നിയമസഭാ തിരഞ്ഞെടുപ്പ് എപ്പോള്? ഏപ്രിലില് വേണമെന്ന് കക്ഷികള്, ബിജെപി നിലപാട് ഇങ്ങനെ
തിരുവനന്തപുരം: നിയമസഭാ തിരഞ്ഞെടുപ്പ് എപ്പോള് നടത്തണമെന്ന കാര്യത്തില് ചര്ച്ച. സിപിഎം, സിപിഐ, കോണ്ഗ്രസ്, മുസ്ലിം ലീഗ് എന്നീ കക്ഷികള് തിരഞ്ഞെടുപ്പ് ഏപ്രില് ആദ്യവാരം നടത്തണമെന്ന് ആവശ്യപ്പെട്ടു. മെയ് മാസത്തില് നടത്തിയാല് മതി എന്നാണ് ബിജെപിയുടെ നിലപാട്. വിശുദ്ധ റംസാന്, വിഷു എന്നീ ആഘോഷങ്ങള് ചൂണ്ടിക്കാട്ടിയാണ് പ്രധാന കക്ഷികള് ഏപ്രില് ആദ്യ വാരം തിരഞ്ഞെടുപ്പ് നടത്താമെന്ന് നിര്ദേശിച്ചത്.
ഏകദേശം ഏപ്രില് 15നോട് അടുത്താണ് റംസാന് വ്രതാരംഭം. ഒരു മാസം നീളുന്ന വ്രതാരംഭം പരിഗണിച്ചാല് മെയ് 15ന് ശേഷമേ തിരഞ്ഞെടുപ്പ് നടത്താനാകൂ. വ്രതത്തിന്റെ വേളയില് പ്രചാരണം തടസമാകുമെന്നാണ് പാര്ട്ടികളുടെ നിലപാട്. ഏപ്രില് 14നാണ് വിഷു. അതുകൊണ്ടുതന്നെ ഈ രണ്ടു കാര്യങ്ങളാണ് യുഡിഎഫും എല്ഡിഎഫും മുന്നോട്ടുവെക്കുന്നത്.
മെയ് മാസത്തില് മതി തിരഞ്ഞെടുപ്പ് എന്ന് ബിജെപി അഭിപ്രായപ്പെട്ടു. 2016ലെ നിയമസഭാ തിരഞ്ഞെടുപ്പ് മെയ് മാസത്തിലാണ് നടന്നത് എന്ന് അവര് ചൂണ്ടിക്കാട്ടുന്നു. കലാശകൊട്ട് വേണമെന്നാണ് സിപിഎം അഭിപ്രായപ്പെട്ടത്. സിപിഐ അനുകൂലിച്ചു. എന്നാല് കൊറോണ വ്യാപന ആശങ്കയുള്ളതിനാല് ഇക്കാര്യത്തില് തീരുമാനമായില്ല. തിരഞ്ഞെടുപ്പ് ഒറ്റഘട്ടമായി മതി എന്ന് എല്ലാ കക്ഷികളും ആവശ്യപ്പെട്ടു.
എല്ലാ പാര്ട്ടികളുടെയും അഭിപ്രായം കേട്ട തിരഞ്ഞെടുപ്പ് കമ്മീഷന് ഉചിതമായ തീരുമാനം പിന്നീട് എടുക്കുമെന്നാണ് കരുതുന്നത്. ഏപ്രില് ആദ്യത്തില് തിരഞ്ഞെടുപ്പ് നടക്കുമെങ്കില് ഈ മാസം അവസാനമോ അടുത്ത മാസത്തിലോ വിജ്ഞാപനം പുറപ്പെടുവിക്കും.
Click it and Unblock the Notifications
Sign in with Google