കേരള ബാങ്ക് പിരിച്ചുവിടുമോ? പഴയ ജില്ലാ സഹകരണ ബാങ്കുകള് തിരിച്ചുവന്നേക്കും, സര്ക്കാര് ആലോചനയില്
കോഴിക്കോട്: കേരള ബാങ്ക് ഒഴിവാക്കി ജില്ലാ സഹകരണ ബാങ്കുകള് തിരിച്ചു കൊണ്ടുവരുന്നതിന്റെ കാര്യം സംസ്ഥാന സര്ക്കാരിന്റെ പരിഗണനയിലെന്ന് റിപ്പോര്ട്ട്. മനോരമ ഓണ്ലൈന് ആണ് ഇത് സംബന്ധിച്ച വാര്ത്ത റിപ്പോര്ട്ട് ചെയ്യുന്നത്. 2016 ല് അധികാരത്തിലേറിയ ഒന്നാം എല് ഡി എഫ് സര്ക്കാര് ആണ് കേരള ബാങ്ക് രൂപീകരിക്കുന്നത്. 2019 നവംബര് 29 നാണ് കേരള ബാങ്ക് പ്രവര്ത്തനം ആരംഭിച്ചത്.
പൊതുവെ കേരളത്തിലെ സഹകരണ ബാങ്കുകളുടെ പൊതുഘടന ത്രിതല സംവിധാനമായിരുന്നു. ഇതൊരു ദ്വിതീയ സംവിധാനമാക്കുകയാണ് കേരള ബാങ്ക് രൂപീകരണത്തിലൂടെ ചെയ്തത്. സംസ്ഥാന സഹകരണ ബാങ്ക്, ജില്ലാ സഹകരണ ബാങ്ക്, പ്രാഥമിക സഹകരണ ബാങ്ക് തുടങ്ങിയ സ്ഥാപനങ്ങളാണ് സഹകരണ ബാങ്കിങ് മേഖലയില് ഉണ്ടായിരുന്നത്. ഇതിലെ, സംസ്ഥാന സഹകരണ ബാങ്കും 13 ജില്ലാ സഹകരണ ബാങ്കുകളും സംയോജിപ്പിച്ചാണ് കേരള ബാങ്കിന്റെ രൂപീകരണം.
കാസര്കോട് ഒഴികെയുള്ള ജില്ലാ സഹകരണ ബാങ്കുകളെയാണ് സംയോജിപ്പിച്ചത്. എന്നാല് കേരള ബാങ്ക് സംസ്ഥാനത്തെ സഹകരണ മേഖലയ്ക്കു കനത്ത തിരിച്ചടിയുണ്ടാക്കി എന്നാണ് യുഡിഎഫ് സഹകാരികളുടെ അഭിപ്രായം. ഇക്കാര്യം സര്ക്കാരിന്റെ പരിഗണനയിലുണ്ട്. എന്നാല് റിസര്വ് ബാങ്കിന്റെ അനുമതി വാങ്ങി, 13 ജില്ലാ ബാങ്കുകളെ ലയിപ്പിച്ച് രൂപീകരിച്ച കേരള ബാങ്കിനെ പഴയപോലെ ജില്ലാ സഹകരണ ബാങ്കുകളാക്കാന് വെല്ലുവിളിയേറെയുണ്ട്.
അതേസമയം കേരള ബാങ്ക് രൂപീകരിക്കുമ്പോള് നല്കിയ വാഗ്ദാനങ്ങളും ഉറപ്പും പാലിക്കപ്പെട്ടില്ല എന്നാണ് ആക്ഷേപം. ജില്ലാ ബാങ്ക് ഒഴിവാകുമ്പോള് കുറഞ്ഞ പലിശ നിരക്കില് വായ്പ ലഭ്യമാകുമെന്നും നിക്ഷേപത്തിന് കൂടുതല് പലിശ ലഭിക്കുമെന്നും വാഗ്ദാനമുണ്ടായിരുന്നെങ്കിലും ഈ അനുകൂല്യങ്ങളൊന്നും ലഭിച്ചില്ലെന്നാണു യുഡിഎഫ് സഹകാരികളുടെ വാദം. മുന്പ് പ്രാഥമിക ബാങ്കുകള്ക്ക് എന്തെങ്കിലും പ്രശ്നങ്ങള് വന്നാല് സഹായിക്കാന് ജില്ലാ ബാങ്കുകള്ക്ക് കഴിയുമായിരുന്നു.
എന്നാല് കേരള ബാങ്ക് ആയതോടെ റിസര്വ് ബാങ്ക് അനുമതിയില്ലാതെ ഒരു ഇടപെടലും നടത്താന് കഴിയാത്ത സ്ഥിതിയായി എന്നും കരുവന്നൂര് അടക്കം നിക്ഷേപകര്ക്ക് പണം നഷ്ടപ്പെടാന് ഇതും കാരണമായി എന്നും ഇവര് ചൂണ്ടിക്കാട്ടുന്നു. യുഡിഎഫ് സര്ക്കാര് വന്നാല് കേരള ബാങ്ക് ഒഴിവാക്കി പഴയ രീതിയിലേക്കു മടങ്ങിപ്പോകും എന്ന് പലനേതാക്കളും പറഞ്ഞിരുന്നു. അതിനാല് കേരള ബാങ്ക് ഒഴിവാക്കി ജില്ലാ സഹകരണ ബാങ്കുകള് തിരിച്ചു കൊണ്ടുവരണം എന്നാണ് യുഡിഎഫ് സഹകാരികള് പറയുന്നത്.
Click it and Unblock the Notifications
Sign in with Google