താഴാന് മടിച്ച് സ്വര്ണം; നേരിയ കുറവുമായി ഇന്നത്തെ സ്വര്ണവില, പവന്-ഗ്രാം നിരക്ക് അറിയാം
കൊച്ചി: കേരളത്തില് സ്വര്ണവിലയില് നേരിയ ഇടിവ്. കഴിഞ്ഞ മൂന്ന് ദിവസമായി മാറ്റമില്ലാതെ തുടര്ന്ന സ്വര്ണവില ഇന്ന് വെറും 80 രൂപയാണ് കുറഞ്ഞത്. ആഗോള വിപണിയില് സ്വര്ണവില ഉയര്ന്നിട്ടുണ്ട്. എന്നാല് ഡോളര് സൂചിക അല്പ്പം താഴ്ന്നു. ക്രൂഡ് ഓയില് വിലയും ഇടിയുന്നുണ്ട്. ഇസ്രായേലും ലബ്നാനും തമ്മില് വെടിനിര്ത്തലിന് തയ്യാറായി എന്ന വിവരം വന്നതോടെയാണ് ക്രൂഡ് വില കുറഞ്ഞത്.
അമേരിക്ക കഴിഞ്ഞ ദിവസം ഇറാനെ ആക്രമിച്ചിരുന്നു. ഇറാന് ശക്തമായ തിരിച്ചടി നല്കി. കുവൈത്ത്, ബഹ്റൈന് എന്നിവിടങ്ങളിലായിരുന്നു ഇറാന്റെ തിരിച്ചടി. അമേരിക്കയുടെ നാവിക സേനാ കപ്പലിനെ ആക്രമിക്കുമെന്നും ചെങ്കടല് ചരക്കുപാത തടയുമെന്നും ഇറാന് സൂചന നല്കിയതോടെ അമേരിക്ക ഇടപെട്ടാണ് ഇസ്രായേല്-ലബ്നാന് വെടിനിര്ത്തലിന് കളമൊരുക്കിയത്. ഇതോടെ വിപണിയില് മാറ്റമുണ്ടായി...
കേരളത്തില് ഇന്ന് ഒരു പവന് സ്വര്ണത്തിന്റെ വില 114480 രൂപയാണ്. ഗ്രാം വില 14310 രൂപയുമായി. 22 കാരറ്റ് സ്വര്ണത്തിന്റെ വിലയാണിത്. ഗ്രാമിന് 10 രൂപയും പവന് 80 രൂപയുമാണ് കുറഞ്ഞത്. അതേസമയം, കേരളത്തില് വെള്ളിയുടെ വിലയില് ഇന്ന് മാറ്റമില്ല. ഗ്രാമിന് 280 രൂപയും പത്ത് ഗ്രാമിന് 2800 രൂപയുമാണ് വെള്ളി വില. ആഗോള വിപണിയില് സ്വര്ണം ഔണ്സിന് 4463 ഡോളറാണ് പുതിയ നിരക്ക്.
അതേസമയം, കേരളത്തില് 18 കാരറ്റ് സ്വര്ണത്തിന്റെ ഗ്രാം വില 11760 രൂപയും പവന് 94080 രൂപയുമാണ്. 14 കാരറ്റ് സ്വര്ണം ഗ്രാമിന് 9155 രൂപയും പവന് 73240 രൂപയും നല്കണം. 9 കാരറ്റ് സ്വര്ണം ഗ്രാമിന് 5905 രൂപയും പവന് 47240 രൂപയാണ് ഇന്നത്തെ വില. ഡോളര് സൂചിക അല്പ്പം ഇടിഞ്ഞിട്ടുണ്ട്. 99.47 എന്ന നിരക്കിലാണ് ഡോളര്. രൂപയുടെ മൂല്യം 95.74ലേക്ക് മൂക്കുകുത്തി.
പ്രവാസികള്ക്ക് നല്ലത് യുഎഇ സ്വര്ണം
രൂപയുടെ മൂല്യം ഇടിയുന്നത് പ്രവാസികള്ക്ക് നേട്ടമാണ്. ശമ്പളം കിട്ടുന്ന വേളയില് രൂപയുടെ മൂല്യം ഇടിയുന്നത് നാട്ടിലേക്ക് കൂടുതല് പണം അയക്കാന് അവരെ പ്രേരിപ്പിക്കും. എന്നാല് യുദ്ധം കാരണം ഗള്ഫ് മേഖലയിലെ പ്രവാസികള് പ്രതിസന്ധിയിലാണ് എന്നത് എടുത്തു പറയണം. പലര്ക്കും ജോലി കുറഞ്ഞിട്ടുണ്ട്. ശമ്പളം കുറഞ്ഞവരും നിരവധിയാണ്. യാത്ര സാധ്യമാകാതെ പ്രയാസപ്പെടുന്ന പ്രവാസികളുമുണ്ട്.
കേരളത്തിലേക്കാള് സ്വര്ണത്തിന് വില കുറവാണ് യുഎഇയില്. പ്രവാസികള് സ്വര്ണം വാങ്ങാന് ഉദ്ദേശിക്കുന്നു എങ്കില് യുഎഇയില് നിന്ന് വാങ്ങുന്നതാണ് നേട്ടം. നികുതി കൂട്ടിയതാണ് കേരളത്തിലെ സ്വര്ണവില ഉയര്ന്ന് നില്ക്കാന് കാരണം. 6 ശതമാനത്തില് നിന്ന് 15 ശതമാനമാക്കിയാണ് സ്വര്ണത്തിന്റെ ഇറക്കുമതി തീരുവ കേന്ദ്ര സര്ക്കാര് വര്ധിപ്പിച്ചത്.
കേരളത്തില് ഇന്ന് ഒരു പവന് സ്വര്ണാഭരണത്തിന് 1.24 ലക്ഷം രൂപ വരെ ചെലവ് വരാന് സാധ്യതയുണ്ട്. പഴയ സ്വര്ണം വില്ക്കുന്നവര്ക്ക് 1.14 ലക്ഷം രൂപ കിട്ടിയേക്കും. പഴയ സ്വര്ണത്തിന് തങ്കത്തിന്റെ വിലയാണ് ജ്വല്ലറി വ്യാപാരികള് അടിസ്ഥാനമാക്കുക. ഈ മാസം 19ന് അവതരിപ്പിക്കുന്ന ബജറ്റില് സ്വര്ണ മേഖലയെ ബാധിക്കുന്ന പ്രഖ്യാപനങ്ങള് ഉണ്ടാകുമെന്നാണ് വിവരം.
Click it and Unblock the Notifications
Sign in with Google