അഴിമതി; 'ബാലകൃഷ്ണപിളളയുടേത് വേശ്യയുടെ ചാരിത്രപ്രസംഗം'
കണ്ണൂര്: യുഡിഎഫ് മന്ത്രിമാര്ക്കെതിരെ അഴിമതി ആരോപണവുമായി രംഗത്തെത്തിയ കേരള കോണ്ഗ്രസ് ബി ചെയര്മാന് ബാലകൃഷ്ണ പിള്ളയ്ക്കെതിരെ രൂക്ഷ വിമര്ശനവുമായി കേരള കോണ്ഗ്രസ് (ജേക്കബ്) ചെയര്മാന് ജോണി നെല്ലൂര്. ബാലകൃഷ്ണ പിള്ളയുടെ അഴിമതി ആരോപണം വേശ്യയുടെ ചാരിത്ര്യ പ്രസംഗം പോലെയാണെന്ന് ജോണി നെല്ലൂര് പരിഹസിച്ചു.
യുഡിഎഫില് നിന്നും പുറത്തായ ബാലകൃഷ്ണ പിള്ള ഏതുവിധേനയും എല്ഡിഎഫില് കയറിപ്പറ്റാനുള്ള ശ്രമമാണ് നടത്തുന്നത്. എല്ഡിഎഫ് നേതാക്കളെ പ്രീതിപ്പെടുത്താനാണ് യുഡിഎഫിനെതിരെ ആരോപണവുമായി രംഗത്തെത്താന് കാരണം. ബാലകൃഷ്ണ പിള്ളയുടെ ആരോപണം ജനം വിശ്വസിക്കില്ല. മന്ത്രി അനൂപ് ജേക്കബിനെതിരായ ഏത് അന്വേഷണത്തിനും നേരിടാന് പാര്ട്ടി തയ്യാറാണെന്നും ജോണി നെല്ലൂര് പറഞ്ഞു.
ധനമന്ത്രി മന്ത്രി കെ എം മാണിക്കും ഭക്ഷ്യമന്ത്രി അനൂപ് ജേക്കബിനും എതിരെയാണ് ബാലകൃഷ്ണ പിള്ള വിജിലന്സിന് പരാതി നല്കിയിരിക്കുന്നത്. ഇരുവരും അഴിമതി നടത്തിയിട്ടുണ്ടെന്നത് തനിക്ക് അറിയാവുന്ന കാര്യമാണെന്നും അന്വേഷണം വേണമെന്നുമാണ് ബാലകൃഷ്ണ പിള്ളയുടെ ആവശ്യം.
കണ്സ്യൂമര് ഫോറം അംഗങ്ങളുടെ നിയമനത്തിനായി മന്ത്രി അനൂപ് ജേക്കബ് കൈക്കൂലി വാങ്ങിയെന്നാണ് പിള്ളയുടെ ആരോപണം. രജിസ്ട്രേഷന് വകുപ്പിലെ സ്ഥലം മാറ്റത്തിനും വ്യാപകമായ കൈക്കൂലി ഇടപാട് നടന്നെന്നും പിള്ള ചൂണ്ടിക്കാണിക്കുന്നു. കൂടാതെ ധനമന്ത്രി മാണി ക്വാറി ഉടമകളില് നിന്നും പണം വാങ്ങിയെന്നാണ് മറ്റൊരു ആരോപണം. ഇരുവര്ക്കുമെതിരെ അന്വേഷണം നടന്നില്ലെങ്കില് കോടതിയെ സമീപിക്കുമെന്നും പിള്ള വ്യക്തമാക്കി.