ബസ് നികുതി കുറച്ചു; ഇലക്ട്രിക് വാഹന നികുതിയും പരിഷ്കരിച്ചു, പുതിയ നികുതി ഘടന ഇങ്ങനെ
എണ്ണവില ഉയരുകയും കെഎസ്ആര്ടിസി സൗജന്യ യാത്ര അനുവദിക്കുകയും ചെയ്തിരിക്കെ അമര്ഷത്തിലുള്ള സ്വകാര്യ ബസ് ഉടമകളെ ആശ്വസിപ്പിക്കാന് ബജറ്റില് നിര്ദേശം. സ്റ്റേജ് കാരിയേജ് ബസുകള്ക്ക് നിലവിലെ മൂന്ന് മാസ നികുതിയില് 50 ശതമാനം ഇളവ് നല്കുമെന്ന് മുഖ്യമന്ത്രി വിഡി സതീശന് അവതരിപ്പിച്ച ബജറ്റില് പറയുന്നു.
കേരളത്തിലേക്ക് ആള് ഇന്ത്യ ബസുകള് ആകര്ഷിക്കാനും ബജറ്റില് നിര്ദേശമുണ്ട്. ആള് ഇന്ത്യ ടൂറിസ്റ്റ് പെര്മിറ്റ് ബസുകളുടെ മൂന്നു മാസ നികുതിയിലും കുറവ് വരുത്തി. സീറ്റ് ഒന്നിന് നിലവില് 2000 രൂപയാണ് നികുതി. ഇത് 900 രൂപയാക്കി. സ്ലീപ്പര് ഒന്നിന് നിലവിലുള്ള നികുതി 3000 രൂപയാണ്. ഇത് 1500 രൂപയാക്കുകയും ചെയ്തു. ഇതോടെ കേരളത്തിലേക്ക് രജിസ്ട്രേഷനായി കൂടുതല് ടൂറിസ്റ്റ് ബസുകള് എത്തുമെന്നാണ് പ്രതീക്ഷ.
സംസ്ഥാനത്തേക്ക് കൂടുതല് ട്രെയിലര് വാഹനങ്ങളെ ആകര്ഷിക്കാനും ബജറ്റില് നിര്ദേശമുണ്ട്. വാഹനങ്ങളുടെ രജിസ്ട്രേഷന് വര്ധിപ്പിക്കാന് ട്രെയിലര് വാഹനങ്ങളുടെ ത്രൈമാസ നികുതി പരിഷ്കരിച്ചു. 20 ടണ്ണിന് മുകളില് ഭാരമുള്ള ട്രെയിലര് വാഹനങ്ങളുടെ അധിക നികുതി ചുമത്തിയിരുന്ന സ്ലാബ് ഒഴിവാക്കി. അത് 15 ടണ്ണിന് മുകളില് ഭാരമുള്ള വാഹനങ്ങളുടെ നികുതി നിരക്കിലേക്ക് താഴ്ത്തി.
ഇലക്ട്രിക് വാഹനങ്ങളുടെ റോഡ് നികുതിയിലും മാറ്റം വരുത്തി. 10 ലക്ഷം രൂപ വിലയിലുള്ള വാഹനങ്ങളുടെ നികുതി 5 ശതമാനമായിരുന്നു. ഇത് മൂന്ന് ശതമാനമാക്കി. 15 ലക്ഷം രൂപ വരെ വിലയുള്ള വാഹനങ്ങളുടെ നികുതി 5 ശതമാനത്തില് തുടരും. 20 ലക്ഷം രൂപ വരെ വിലയുള്ള വാഹനങ്ങളുടെ നികുതി 8 ശതമാനത്തില് നിന്ന് 5 ശതമാനമാക്കി കുറച്ചു. 20 മുതല് 40 ലക്ഷം രൂപ വരെ വിലയുള്ള വാഹനങ്ങളുടെ നികുതി 10 ശതമാനമായി തുടരും. അതിന് മുകളില് വിലയുള്ള വാഹനങ്ങളുടെ നികുതി 10 ശതമാനത്തില് നിന്ന് 15 ശതമാനമാക്കി ഉയര്ത്തി.
അതേസമയം, ഭിന്നശേഷിക്കാര്ക്ക് നികുതി ഇളവ് ലഭിക്കുന്ന വാഹനത്തിന്റെ മൂല്യ പരിധി 7 ലക്ഷം രൂപയില് നിന്ന് 15 ശതമാനമാക്കി ഉയര്ത്തി. 50 ശതമാനം പിഴ മാത്രം അടച്ച് ഇ-ചെല്ലാനുകള് തീര്പ്പാക്കുന്നതിന് ഇ-ചെല്ലാന് ആംനസ്റ്റി പദ്ധതി നടപ്പാക്കുമെന്നും ബജറ്റില് പ്രഖ്യാപനമുണ്ട്.
Click it and Unblock the Notifications
Sign in with Google