മാർച്ച് 25ന്ശേഷം കേരളത്തിൽ ആത്മഹത്യ ചെയ്തത് 66 കുട്ടികൾ: 'ചിരി' കൌൺസിലിങ്ങുമായി സർക്കാർ
തിരുവനന്തപുരം: സംസ്ഥാനത്ത് ലോക്ക്ഡൌൺ ആരംഭിച്ചതോടെ ആത്മഹത്യ ചെയ്ത കുട്ടികളുടെ എണ്ണത്തിൽ വർധനവുണ്ടായതായി മുഖ്യമന്ത്രി പിണറായി വിജയൻ. മാര്ച്ച് 25 മുതല് ഇതുവരെയുള്ള കാലയളവിൽ 18 വയസ്സില് താഴെയുള്ള 66 കുട്ടികളാണ് പല കാരണങ്ങളാല് ആത്മഹത്യ ചെയ്തത്. കേരളത്തിൽ കുട്ടികള്ക്കും കൗമാരക്കാര്ക്കുമിടയില് ആത്മഹത്യകള് വര്ദ്ധിച്ചു വരുന്നത് അതീവഗുരുതരമായ ഒരു സാമൂഹ്യപ്രശ്നമായി മാറുകയാണെന്നും മുഖ്യമന്ത്രി ചൂണ്ടിക്കാണിച്ചു. ഇന്നും അത്തരത്തിലൊരു വാർത്ത പുറത്തുവന്നിട്ടുണ്ടെന്നും മുഖ്യമന്ത്രി ഓർമിപ്പിച്ചു. കഴിഞ്ഞ കുറച്ചു ദിവസങ്ങള്ക്കിടയില് ഒരുപാട് ആത്മഹത്യകള് ഈ പ്രായക്കാര്ക്കിടയില് ഉണ്ടായിരിക്കുന്നുവെന്നും മുഖ്യമന്ത്രി കൂട്ടിച്ചേർക്കുന്നു.
കേരളം കടുത്ത കൊവിഡ് പ്രതിസന്ധിയില്; 9 ദിവസം കൊണ്ട് സമ്പര്ക്ക വ്യാപനത്തിൽ പത്തിരട്ടിയിലേറെ വർദ്ധന
ഓണ്ലൈന് ക്ലാസില് ഇരിക്കാത്തതിന് അമ്മ വഴക്കു പറഞ്ഞത്, ഗെയിം കളിക്കാന് അനുവദിക്കാതിരുന്നത്, ഫോണില് അശ്ലീല ചിത്രം നോക്കിയതിന് വഴക്കു പറഞ്ഞത് തുടങ്ങിയ കാരണങ്ങള്ക്കാണ് പല കുട്ടികളും സ്വയം ജീവനൊടുക്കിയത്. ഇത്തരം സാഹചര്യങ്ങളിൽ കുട്ടികളുടെ മാനസികാവസ്ഥ കണക്കിലെടുത്തുകൊണ്ടുള്ള തിരുത്താണ് രക്ഷിതാക്കള് വരുത്തേണ്ടേത്. താളം തെറ്റിയ കുടുംബജീവിതവും രക്ഷിതാവിന്റെ അമിതമായ ലഹരി ഉപയോഗവും തുടങ്ങിയ ജീവിതാന്തരീക്ഷത്തിലെ പ്രശ്നങ്ങളും ആത്മഹത്യകള്ക്ക് കാരണമായിട്ടുണ്ട്. കോവിഡ്കാരണം സ്കൂളുകളും കോളേജുകളും അടച്ചിടേണ്ടി വന്നതും, കൂട്ടുകാരുടെ കൂടെ ഇടപഴകാന് സാധിക്കാത്തതും ഒക്കെ അവരുടെ മാനസികസമ്മര്ദ്ദം കൂട്ടുന്ന സാഹചര്യം ഉണ്ടാക്കുന്നുണ്ടെന്നും മുഖ്യമന്ത്രി ചൂണ്ടിക്കാണിക്കുന്നു. അതുകൊണ്ടുതന്നെ കൂടുതല് ശ്രദ്ധ ഇക്കാര്യത്തില് മുതിര്ന്നവരുടെ ഭാഗത്തു നിന്നുണ്ടായേ തീരൂ എന്നും അദ്ദേഹം അടിവരയിട്ടു പറയുന്നു.
കുട്ടികളാണെങ്കിലും കൗമാരക്കാരാണെങ്കിലും അവരില് ശാരീരികവും മാനസികവുമായ വളര്ച്ചയുടെ പടവുകളിലാണ്. മുതിര്ന്നവരെ കൈകാര്യം ചെയ്യേണ്ട പോലെയല്ല അവരുമായി ഇടപഴകേണ്ടത്. അവരുടെ സ്വഭാവ സവിശേഷതകള് മനസ്സിലാക്കാനും, അവരെ അടുത്തറിയാനും മുതിര്ന്നവര് ശ്രമിക്കണം. ഊഷ്മളമായ ബന്ധം സ്ഥാപിക്കാനും സ്നേഹപൂര്വം പെരുമാറാനും സാധിക്കണം. സന്തോഷവും സമാധാനവും നിറഞ്ഞ കുടുംബാന്തരീക്ഷം സൃഷ്ടിക്കാനും കാത്തുസൂക്ഷിക്കാനും എല്ലാവരും ശ്രദ്ധിക്കണം. കുടുംബപ്രശ്നങ്ങള് പരിഹരിക്കാന് കൗണ്സിലിങ്ങ് ഉള്പ്പെടെയുള്ള വിദഗ്ധസഹായങ്ങള് തേടാന് ഉപേക്ഷ പാടില്ല. വിദ്യാഭ്യാസവും കുട്ടികളില് വലിയ തോതില് മാനസികസമ്മര്ദ്ദം ഉയര്ത്തുന്ന സാഹചര്യം ഉണ്ടാകുന്നുണ്ടെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.
കുട്ടികളുടെ ആത്മഹതാ പ്രവണതയെക്കുറിച്ച് പഠിക്കാന് ഫയര് ആന്റ് റെസ്ക്യു മേധാവി ആര്. ശ്രീലേഖയുടെ നേതൃത്വത്തില് ഒരു സമിതിയ്ക്ക് രൂപം നല്കിയിട്ടുണ്ട്. അതിനുപുറമേ മാനസിക സംഘര്ഷം അനുഭവിക്കുന്ന കുട്ടികള്ക്ക് ആശ്വാസം പകരാനായി 'ചിരി' എന്ന ഒരു പദ്ധതി ആരംഭിച്ചിട്ടുണ്ട്. സ്റ്റുഡന്റ് പോലീസ് കാഡറ്റുകള് മുഖേന ഫോണ് വഴി കൗണ്സലിംഗ് നല്കുന്ന സംവിധാനമാണിതെന്നും മുഖ്യമന്ത്രി കൂട്ടിച്ചേർത്തു.