നക്സല് വര്ഗീസിന്റെ കുടുംബത്തിന് 50 ലക്ഷം രൂപ നഷ്ടപരിഹാരം; മന്ത്രിസഭ അംഗീകരിച്ചു
തിരുവനന്തപുരം: 1970ല് പോലീസ് വെടിവച്ച് കൊലപ്പെടുത്തിയ നക്സല് വര്ഗീസിന്റെ കുടുംബത്തിന് നഷ്ടപരിഹാരം. 50 ലക്ഷം രൂപ കുടുംബാംഗങ്ങള്ക്ക് നല്കാന് ഇന്ന് ചേര്ന്ന മന്ത്രിസഭാ യോഗം തീരുമാനിച്ചു. 1970 ഫെബ്രുവരി 18നാണ് തിരുനെല്ലി കാട്ടില് വര്ഗീസ് പോലീസിന്റെ വെടിയേറ്റ് മരിച്ചത്. അദ്ദേഹത്തിന്റെ സഹോദരങ്ങളായ മറിയക്കുട്ടി, അന്നമ്മ, തോമസ്, ജോസഫ് എന്നിവര്ക്കാണ് പണം കൈമാറുക.
നഷ്ടപരിഹാരം ആവശ്യപ്പെട്ട് വര്ഗീസിന്റെ ബന്ധുക്കള് നേരത്തെ ഹൈക്കോടതിയെ സമീപിച്ചിരുന്നു. സര്ക്കാരിന് നിവേദനം നല്കാനായിരുന്നു കോടതി നിര്ദേശം. സര്ക്കാരിന് കുടുംബാംഗങ്ങള് നിവേദനം നല്കിയതിനെ തുടര്ന്ന് പരിശോധിക്കാന് സെക്രട്ടറി തല സമിതിയെ നിയോഗിച്ചു. 50 ലക്ഷം രൂപ നഷ്ടപരിഹാരമായി നല്കാനായിരുന്നു സമിതിയുടെ ശുപാര്ശ. ഇതാണ് ഇന്ന് മന്ത്രിസഭ അംഗീകരിച്ചത്.
82 കായിക താരങ്ങള്ക്ക് ജോലി നല്കാനും മന്ത്രിസഭ തീരുമാനിച്ചിട്ടുണ്ട്. കായിക യുവജന കാര്യ ഡയറക്ട്രേറ്റില് സൂപ്പര് ന്യൂമററി തസ്തികകള് സൃഷ്ടിച്ച് നിയമനം നല്കും. ശബരിമല, പൗരത്വ ഭേദഗതി നിയമത്തിനെതിരായ സമരം എന്നിവയുടെ പേരില് എടുത്ത കേസുകള് പിന്വലിക്കാനും മന്ത്രിസഭ തീരുമാനിച്ചു. ക്രിമിനല് സ്വഭാവമില്ലാത്ത കേസുകളാണ് പിന്വലിക്കുക. കൊറോണ കാരണം മാറ്റിവച്ച സര്ക്കാര് ജീവനക്കാരുടെ ഒരു മാസത്തെ ശമ്പളം ഏപ്രില് മുതല് അഞ്ച് തവണകളായി തിരിച്ചുനല്കാനും തീരുമാനമായി. പുതുക്കിയ ശമ്പളം ഏപ്രില് ഒന്ന് മുതല് വിതരണം ചെയ്യാനും മന്ത്രിസഭ തീരുമാനിച്ചു.
ക്യൂട്ട് ലുക്കില് അതിഥി റാവു ഹൈദരിയുടെ പുതിയ ഫോട്ടോകള്