Kerala Budget 2025: കാര്‍ഷിക മേഖലയ്ക്ക് 227 കോടി രൂപ; വന്യജീവി ആക്രമണം നേരിടാൻ 50 കോടി

തിരുവനന്തപുരം: ബജറ്റിൽ കാർഷിക മേഖലയ്ക്ക് 227 കോടി പ്രഖ്യാപിച്ച് ധനമന്ത്രി കെഎൻ ബാലഗോപാൽ. നെല്ല് വികസനത്തിന് 150 കോടി വകയിരുത്തി. ക്ഷീരവികസനത്തിന് 120 നൽകും.വന്യജീവി ആക്രമണം നേരിടാൻ 50 കോടിയും പ്രഖ്യാപിച്ചു. തെരുവ് നായ ആക്രമണം തടയാൻ എബിസി കേന്ദ്രങ്ങൾക്ക് കൂടുതൽ വിഹിതം വകയിരുത്തി. ഇതിനായി 2 കോടി രൂപ മാറ്റിവെച്ചതായി ധനമന്ത്രി പറഞ്ഞു.

ആരോഗ്യ മേഖലയ്ക്കായി 10431.73 കോട്യാണ് ബജറ്റിൽ നീക്കിവെച്ചത്. രാജ്യത്ത് കഴിഞ്ഞ മൂന്ന് വർഷമായി ഏറ്റവും അധികം സൗജന്യ ചികിത്സ നൽകുന്ന സംസ്ഥാനമാണ് കേരളമെന്ന് ധനമന്ത്രി പറഞ്ഞു. സംസ്ഥാനത്തെ 42 ലക്ഷം കുടുംബങ്ങള്‍ക്ക് പ്രതിവര്‍ഷം 5 ലക്ഷം രൂപ വരെ ചികിത്സ സഹായം നല്‍കുന്ന കാരുണ്യ ആരോഗ്യ സുരക്ഷ പദ്ധതിക്ക് 3967.3 കോടി രൂപ സര്‍ക്കാര്‍ നൽകിയതായും ധനമന്ത്രി അറിയിച്ചു.

അതേസമയം ക്ഷേമ പെൻഷൻ ഉയർത്തുമെന്ന് പ്രതീക്ഷിക്കപ്പെട്ടെങ്കിലും അത്തരത്തിലുള്ള പ്രഖ്യാപനങ്ങൾ ബജറ്റിൽ ഉണ്ടായില്ല. അതേസമയം മൂന്ന് മാസത്തെ കുടിശില വിതരണം ചെയ്യുമെന്ന് ധനമന്ത്രി അറിയിച്ചു. 'സർക്കാർ 42 മാസം കൊണ്ട് വിതരണം ചെയ്തത് 33,210.68 കോടി രൂപയാണ്. ഉമ്മൻചാണ്ടി സർക്കാരിന്റെ കാലത്തെ കുടിശിക ഉൾപ്പെടെ ഒന്നാം പിണറായി സർക്കാർ 60 മാസം കൊണ്ട് 35,089 കോടി രൂപയായിരുന്നു വിതരണം ചെയ്തത്. രണ്ടാം പിണറായി സർക്കാർ അഞ്ച് വർഷം പൂർത്തിയാകുമ്പോൾ ചുരുങ്ങിയത് 50,000 കോടി ക്ഷേമപെൻഷനായി നൽകും. ക്ഷേമ പെൻഷൻ ചിലപ്പോഴെങ്കിലും തെറ്റായി കൈമാറ്റപ്പെടുന്നുണ്ട്. ഇത് അനുവദിക്കില്ല. ദേശീയ തലത്തിൽ ഓഡിറ്റ് നടത്തി അനർഹരെ ഒഴിവാക്കാനുള്ള നടപടി സ്വീകരിക്കുമെന്ന് മന്ത്രി പറഞ്ഞു.

ലൈഫ് പദ്ധതിയിൽ ഈ വർഷം ഒരു ലക്ഷം വീടുകൾ കൂടി നൽകുമെന്നും ധനമന്ത്രി പ്രഖ്യാപിച്ചു. 'സംസ്ഥാനത്തെ 4,27,736 ഭവനരഹിതർക്കാണ് ലൈഫ് പദ്ധതിയിലൂടെ വീട് വെച്ച് നൽകിയത്. നിലവിൽ 1,11,306 വീടുകൾ പൂർത്തീകരണ ഘട്ടത്തിലാണ്. പട്ടികജാതിയിൽപ്പെട്ട 1,11,966 പേർക്കും പ്ടടികവർഗത്തിൽ പെട്ട 43,332 പേർക്കും ലൈഫ് പദ്ധതിയിലൂടെ വീട് നൽകി', ധനമന്ത്രി പറഞ്ഞു. അതേസമയം ബജറ്റിനെ അതിരൂക്ഷമായ ഭാഷയിൽ പ്രതിപക്ഷം വിമർശിച്ചു. ബജറ്റ് വെറും പൊള്ളയാണെന്നും യാഥാർഥ്യബോധമില്ലാത്തതാണെന്നും പ്രതിപക്ഷ നേതാവ് വഡി സതീശൻ വിമർശിച്ചു.