കാരുണ്യ ലോട്ടറി: 80 ലക്ഷം പോയത് കർണാടകയിലേക്ക്: 72-കാരനെ ഭാഗ്യം തേടിയെത്തിയത് മകള് വഴി
തിരുവന്തപുരം: കേരള സംസ്ഥാന ലോട്ടറി വകുപ്പ് എല്ലാ ശനിയാഴ്ചയും നറുക്കെടുപ്പ് നടത്തുന്ന ലോട്ടറിയാണ് കാരുണ്യ ലോട്ടറി. 80 ലക്ഷം രൂപ ഒന്നാം സമ്മാനവും രണ്ടാം സമ്മാനവുമായി പത്ത് ലക്ഷം രൂപയുമാണ് കാരുണ്യ ലോട്ടറിയിലൂടെ നല്കുന്നത്. ഈ ലോട്ടറിയിലൂടെ കണ്ടെത്തുന്ന തുക നിർധനരായ രോഗികളുടെ സേവനത്തിന് വേണ്ടിയാണ് സർക്കാർ വിനിയോഗിക്കുന്നത്. ഇതുകൊണ്ട് തന്നെ സംസ്ഥാനത്ത് ഏറെ ജനപ്രീതിയുള്ള ലോട്ടറി കൂടിയാണ് കാരുണ്യ.
ഇപ്പോഴിതാ കേരളത്തില് വന്ന് ലോട്ടറിയെടുത്ത ഒരു കർണാടക സ്വദേശിക്ക് കഴിഞ്ഞയാഴ്ചത്തെ കാരുണ്യ ലോട്ടറി നറുക്കെടുപ്പിലെ ഒന്നാം സമ്മാനം ലഭിച്ചിരിക്കുന്നുവെന്ന വാർത്തയാണ് പുറത്ത് വരുന്നത്. കന്നഡ പ്രാദേശിക മാധ്യമങ്ങളാണ് ഇത് സംബന്ധിച്ച വാർത്ത റിപ്പോർട്ട് ചെയ്യുന്നത്. ഉപ്പിനങ്ങാടിയിലെ ഗാന്ധി പാർക്കിന് സമീപം താമസിക്കുന്ന 72 കാരനായ ആനന്ദ എന്ന വ്യക്തിക്കാണ് ലോട്ടറി അടിച്ചിരിക്കുന്നത്.
ജീവിത കാലം മുഴുവന് ടെയിലറായി തൊഴില് ചെയ്തിരുന്ന അദ്ദേഹം അടുത്തിടെയാണ് ആരോഗ്യ പ്രശ്നങ്ങളെ തുടർന്ന് ജോലിയില് നിന്നും പിന്വാങ്ങിയത്. വളരെയധികം കഷ്ടപ്പാടുകള് നേരിടുന്ന തന്നെ സംബന്ധിച്ച് ഇത് ഒരു വലിയ അനുഗ്രഹമാണെന്നാണ് ആനന്ദ വ്യക്തമാക്കുന്നത്. 30 വർഷത്തിലേറെയായി തയ്യൽക്കാരനായി ജോലി ചെയ്ത വ്യക്തിയാണ് ആനന്ദ. കാലുകളെ ബാധിച്ച അസുഖത്തെ തുടർന്നായിരുന്നു ജോലിയില് നിന്നും പിന്വാങ്ങേണ്ടി വന്നത്.
നാട്ടിലെ അറിയപ്പെടുന്ന സാമൂഹ്യ പ്രവർത്തകന് കൂടിയായിരുന്ന ഇദ്ദേഹം ഒരു ടേം ഗ്രാമപഞ്ചായത്ത് അംഗവും വൈസ് പ്രസിഡന്റുമായിരുന്നു. വീട്ടുജോലിക്കാരിയായ ഭാര്യയും ഒരു മകളും രണ്ട് ആൺമക്കളും അടങ്ങുന്നതാണ് ലോട്ടറി ജേതാവിന്റെ കുടുംബം. മകളെ കേരളത്തിലെ നീലേശ്വരത്താണ് വിവാഹം കഴിച്ച് കൊടുത്തത്.
ലോട്ടറി ടിക്കറ്റ് എടുക്കുന്ന ഒരു ശീലവും ഇല്ലാത്ത വ്യക്തിയായിരുന്നു ആനന്ദ. എങ്കിലും ഇടയ്ക്കിടെ മകളുടെ കേരളത്തിലെ വീട്ടിൽ വരുമ്പോൾ കേരള സംസ്ഥാന ലോട്ടറി ടിക്കറ്റ് വാങ്ങുമായിരുന്നു. അതുപോലെ, കഴിഞ്ഞയാഴ്ച മകളുടെ വീട്ടിൽ പോയപ്പോൾ കാരുണ്യ ടിക്കറ്റ് വാങ്ങുകയും ഏപ്രിൽ 15ന് നടന്ന നറുക്കെടുപ്പിൽ ഒന്നാം സമ്മാനമായ 80 ലക്ഷം രൂപ നേടുകയുമായിരുന്നു. 30 ശതമാനം നികുതി തുകയും 10 ശതമാനം ഏജന്റ് കമ്മിഷനും കഴിഞ്ഞുള്ള 56 ലക്ഷം രൂപ വിജയിക്ക് ലഭിക്കും.
അതേസമയംകേരള സംസ്ഥാന ഭാഗ്യക്കുറി വകുപ്പിൻ്റെ കാരുണ്യ പ്ലസ് KN 466 (Karunya Plus KN 466 Lottery Result) ലോട്ടറി ഫലം ഇന്നറിയാം. ഉച്ചകഴിഞ്ഞ് മൂന്നു മണിക്കാണ് നറുക്കെടുപ്പ് നടക്കുക. എല്ലാ വ്യാഴാഴ്ചയും നറുക്കെടുക്കുന്ന കാരുണ്യ പ്ലസ് ലോട്ടറിയുടെ വില 40 രൂപയാണ്. ഭാഗ്യക്കുറി വകുപ്പിൻ്റെ ഔദ്യോഗിക വെബ്സൈറ്റുകളായ https://www.keralalotteryresult.net/, http://www.keralalotteries.com/ എന്നിവ വഴി ഫലം അറിയാം.
Click it and Unblock the Notifications
Sign in with Google