'തവനൂരിൽ പിഴുതെറിഞ്ഞത് കാപട്യത്തിന്റെ ജീവൽ പ്രതീകങ്ങളെ'; കുറിപ്പുമായി കെടി ജലീൽ

Updated: Sunday, May 2, 2021, 23:43 [IST]

മലപ്പുറം; തിരുവനന്തപുരം; ഇടതുപക്ഷത്തെ തോൽപ്പിച്ച് തന്നെ രാഷ്ട്രീയ വനവാസത്തിനയക്കാമെന്ന ലീഗ് മോഹത്തിൻ്റെ സ്വപ്നപ്പെട്ടിയിലെ അവസാനത്തെ ആണിയാണ്, തവനൂർ നിയോജക മണ്ഡലത്തിലെ ഏഴു പഞ്ചായത്തുകളിലുള്ള ഉൽബുദ്ധരായ വോട്ടർമാർ അടിച്ചു കയറ്റിയിരിക്കുന്നതെന്ന് കെടി ജലീൽ.മുള്ള് മുരട് മൂർഖൻ പാമ്പ് മുതൽ കല്ല് കരട് കാഞ്ഞിരക്കുറ്റി വരെയുള്ള മുഴുവൻ ദുശ്ശക്തികളും സർവായുധ വിഭൂഷിതരായി അണിനിരന്ന് പടനയിച്ചിട്ടും തവനൂർ മണ്ഡലം നേരിൻ്റെ പക്ഷത്തെയാണ് നെഞ്ചോട് ചേർത്തുവെച്ചത്. കുപ്രചരണങ്ങളുടെ കുത്തൊഴുക്കിലും സത്യം തിരിച്ചറിഞ്ഞ മുഴുവൻ ജനങ്ങളോടും ജീവിതാന്ത്യംവരെ താൻ കടപ്പെട്ടിരിക്കുമെന്നും ഫേസ്ബുക്കിൽ പങ്കുവെച്ച കുറിപ്പിൽ ജലീൽ പറഞ്ഞു. പോസ്റ്റിന്റെ പൂർണരൂപം വായിക്കാം

കേരളം LDF ന്, പിണറായി തരംഗം ആഞ്ഞടിച്ചു, തവനൂരിൽ വീണ്ടും ചെങ്കൊടി പാറി. അങ്ങിനെ മൂന്നാം തവനൂർ യുദ്ധവും LDF ജയിച്ചു. കേരളം വീണ്ടും ഇടതുമുന്നണി ഭരിക്കും. സഖാവ് പിണറായി വിജയൻ കാലാവധി പൂർത്തിയാക്കി രണ്ടാമതും തെരഞ്ഞെടുക്കപ്പെട്ട് വീണ്ടും കേരളത്തിൻ്റെ മുഖ്യമന്ത്രിയാകുന്ന പ്രഥമ ഭരണത്തലവനെന്ന ഖ്യാതിനേടി ഒരുപക്ഷേ കേരളത്തിൽ അടുത്തൊന്നും ഭേദിക്കപ്പെടാത്ത റെക്കാർഡിൻ്റെ ഉടമയുമാകും.

മുള്ള് മുരട് മൂർഖൻ പാമ്പ് മുതൽ കല്ല് കരട് കാഞ്ഞിരക്കുറ്റി വരെയുള്ള മുഴുവൻ ദുശ്ശക്തികളും സർവായുധ വിഭൂഷിതരായി അണിനിരന്ന് പടനയിച്ചിട്ടും തവനൂർ മണ്ഡലം നേരിൻ്റെ പക്ഷത്തെയാണ് നെഞ്ചോട് ചേർത്തുവെച്ചത്. കുപ്രചരണങ്ങളുടെ കുത്തൊഴുക്കിലും സത്യം തിരിച്ചറിഞ്ഞ മുഴുവൻ ജനങ്ങളോടും ജീവിതാന്ത്യംവരെ ഈയുള്ളവൻ കടപ്പെട്ടിരിക്കും. UDF തകർന്നടിഞ്ഞ തെരഞ്ഞെടുപ്പിൽ കേളപ്പജിയുടെയും മഹാകവി വള്ളത്തോളിൻ്റെയും മണ്ണിൽ നിന്ന് ചാരിറ്റി മാഫിയാ തലവൻ വേരോടെ പിഴുതെറിയപ്പെട്ടിരിക്കുന്നു.

2006 ൽ കുറ്റിപ്പുറത്ത് സർവ തിൻമകളുടെയും വടവൃക്ഷത്തെയാണ് കടപുഴക്കി വീഴ്ത്തിയതെങ്കിൽ 2021 ൽ തവനൂരിൽ പിഴുതെറിഞ്ഞത് കാപട്യത്തിൻ്റെ ജീവൽ പ്രതീകങ്ങളെയാണെന്ന വ്യത്യാസമേയുള്ളൂ. ലീഗുകാരനെ കോൺഗ്രസ്സ് കുപ്പായമിടിയിച്ച് നിർത്തി ലീഗ് - കോൺഗ്രസ്സ് വോട്ടുകൾ ഒരു പെട്ടിയിൽ വീഴ്ത്തിയും ബി.ജെ.പിയുടെ നല്ലൊരു ശതമാനം വോട്ടുകൾ വിലക്ക് വാങ്ങിയും വെൽഫെയർ പാർട്ടിയുടെ വോട്ടുകൾ സ്വരൂപിച്ചും എസ്.ഡി.പി.ഐ യെ കൂടെ നിർത്തിയും ഇടതുപക്ഷത്തെ തോൽപ്പിച്ച് എന്നെ രാഷ്ട്രീയ വനവാസത്തിനയക്കാമെന്ന ലീഗ് മോഹത്തിൻ്റെ സ്വപ്നപ്പെട്ടിയിലെ അവസാനത്തെ ആണിയാണ്, തവനൂർ നിയോജക മണ്ഡലത്തിലെ ഏഴു പഞ്ചായത്തുകളിലുള്ള ഉൽബുദ്ധരായ വോട്ടർമാർ അടിച്ചു കയറ്റിയിരിക്കുന്നത്.

ലോകം മുഴുവൻ വേട്ടയാടിയാലും തെറ്റ് ചെയ്തിട്ടില്ലെന്ന ഉത്തമ ബോദ്ധ്യത്തോടെ മനസ്സാക്ഷിയുടെ മുന്നിലും മാലോകരുടെ മുന്നിലും തലകുനിക്കാതെ നിൽക്കാൻ സാധിക്കുമെങ്കിൽ സധൈര്യം മുന്നോട്ടു പോകാമെന്നതിൻ്റെ പരസ്യ പ്രഖ്യാപനവും കൂടിയാണ് ഈ മിന്നും ജയം.
രാഷ്ട്രീയ എതിരാളികളും ഇടതുപക്ഷ വിരുദ്ധത തലക്കുപിടിച്ച ചിലരും നയാഗ്രാ വെള്ളച്ചാട്ടം കണക്കെ അപവാദപ്രചരണങ്ങളുടെ കെട്ടഴിച്ചുവിട്ട് രാഷ്ട്രീയമായി കൊല്ലാകൊല ചെയ്തിട്ടും അടയാഭരണങ്ങളില്ലാത്ത എന്നെപ്പോലെ ഒരു സാധാരണ പൊതുപ്രവർത്തകനിലുള്ള ജനങ്ങളുടെ വിശ്വാസത്തിന് ഒരു പോറൽ പോലുമേൽപ്പിക്കാൻ കഴിയാതെ പോയത് സത്യത്തിന് അത്രയും വലിയ തെളിച്ചമുള്ളത് കൊണ്ടാണ്.

ചാനൽ അവതാരകരായ സുഹൃത്തുക്കളോടും അന്തിച്ചർച്ചകളിൽ പങ്കെടുക്കുന്ന രാഷ്ട്രീയക്കാരും അല്ലാത്തവരുമായ സ്നേഹിതരോടും ഒരഭ്യർത്ഥനയേ ഉള്ളൂ; തങ്ങൾ വേട്ടയാടിപ്പിടിച്ച് കടിച്ച്കുടഞ്ഞ് വലിച്ചുകീറിയെറിഞ്ഞ് 'രാഷ്ട്രീയമരണം' വിധിക്കുന്ന ഇരകളുടെ മനസ്സിലേക്കും ജീവിതത്തിലേക്കും എപ്പോഴെങ്കിലുമൊന്ന് എത്തിനോക്കി നിജസ്ഥിതി മനസ്സിലാക്കാൻ ശ്രമിക്കുക. തട്ടിപ്പൻമാരോടും വെട്ടിപ്പൻമാരോടും അഴിമതിക്കാരോടും 'ദയ' കാണിക്കണമെന്നല്ല, ജീവിതത്തിൽ ഒരു ചില്ലിപ്പൈസ അവിഹിതമായി ദേഹത്തെവിടെയുമാകാതെ സൂക്ഷ്മത പുലർത്തിയവരോടെങ്കിലും ഒരു ദാക്ഷിണ്യമായിക്കൂടെ?