്ത്രിയോട്; ഡിപ്പോ മാനേജർക്ക് സസ്പെന്ഷൻ
തിരുവനന്തപുരം: മെഡിക്കല് കോളേജില് കാരുണ്യ ഫാര്മസിയില് മരുന്നുകള് ലഭ്യമല്ലാത്ത കാരണത്താല് കാരുണ്യ ഡിപ്പോ മാനേജറെ അന്വേഷണ വിധേയമായി ആരോഗ്യമന്ത്രി വീണാ ജോർജ് സസ്പെന്ഡ് ചെയ്തു. ഇക്കഴിഞ്ഞ ദിവസം രാത്രിയിലാണ് ആരോഗ്യമന്ത്രി കാരുണ്യ ഫാര്മസി സന്ദര്ശിച്ചിരുന്നത്.
രോഗിയുടെ കുറിപ്പിലുണ്ടായിരുന്ന ഒരു മരുന്നും കാരുണ്യ ഫാര്മസിൽ ഇല്ലായിരുന്നു. ഫാര്മസിയ്ക്ക് അകത്ത് കയറി കമ്പ്യൂട്ടറിലെ മരുന്നുകളുടെ ലിസ്റ്റ് പരിശോധിച്ചു.
അത്യാവശ്യ മരുന്നുകള് കൃത്യമായി സ്റ്റോക്ക് ചെയ്യാന് വീഴ്ച വരുത്തിയ ഉദ്യോഗസ്ഥര്ക്കെതിരെ കര്ശന നടപടിയെടുക്കാന് കെ.എം.എസ്.സി.എല്.നോട് മന്ത്രി നിര്ദേശം നല്കുകയായിരുന്നു. ഇതിന് പിന്നാലെ ഡിപ്പോ മാനേജറെ സസ്പെന്ഡ് ചെയ്തു. മറ്റ് മെഡിക്കല് കോളേജുകളിലും ജനറല് ആശുപത്രികളിലും പ്രവര്ത്തിക്കുന്ന കാരുണ്യ ഫാര്മസികളില് മരുന്ന് ലഭ്യത ഉറപ്പാക്കണമെന്ന് മന്ത്രി കര്ശന നിര്ദേശം നല്കിയിട്ടുണ്ട്.
അതേസമയം, തിരുവനന്തപുരം മെഡിക്കല് കോളജില് വീണ്ടും ആരോഗ്യ മന്ത്രിയുടെ മിന്നൽ പരിശോധന നടത്തി. ഇക്കഴിഞ്ഞ ദിവസെ രാത്രി ഒമ്പതേകാലോടെ മെഡിക്കല് കോളേജ് ആശുപത്രിയിലെത്തിയ മന്ത്രി ഒന്നര മണിക്കൂറോളം ആശുപത്രിയില് ചെലവിട്ടത്. അത്യാഹിത വിഭാഗത്തിലെത്തിയ മന്ത്രി വിവിധ എമര്ജന്സി വിഭാഗങ്ങള് സന്ദര്ശിച്ച് പ്രവര്ത്തനം വിലയിരുത്തി. ഇതോടൊപ്പം ഡ്യൂട്ടി ലിസ്റ്റ് പരിശോധിക്കുകയും ചെയ്തു. സീനിയര് ഡോക്ടര്മാര് അത്യാഹിത വിഭാഗത്തില് രാത്രിയില് ഡ്യൂട്ടിക്കുണ്ടെന്ന് ബോധ്യമായി. അത്യാഹിത വിഭാഗം കാര്യക്ഷമമായി പ്രവര്ത്തിക്കുന്നതായും മനസിലാക്കിയിരുന്നു.
എന്നാൽ, കഴിഞ്ഞ ഒക്ടോബര് 28 - നും മന്ത്രി മെഡിക്കല് കോളേജില് പഴയ അത്യാഹിത വിഭാഗത്തില് രാത്രിയില് അപ്രതീക്ഷിത സന്ദര്ശനം നടത്തിയിരുന്നു. മന്ത്രിയുടെ അന്നത്തെ നിര്ദേശ പ്രകാരം പുതിയ അത്യാഹിത വിഭാഗം ഉടന് പ്രവര്ത്തനം ആരംഭിച്ചു. സീനിയര് ഡോക്ടര്മാര് രാത്രിയില് അത്യാഹിത വിഭാഗത്തില് ഡ്യൂട്ടിക്കില്ലാത്തത് കണ്ടെത്തിയിരുന്നു. അത്തരക്കാര്ക്കെതിരെ കര്ശന നടപടി എടുക്കുമെന്ന് മന്ത്രി പറഞ്ഞിരുന്നു. അതിന് ശേഷം തുടര്ച്ചയായി മന്ത്രി മെഡിക്കല് കോളേജ് സന്ദര്ശിച്ചു. ഇതോടൊപ്പം മെഡിക്കല് കോളേജിന്റെ സേവനം മെച്ചപ്പെടുത്തുന്നതിന് ഒരു കമ്മിറ്റിയെ നിയോഗിച്ചിരുന്നു. ഈ കമ്മിറ്റി നിരന്തരം യോഗം ചേര്ന്ന് പോരായ്മകള് പരിഹരിക്കാനുള്ള നടപടികള് സ്വീകരിച്ചു.
ഇതുകൂടാതെ അത്യാഹിത വിഭാഗത്തിലും വാര്ഡുകളിലും സീനിയര് ഡോക്ടര്മാരുടെ സേവനം ഉറപ്പാക്കാന് കഴിഞ്ഞ ഞായറാഴ്ച മന്ത്രിയുടെ നേതൃത്വത്തില് യോഗം ചേര്ന്നിരുന്നു. ഇതിന്റെ കൂടി അടിസ്ഥാനത്തിലാണ് അത്യാഹിത വിഭാഗത്തിന്റെ രാത്രികാല പ്രവര്ത്തനം മനസിലാക്കാന് മന്ത്രി ഇന്നലെ സന്ദര്ശിച്ചത്. അത്യാഹിത വിഭാഗം നന്നായി പ്രവര്ത്തിക്കുന്നതില് മന്ത്രി സംതൃപ്തി അറിയിച്ചിരുന്നു.
Recommended Video
അത്യാഹിത വിഭാഗത്തില് നിന്നും മന്ത്രി പിന്നീട് വാര്ഡുകളാണ് സന്ദര്ശിച്ചത്. ഈ സമയത്താണ് പത്തൊമ്പതാം വാര്ഡിലെ രോഗിയായ പത്മാകുമാരിയുടെ ഭര്ത്താവ് മന്ത്രിയെ കണ്ട് മരുന്നുകളൊന്നും കാരുണ്യ ഫാര്മസിയില് നിന്നും കിട്ടുന്നില്ലെന്ന് പരാതി പറഞ്ഞത്. അദ്ദേഹത്തില് നിന്നും മന്ത്രി മരുന്നിന്റെ കുറുപ്പ് വാങ്ങി കാരുണ്യ ഫാര്മസിയിലെത്തി. മന്ത്രി പുറത്ത് നിന്ന ശേഷം ഒരാളെ കാരുണ്യ ഫാര്മസിയിലേക്കയച്ചു. മരുന്നില്ലെന്ന് നേരത്തെ പറഞ്ഞതല്ലേയെന്ന് പറഞ്ഞ് ജീവനക്കാരി ദേഷ്യപ്പെട്ടു.
ഉടന് തന്നെ മന്ത്രി കൗണ്ടറിലെത്തി ആ കുറിപ്പ് കാണിച്ചു. അപ്പോഴും മരുന്നില്ലെന്ന് പറഞ്ഞിരുന്നു. എന്ത് കൊണ്ട് മരുന്നില്ലെന്ന് മന്ത്രി ചോദിച്ചിരുന്നു. പിന്നാലെ, മറുപടി പറയാന് ജീവനക്കാര് പതറി. ഉടന് തന്നെ മന്ത്രി ഫാര്മസിക്കകത്ത് കയറി കമ്പ്യൂട്ടറില് മരുന്നുകളുടെ ലിസ്റ്റ് മന്ത്രി പരിശോധിച്ചിരുന്നു. ഡോക്ടര്മാര് എഴുതുന്ന മരുന്നുകളുടെ ലിസ്റ്റെടുത്ത്, ആവശ്യകതയനുസരിച്ച് കൃത്യമായി മരുന്നുകള് സ്റ്റോക്ക് ചെയ്യണമെന്ന് മന്ത്രി നിര്ദേശം നല്കി. അത്യാവശ്യ മരുന്നുകള് കൃത്യമായി സ്റ്റോക്ക് ചെയ്യാന് വീഴ്ച വരുത്തിയ ഉദ്യോഗസ്ഥര്ക്കെതിരെ കര്ശന നടപടിയെടുക്കാന് കെ.എം.എസ്.സി.എല്.നോട് മന്ത്രി നിര്ദേശം നല്കി.
Click it and Unblock the Notifications
Sign in with Google