കേരള ബജറ്റ് Live: സർക്കാർ ജീവനക്കാർക്ക് ആശ്വാസം, ഭൂനികുതിയില്‍ വന്‍ വർധനവ്

തിരുവനന്തപുരം: രണ്ടാം പിണറായി സര്‍ക്കാരിന്റെ അവസാനത്തെ സമ്പൂര്‍ണ ബജറ്റ് അവതരിപ്പിച്ച് കെഎന്‍ ബാലഗോപാല്‍. നിയമസഭയില്‍ ധനകാര്യ മന്ത്രി കെ എന്‍ ബാലഗോപാല്‍ രാവിലെ 9 മണിക്ക് തന്നെ ബജറ്റ് അവതരണം തുടങ്ങി. ഈ വര്‍ഷം അവസാനം തദ്ദേശ തിരഞ്ഞെടുപ്പും അടുത്ത വര്‍ഷം നിയമസഭാ തിരഞ്ഞെടുപ്പും നടക്കാനിരിക്കുകയാണ്. ഈ സാഹചര്യത്തില്‍ ജനപ്രിയ പ്രഖ്യാപനങ്ങളുണ്ടാകുമോ എന്നാണ് എല്ലാവരും ഉറ്റുനോക്കിയിരുന്നത്.

ക്ഷേമപെന്‍ഷന്‍ 1600 ല്‍ നിന്ന് 1800 ആക്കിയേക്കും എന്നായിരുന്നു സൂചന. എന്നാല്‍ ബജറ്റില്‍ ഇത് സംബന്ധിച്ച ഒരു പ്രഖ്യാപനവും ഉണ്ടായില്ല. പെന്‍ഷന്‍ കുടിശിക തീർക്കുമെന്ന് മാത്രമായിരുന്നു ധനമന്ത്രിയുടെ പ്രഖ്യാപനം. വയനാട് പുനരധിവാസത്തിനായി 750 കോടിയുടെ പദ്ധതി ബജറ്റില്‍ പ്രഖ്യാപിച്ചുവെന്നതാണ് ശ്രദ്ധേയം.

കൊച്ചി, കോഴിക്കോട് തിരുവനന്തപുരം നഗരങ്ങളുടെ വികസനത്തിന് പ്ലാനിങ് കമ്മിറ്റികൾ രൂപീകരിക്കാനുള്ള പ്രഖ്യാപനം ബജറ്റിലുണ്ടായി.