കേരള ബജറ്റ്; എന്താണ് ബജറ്റില് പ്രഖ്യാപിച്ച മിഷന് സമുദ്ര? സംസ്ഥാനം ഇനി തുറമുഖ നഗരം
തിരുവനന്തപുരം: മുഖ്യമന്ത്രി വിഡി സതീശന്റെ കന്നി ബജറ്റില് സംസ്ഥാനത്തിന്റെ വികസനത്തിന് ഊന്നല്. ഇതിനായി പ്രഖ്യാപിച്ച പദ്ധതികളില് ആദ്യത്തേതാണ് മിഷന് സമുദ്ര. കേരളത്തെ തുറമുഖ നഗരമാക്കി മാറ്റുകയാണ് പദ്ധതിയുടെ ലക്ഷ്യം. സംസ്ഥാനത്തെ കടല്തീരവും ഉള്നാടന് ജലഗാതഗവും തുറമുഖങ്ങളും റോഡുമെല്ലാം സംയോജിപ്പിച്ചാണ് പദ്ധതി. 400 കോടി രൂപയാണ് ഇതിനായി നീക്കിവച്ചിരിക്കുന്നത്.
കേരളത്തിന്റെ 600 കിലോമീറ്റര് തീരദേശം, രണ്ട് അന്താരാഷ്ട്ര തുറമുഖങ്ങള്, ഒരു ട്രാന്സ്ഷിപ്പ്മെന്റ് ടെര്മിനല്, 17 ചെറു തുറമുഖങ്ങള്, കൂടാതെ ജലമാര്ഗങ്ങള് എന്നിവയെല്ലാം സംയോജിപ്പിച്ചാണ് മിഷന് സമുദ്ര നടപ്പാക്കുക. ലോക മാരിടൈം ഭൂപടത്തില് കേരളത്തെ വന് ശക്തിയാക്കി ഉയര്ത്തുകയാണ് ലക്ഷ്യം. അഞ്ച് വര്ഷത്തിനുള്ളിലാണ് പദ്ധതി നടപ്പാക്കുക. റോഡ്, ജലഗതാഗതം, റെയില്വെ എന്നിവയെല്ലാം കേരളത്തെ പോര്ട്ട് സിറ്റിയാക്കുന്നതിന് വിപുലീകരിക്കും.
വിഴിഞ്ഞത്തേക്കുള്ള യാത്രാ സൗകര്യം വിപുലീകരിക്കും. ബാലരാമപുരം-വിഴിഞ്ഞം ഭൂഗര്ഭ റെയില്, വിഴിഞ്ഞം-നാവായിക്കുളം ഔട്ടര് റിങ് റോഡ് എന്നിവയുമായി ബന്ധപ്പെട്ട നടപടികള് വേഗത്തിലാക്കും. വിഴിഞ്ഞം, കൊച്ചി തുറമുഖങ്ങള്ക്ക് ചുറ്റും അനുബന്ധ നിര്മാണം തുടങ്ങും. ഗ്രീന് ബങ്കറിങ് നല്കുന്ന ഇന്ത്യയിലെ ആദ്യ തുറമുഖമായി വിഴിഞ്ഞത്തെ ഉയര്ത്തും.
മതര് ഷിപ്പ് നിര്മാണത്തിന് കപ്പല് നിര്മാണ കേന്ദ്രം സ്ഥാപിക്കും. ബന്ധപ്പെട്ട വികസനങ്ങളുടെ ഭാഗമായി ജോലി അവസരം ഉണ്ടാകുമ്പോള് തീരദേശത്തുള്ളവര്ക്ക് സംവരണം നല്കും. വിഴിഞ്ഞം-കോവളം, കൊല്ലം, ബേപ്പൂര്, അഴീക്കല് എന്നീ തുറമുഖങ്ങളുടെയും അനുബന്ധ പ്രദേശങ്ങളുടെയും വികസനത്തിന് മാരിടൈം പോളിസി തയ്യാറാക്കും.
വന്കിട, ചെറുകിട തുറമുഖങ്ങളെ ബന്ധിപ്പിച്ച് ജലഗതാഗതം വികസിപ്പിക്കും. ആദ്യം ചരക്കു ഗതാഗതം തുടങ്ങും, പിന്നീട് യാത്രാ സൗകര്യവും. അവസാന ഘട്ടത്തില് ജലാശയങ്ങളെ ബന്ധിപ്പിച്ച് ഏകീകൃത ശൃംഖല സ്ഥാപിക്കും. കേരളത്തിലെ കടല്-ജല യാത്രാ ചരിത്രം വ്യക്തമാക്കുന്ന അന്തര്ദേശീയ മാരിടൈം മ്യൂസിയം സ്ഥാപിക്കും. ഇതിന് 50 കോടി വകയിരുത്തി.
തിരുവനന്തപുരം, കൊല്ലം, ആലപ്പുഴ ജില്ലകളിലെ തീരദേശങ്ങളുടെ വികസനത്തിനും നവീകരണത്തിനും പുതിയ പദ്ധതി ഒരുക്കും. ഈ മൂന്ന് ജില്ലകളെയും ബന്ധിപ്പിച്ച് സതേണ് കേരള ഇക്കോണമിക് കോറിഡോര് സ്ഥാപിക്കും. ആലപ്പുഴ ഇന്ത്യയുടെ ബ്ലൂ ഇക്കോണമി തലസ്ഥാനമായി മാറും. ഇതിനെല്ലാം വേണ്ടി വിദഗ്ധ ഏജന്സി വഴി പഠനം നടത്തി റിപ്പോര്ട്ട് തയ്യാറാക്കും. സ്വകാര്യ നിക്ഷേപം അകര്ഷിക്കാന് ഇത് സഹായിക്കും. സംസ്ഥാനത്തിന്റെയും രാജ്യത്തിന്റെയും വികസനത്തിന് ഇത് സഹായിക്കുമെന്നും ബജറ്റില് പറയുന്നു.
Click it and Unblock the Notifications
Sign in with Google