സ്വര്ണം ഞെട്ടിച്ചു; 10200 രൂപ വര്ധിച്ചു, ഈ കുതിച്ചുചാട്ടം ചരിത്രത്തിലാദ്യം, ഇന്നത്തെ പവന് വില അറിയാം
കൊച്ചി: കേരളത്തില് സ്വര്ണവിലയില് വന് കുതിപ്പ്. ഒരു പവന് സ്വര്ണത്തിന് പതിനായിരം രൂപയില് അധികം വര്ധിച്ചു. ഇത്രയും രൂപ ഒറ്റയടിക്ക് വര്ധിക്കുന്നത് ആദ്യമാണ്. കേന്ദ്ര സര്ക്കാര് സ്വര്ണത്തിന്റെ ഇറക്കുമതി നികുതി ഉയര്ത്തിയതാണ് ഇന്നത്തെ പൊടുന്നനെയുള്ള വിലക്കയറ്റത്തിന് കാരണം. ഇനിയുള്ള ദിവസങ്ങളില് ആഗോള വിപണിയിലെ മാറ്റത്തിന് അനുസരിച്ചാകും വില വ്യത്യാസം വരിക.
സ്വര്ണത്തിന്റെ ഇറക്കുമതി നികുതി ഇതുവരെ ആറ് ശതമാനമായിരുന്നു. അഞ്ച് ശതമാനം ചുങ്കവും ഒരു ശതമാനം സെസും. ഇനി മുതല് നികുതി പത്ത് ശതമാനമാക്കി ഉയര്ത്തി. സെസ് അഞ്ച് ശതമാനവും. മൊത്തം പതിനഞ്ച് ശതമാനമായി നികുതി ഉയര്ന്നു. ഇതിന്റെ പ്രതിഫലനമാണ് കേരളത്തില് സ്വര്ണവിലയില് 9 ശതമാനം വര്ധനവ്.
കേരളത്തില് ഇന്ന് ഒരു പവന് സ്വര്ണത്തിന് 10200 രൂപയാണ് വര്ധിച്ചിരിക്കുന്നത്. ഓരു ഗ്രാമിന് 1275 രൂപയും. ഇത് 22 കാരറ്റ് സ്വര്ണത്തിന്റെ വിലയാണ്. സമാനമായ വിലമാറ്റം മറ്റു കാരറ്റ് സ്വര്ണത്തിലുമുണ്ടായിട്ടുണ്ട്. വെള്ളിയുടെ വിലയിലും വലിയ കുതിപ്പാണ് ഇന്ന്. ഗ്രാമിന്റെ വില 320 രൂപയായി ഉയര്ന്നു. പത്ത് ഗ്രാമിന് 3200 രൂപയുമായി. എന്നാല് ആഗോള വിപണിയില് സ്വര്ണവിലയില് വലിയ മാറ്റമുണ്ടായിട്ടില്ല. ഔണ്സ് സ്വര്ണത്തിന് 4702 ഡോളറാണ് വില.
കേരളത്തിലെ ഇന്നത്തെ സ്വര്ണവില
22 കാരറ്റ് സ്വര്ണം ഗ്രാം വില 15390, പവന് വില 123120
18 കാരറ്റ് സ്വര്ണം ഗ്രാം വില 12640, പവന് വില 101120
14 കാരറ്റ് സ്വര്ണം ഗ്രാം വില 9845, പവന് വില 78760
9 കാരറ്റ് സ്വര്ണം ഗ്രാം വില 6345, പവന് വില 50760 രൂപ.
ഇന്ന് 10000 രൂപയില് അധികം പവന് വിലയില് ഉയര്ച്ച ഉണ്ടായി എന്നതുകൊണ്ട് എല്ലാ ദിവസവും സമാനമായ വിലക്കയറ്റമുണ്ടാകില്ല. നികുതി വര്ധനവിലെ വില മാറ്റമാണ് ഇന്ന് പ്രകടമായത്. ഇനിയുള്ള ദിവസങ്ങളില് വിപണിയിലെ മാറ്റത്തിന് അനുസരിച്ചാകും വില. ആഗോള വിപണിയില് സ്വര്ണവില താഴുന്നതിനാല് നേരിയ വ്യത്യാസം വരാനും സാധ്യതയുണ്ട്.
സ്വര്ണം ഇറക്കുമതി കുറയ്ക്കാനാണ് കേന്ദ്ര സര്ക്കാര് നികുതി കൂട്ടിയത്. ഉയര്ന്ന നികുതി വന്ന പശ്ചാത്തലത്തില് കൂടുതല് ഇറക്കുമതി ചെയ്യാന് വ്യാപാരികള് തയ്യാറാകില്ല. മാത്രമല്ല, സര്ക്കാരിന്റെ നികുതി വരുമാനം ഉയരുകയും ചെയ്യും. എന്നാല് ഇത് സ്വര്ണ വ്യാപാര മേഖലയെ തകര്ക്കുന്ന നീക്കമാണ് എന്ന് ആക്ഷേപമുണ്ട്. ലോകത്ത് ഏറ്റവും കൂടുതല് സ്വര്ണം കൈവശം കരുതുന്നവരാണ് ഇന്ത്യക്കാര്. ഇത് ഗുണപരമായ രീതിയില് ഉപയോഗിക്കുകയാണ് സര്ക്കാര് ചെയ്യേണ്ടത് എന്ന് വ്യാപാരികള് പറയുന്നു. ഇറക്കുമതി നികുതി കൂട്ടിയാല് നികുതി വെട്ടിപ്പ് വര്ധിച്ചേക്കുമെന്നും അവര് ചൂണ്ടിക്കാട്ടി.
ഇന്ന് ഒരു പവന് ആഭരണം വാങ്ങുന്ന വ്യക്തിക്ക് 1.33 ലക്ഷം രൂപ ചെലവ് പ്രതീക്ഷിക്കാം. ജിഎസ്ടിയും പണിക്കൂലിയും ചേര്ത്താണ് ഉപഭോക്താവിന്റെ അന്തിമ ചെലവ് കണക്കാക്കുന്നത്. ഇതിന് പുറമെ ഹാള്മര്ക്കിങ് ചാര്ജും ഉപഭോക്താവ് നല്കണം. വില കുത്തനെ വര്ധിച്ച സാഹചര്യത്തില് പണിക്കൂലി കുറയ്ക്കാന് ഉപഭോക്താവ് വിലപേശേണ്ടി വരും.
കള്ളക്കടത്ത് വര്ധിക്കാന് സാധ്യത: എകെജിഎസ്എംഎ
സ്വർണ്ണത്തിന്റെ ഇറക്കുമതി ചുങ്കം 6% ത്തിൽ നിന്നും 15% ആയി വർദ്ധിപ്പിച്ചത് ഇറക്കുമതി കുറയ്ക്കുക എന്ന ലക്ഷ്യത്തോടെയാണെങ്കിലും സ്വാഭാവികമായി കള്ളക്കടത്ത് വർദ്ധിക്കുന്നതിന് ഇത് കാരണമാകുമെന്ന് കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ സംസ്ഥാന ജനറൽ സെക്രട്ടറി അഡ്വ.അബ്ദുൽ നാസർ അഭിപ്രായപ്പെട്ടു. നേരത്തെ 15 ശതമാനം ഇറക്കുമതി ചുങ്കം നിലനിൽക്കുമ്പോഴാണ് ഇന്ത്യയിലേക്ക് ആയിരം ടൺ സ്വർണം ഇറക്കുമതി ചെയ്തിട്ടുള്ളത്. 6% ഇറക്കുമതി ചുങ്കം നിലനിൽക്കുമ്പോൾ 800 ടണ്ണിൽ താഴെയാണ് ഇറക്കുമതി...
ഇറക്കുമതി ചുങ്കം 9 ശതമാനം വർദ്ധിപ്പിച്ചതോടെ ഇന്ത്യയിലെ ആഭ്യന്തര സ്വർണ്ണവില പവന് 10200 രൂപയുടെ വർധനവാണുണ്ടായത്. ഒരു കിലോ സ്വർണം കള്ളക്കടത്തായി കൊണ്ടുവന്നാൽ 20 ലക്ഷം രൂപയ്ക്ക് മുകളിൽ ലാഭമാണ് ലഭിക്കുക. കള്ളക്കടത്ത് സ്വർണം സമാന്തര വിപണിയിലേക്ക് ഇറങ്ങുന്നത് വഴി മൂന്നു ശതമാനം ജിഎസ്ടി കൂടി കൂട്ടിയാൽ 24 ലക്ഷം രൂപയുടെ ലാഭമാണ് കള്ളക്കടത്തുകാർക്ക് ഉണ്ടാവുക എന്നും അദ്ദേഹം ചൂണ്ടിക്കാട്ടി.
Click it and Unblock the Notifications
Sign in with Google