പെൻഷൻ 3000, റബ്ബറിന് 300; വോട്ടർമാരെ കീഴടക്കാൻ യുഡിഎഫിന്റെ പ്രകടനപത്രിക പുറത്ത്!

കേരള നിയമസഭാ തെരഞ്ഞെടുപ്പിനായുള്ള യുഡിഎഫിന്റെ പ്രകടനപത്രിക പുറത്തിറങ്ങി. കൊച്ചിയിൽ നടന്ന ചടങ്ങിൽ പ്രതിപക്ഷ നേതാവ് വി.ഡി. സതീശൻ, തെലങ്കാന മുഖ്യമന്ത്രി രേവന്ത് റെഡ്‌ഡി തുടങ്ങിയ പ്രമുഖ നേതാക്കളുടെ സാന്നിധ്യത്തിലാണ് പത്രിക പ്രകാശനം ചെയ്തത്. കർഷകർക്കും യുവാക്കൾക്കും സാധാരണക്കാർക്കും വലിയ പ്രാധാന്യം നൽകുന്ന 'ഇന്ദിര ഗ്യാരന്റി'കളിൽ അധിഷ്ഠിതമായ വികസനരേഖയാണ് യുഡിഎഫ് മുന്നോട്ടുവെച്ചിരിക്കുന്നത്.

ക്ഷേമ പെൻഷൻ 3000 രൂപ

സാമൂഹിക സുരക്ഷാ പെൻഷനുകൾ 3000 രൂപയായി വർദ്ധിപ്പിക്കുമെന്നതാണ് പ്രധാന വാഗ്ദാനം. നിലവിൽ പെൻഷൻ വിതരണത്തിൽ നേരിടുന്ന തടസ്സങ്ങൾ നീക്കി എല്ലാ മാസവും അഞ്ചാം തീയതിക്കുള്ളിൽ തുക ഗുണഭോക്താക്കളുടെ കൈകളിൽ എത്തിക്കുമെന്ന് യുഡിഎഫ് ഉറപ്പുനൽകുന്നു.

കർഷകർക്ക് കൈത്താങ്ങ്: റബ്ബർ വില 300 രൂപ

കേരളത്തിലെ ലക്ഷക്കണക്കിന് വരുന്ന റബ്ബർ കർഷകരുടെ ദീർഘകാല ആവശ്യമായ 300 രൂപ തറവില യുഡിഎഫ് പ്രകടനപത്രികയിൽ ഉറപ്പുനൽകുന്നു. നെല്ല് സംഭരണ വില കിലോയ്ക്ക് 35 രൂപയാക്കുമെന്നും നാളികേരത്തിന് ന്യായമായ താങ്ങുവില ഉറപ്പാക്കുമെന്നും പത്രികയിലുണ്ട്. വന്യജീവി ആക്രമണങ്ങളിൽ നിന്നുള്ള കൃഷിനാശത്തിന് 48 മണിക്കൂറിനുള്ളിൽ നഷ്ടപരിഹാരം നൽകാനുള്ള പ്രത്യേക സംവിധാനം ഏർപ്പെടുത്തും.

ഉമ്മൻചാണ്ടി ആരോഗ്യ ഇൻഷുറൻസ് പദ്ധതി

മുൻ മുഖ്യമന്ത്രി ഉമ്മൻചാണ്ടിയുടെ സ്മരണാർത്ഥം കേരളത്തിലെ എല്ലാ കുടുംബങ്ങൾക്കും 25 ലക്ഷം രൂപയുടെ സൗജന്യ ആരോഗ്യ ഇൻഷുറൻസ് പരിരക്ഷ ഉറപ്പാക്കുന്ന പദ്ധതി നടപ്പിലാക്കും. കാരുണ്യ പദ്ധതിയുടെ പരിമിതികൾ പരിഹരിച്ച് എല്ലാ സാധാരണക്കാർക്കും മികച്ച ചികിത്സാ സൗകര്യങ്ങൾ സർക്കാർ-സ്വകാര്യ ആശുപത്രികളിൽ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

സ്ത്രീകൾക്ക് സൗജന്യ യാത്ര: കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുമെന്ന് രാഹുൽ ഗാന്ധി കേരളത്തിലെ തെരഞ്ഞെടുപ്പ് റാലികളിൽ പ്രഖ്യാപിച്ചിരുന്നു. ഇത് പ്രകടന പ്രതികയിലെ പ്രധാന വാഗ്ധാനമാണ്. കർണാടകയിലെയും തെലങ്കാനയിലെയും കോൺഗ്രസ് സർക്കാരുകൾ നടപ്പിലാക്കിയ മാതൃകയിലാണ് നടപ്പാക്കുക.

വിദ്യാർത്ഥിനികൾക്ക് സഹായം: കോളേജിൽ പോകുന്ന പെൺകുട്ടികൾക്ക് പ്രതിമാസം 1000 രൂപ പോക്കറ്റ് മണി അല്ലെങ്കിൽ സാമ്പത്തിക സഹായം നൽകുമെന്നതും 'ഇന്ദിര ഗ്യാരന്റി'കളുടെ ഭാഗമായി പ്രഖ്യാപിച്ചു.

യുവാക്കൾക്ക് തൊഴിലും വായ്പയും

തൊഴിലില്ലായ്മ പരിഹരിക്കാൻ 'യുവശക്തി' പദ്ധതിയിലൂടെ സർക്കാർ മേഖലയിലെ ഒന്നര ലക്ഷത്തോളം ഒഴിവുകൾ ഒരു വർഷത്തിനുള്ളിൽ പി.എസ്.സി വഴി നികത്തും. പുതിയ സംരംഭങ്ങൾ തുടങ്ങാൻ ആഗ്രഹിക്കുന്ന യുവ സംരംഭകർക്ക് 5 ലക്ഷം രൂപ വരെ പലിശരഹിത വായ്പ നൽകും. പാവപ്പെട്ട വിദ്യാർത്ഥികളുടെ വിദ്യാഭ്യാസ വായ്പകൾ എഴുതിത്തള്ളാൻ പ്രത്യേക പാക്കേജ് പ്രഖ്യാപിച്ചിട്ടുണ്ട്. കൂടാതെ, മുതിർന്ന പൗരന്മാരുടെ ക്ഷേമത്തിനായി പ്രത്യേക വകുപ്പ് തന്നെ രൂപീകരിക്കുമെന്നും യുഡിഎഫ് പത്രിക വ്യക്തമാക്കുന്നു. തീരദേശ സംരക്ഷണത്തിനായി 5000 കോടി രൂപയുടെ മാസ്റ്റർ പ്ലാൻ, ലൈഫ് ഇൻഷുറൻസ് പദ്ധതികൾ, വിലക്കയറ്റം നിയന്ത്രിക്കാനുള്ള വിപണി ഇടപെടലുകൾ എന്നിവയും ഈ പ്രകടനപത്രികയുടെ ഭാഗമാണ്.

ഭരണവിരുദ്ധ വികാരം വോട്ടാക്കി മാറ്റാൻ ലക്ഷ്യമിട്ടുള്ള ഈ പ്രകടനപത്രിക വരും ദിവസങ്ങളിൽ തെരഞ്ഞെടുപ്പ് പ്രചാരണത്തിലെ പ്രധാന ചർച്ചാവിഷയമാകും. ജനകീയ ആവശ്യങ്ങൾ ഉൾക്കൊള്ളിച്ചുള്ള ഈ വാഗ്ദാനങ്ങൾ വോട്ടർമാരെ എത്രത്തോളം സ്വാധീനിക്കുമെന്ന് രാഷ്ട്രീയ ലോകം ഉറ്റുനോക്കുന്നു.