'കേക്ക് മുറിക്കാനുള്ള സ്ഥലമല്ല നടപ്പന്തല്‍'; ഗുരുവായൂര്‍ ക്ഷേത്രത്തില്‍ വീഡിയോഗ്രഫിക്ക് നിയന്ത്രണം

Updated: Wednesday, September 18, 2024, 12:41 [IST]

കൊച്ചി: ഗുരുവായൂർ ക്ഷേത്ര നടപ്പന്തലിൽ വീഡിയോ ചിത്രീകരണത്തിന് നിയന്ത്രണമേർപ്പെടുത്തി ഹൈക്കോടതി. വിവാഹ ചടങ്ങുകൾക്കും മറ്റ് മതപരമായ ചടങ്ങുകൾക്കും അല്ലാതെ വീഡിയോ ചിത്രീകരിക്കുന്നതിന് ആണ് ജസ്റ്റിസുമാരായ അനിൽ കെ നരേന്ദ്രൻ, പി ജി അജിത് കുമാർ എന്നിവരുടെ ബെ‍ഞ്ച് വിലക്ക് ഏർപ്പെടുത്തിയത്. പിറന്നാൾ കേക്ക് മുറിക്കാനുള്ള സ്ഥലമല്ല നടപ്പന്തൽ എന്നും കോടതി പറഞ്ഞു.

ചിത്രകാരി ജസ്ന സലിം ക്ഷേത്ര പരിസരത്ത് പിറന്നാൾ കേക്ക് മുറിച്ചതും ക്ഷേത്രത്തിൽ വന്ന മറ്റ് ഭക്തരുമായി തർക്കത്തിൽ ഏർപ്പെടുന്നതും ചൂണ്ടിക്കാട്ടി ഇവർക്കെതിരെ നടപടി എടുക്കണമെന്ന് ആവശ്യപ്പെട്ട് രണ്ട് ഭക്തർ നൽകിയ ഹർജിയിലാണ് കോടതി ഇടപെടൽ. ഈ ചിത്രകാരി നിരന്തരമായി ക്ഷേത്രാചാരങ്ങൾ ലംഘിക്കുകയാണെന്നും ഹർജിയിൽ ആരോപിച്ചിരുന്നു.

വിവാഹ ചടങ്ങുകൾക്കും മറ്റ് മതപരമായ ചടങ്ങുകൾക്കുമല്ലാതെ ഗുരുവായൂർ ക്ഷേത്രം നടപ്പന്തലിലെ വീഡിയോഗ്രാഫി പൂർണമായി നിരോധിച്ച് കൊണ്ടാണ് ഹൈക്കോടതി ഉത്തരവ്. സെലിബ്രിറ്റികളെ അനുഗമിച്ചുള്ള വ്ലോഗർമാരുടെ വീഡിയോ ഗ്രാഫിയും അനുവദിക്കരുത്. കിഴക്കെ നടയിലെ ദീപസ്തംഭത്തിന് സമീപത്ത് കൂടി ക്ഷേത്രത്തിന്റെ ഉൾവശം ചിത്രീകരിക്കുന്നതും തടഞ്ഞു.

ഭക്തരെ തടസ്സപ്പെടുത്തുന്ന നീക്കം ഉണ്ടാകതിരിക്കാനുള്ള നടപടികൾ ക്ഷേത്രം മാനേജിംഗ് കമ്മിറ്റി കൈക്കോള്ളണം. ഇതിനായി ആവശ്യമെങ്കിൽ പോലീസിന്റെ സഹായം തേടാമെന്നും ഉത്തരവിൽ വ്യക്തമാക്കുന്നു. ഗുരുവായൂർ ക്ഷേത്രത്തിന്റെ പവിത്രത സംരക്ഷിക്കപ്പെടണമെന്നും ക്ഷേത്രത്തിലെ മത പാരമ്പര്യങ്ങൾ ലംഘിക്കപ്പെടരുതെന്നും ഹർജിയിൽ ആവശ്യപ്പെട്ടിരുന്നു. ചിത്രകാരി നിയമ വിരുദ്ധമായ രീതിൽ നടപ്പന്തലിൽ പ്രവേശിക്കുകയും അവിടെ അനധികൃത പ്രവർത്തനം നടത്തുകയും ചെയതുവെന്നാണ ഹർജിയിൽ പറയുന്നത്.

പിറന്നാൾ കേക്ക് മുറിക്കുന്ന ദൃശ്യങ്ങൾക്കാെപ്പം ഇവർ ചിലർക്കാെപ്പം തർക്കത്തിൽ ഏർപ്പെടുന്നതിന്റെ ദൃശ്യങ്ങളും ഹർജിക്കാർ കോടതിയിൽ സമർപ്പിച്ചിരുന്നു. ഭക്തർക്ക് ആരാധന സ്വാതന്ത്ര്യം ഉണ്ടെങ്കിലും മറ്റ് ഭക്തരുമായി കലഹം ഉണ്ടാക്കാനുള്ള സ്ഥലം അല്ല നടപ്പന്തൽ എന്നും കോടതി പറഞ്ഞു.