കണ്ണൂരിൽ നിന്ന് തിരുവനന്തപുരത്തേക്ക് വെറും 3.5 മണിക്കൂർ; 'അതിവേഗം' കുതിക്കാം

കേരളത്തിന്റെ ഗതാഗത രംഗത്ത് പുതിയൊരു അധ്യായം കുറിച്ചുകൊണ്ട് അതിവേഗ റെയിൽ ഇടനാഴിക്ക് കേന്ദ്ര സർക്കാരിന്റെ പച്ചക്കൊടി. വന്ദേഭാരത് എക്സ്പ്രസിനേക്കാൾ വേഗതയിലും കൃത്യതയിലും സംസ്ഥാനത്തിന്റെ ഒരറ്റത്ത് നിന്ന് മറ്റേ അറ്റത്തേക്ക് എത്താൻ സാധിക്കുന്ന ഈ പദ്ധതിക്ക് 'മെട്രോമാൻ' ഇ. ശ്രീധരനാണ് നേതൃത്വം നൽകുന്നത്. 2026 ജനുവരി 16-ന് ഡൽഹിയിൽ വെച്ച് റെയിൽവേ മന്ത്രി അശ്വിനി വൈഷ്ണവുമായി നടത്തിയ നിർണ്ണായക കൂടിക്കാഴ്ചയ്ക്ക് ശേഷമാണ് പദ്ധതിക്ക് ഗതിവേഗം ലഭിച്ചത്.

സിൽവർ ലൈനല്ല,ഇത് അതിവേഗ പാത
നേരത്തെ ചർച്ച ചെയ്യപ്പെട്ട സിൽവർ ലൈൻ പദ്ധതിയിൽ നിന്ന് തികച്ചും വ്യത്യസ്തമായ രീതിയിലാണ് ഈ അതിവേഗ റെയിൽ ഇടനാഴി വിഭാവനം ചെയ്തിരിക്കുന്നത്. പ്രധാനമായും സിൽവർ ലൈനിന് ആവശ്യമായിരുന്ന ഭൂമിയുടെ മൂന്നിലൊന്ന് മാത്രമേ ഈ പുതിയ പദ്ധതിക്ക് ആവശ്യമുള്ളൂ എന്നതാണ് ഇതിന്റെ ഏറ്റവും വലിയ പ്രത്യേകത. അതുകൊണ്ടുതന്നെ ഭൂമി ഏറ്റെടുക്കലുമായി ബന്ധപ്പെട്ട തടസ്സങ്ങൾ വളരെ കുറവായിരിക്കുമെന്നാണ് പ്രതീക്ഷിക്കുന്നത്.

പദ്ധതിയുടെ ഏകദേശം 70 മുതൽ 75 ശതമാനം ഭാഗവും ഉയര പാതയിലൂടെയോ (Elevated) അല്ലെങ്കിൽ ഭൂമിക്കടിയിലൂടെയോ ആയിരിക്കും കടന്നുപോകുന്നത്. പുതിയ ഭൂമി ഏറ്റെടുക്കൽ നയം അനുസരിച്ച്, തൂണുകൾക്ക് മുകളിലൂടെയുള്ള പാതയാണെങ്കിൽ അതിന് താഴെയുള്ള ഭൂമി കൃഷി ആവശ്യങ്ങൾക്കോ മറ്റോ ഉടമകൾക്ക് ഉപയോഗിക്കാൻ വിട്ടുനൽകും.

പ്രധാന പ്രത്യേകതകൾ
മണിക്കൂറിൽ 200 കിലോമീറ്റർ വേഗതയിൽ സഞ്ചരിക്കാൻ കഴിയുന്ന സെമി ഹൈസ്പീഡ് ട്രെയിനുകളാണ് ഈ പാതയിൽ ഓടുക. നിലവിൽ കണ്ണൂരിൽ നിന്ന് തിരുവനന്തപുരത്ത് എത്താൻ എടുക്കുന്ന സമയത്തിന്റെ പകുതി പോലും ഈ ട്രെയിനിന് ആവശ്യമില്ല. വെറും 3.5 മണിക്കൂറിനുള്ളിൽ ഈ യാത്ര പൂർത്തിയാക്കാം. ഓരോ 20-25 കിലോമീറ്റർ ഇടവേളകളിലും സ്റ്റേഷനുകൾ ഉണ്ടാകും. ഓരോ 5 മിനിറ്റിലും ട്രെയിൻ ലഭ്യമാകുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. ഡൽഹി-മീററ്റ് ലൈൻ പോലുള്ള റീജിയണൽ റാപ്പിഡ് ട്രാൻസിറ്റ് സിസ്റ്റങ്ങളുടെ മാതൃകയിലാണ് ഇത് രൂപകൽപ്പന ചെയ്തിരിക്കുന്നത്.

ആദ്യ ഘട്ടത്തിൽ തിരുവനന്തപുരം മുതൽ കണ്ണൂർ വരെയാണ് പാത നിർമ്മിക്കുന്നത്. തിരുവനന്തപുരം മുതൽ കൊല്ലം വരെ നിലവിലുള്ള റെയിൽവേ ലൈനിന് സമാന്തരമായിട്ടായിരിക്കും പാത പോവുക. കൊല്ലത്തിന് ശേഷം നിലവിൽ ട്രാക്കുകളില്ലാത്ത മലയോര മേഖലകളിലൂടെയോ മറ്റ് സൗകര്യപ്രദമായ വഴികളിലൂടെയോ കണ്ണൂരിലേക്ക് എത്തും. ഭാവിയിൽ ഇത് കാസർഗോഡ്, മംഗളൂരു വഴി മുംബൈയിലേക്ക് വരെ നീട്ടാനും പദ്ധതിയുണ്ട്.

നിക്ഷേപവും നിർവ്വഹണവും
കൊങ്കൺ റെയിൽവേ മാതൃകയിലായിരിക്കും ഈ പദ്ധതിയുടെ സാമ്പത്തിക ഇടപാടുകൾ നടക്കുക. കേന്ദ്ര സർക്കാർ 51 ശതമാനവും സംസ്ഥാന സർക്കാർ 49 ശതമാനവും മുതൽമുടക്കും. പദ്ധതിയുടെ വിശദമായ റിപ്പോർട്ട് (DPR) ഒൻപത് മാസത്തിനുള്ളിൽ പൂർത്തിയാക്കാൻ ഇ. ശ്രീധരന്റെ നേതൃത്വത്തിലുള്ള സംഘത്തിന് നിർദ്ദേശം നൽകിയിട്ടുണ്ട്. ഈ പദ്ധതി യാഥാർത്ഥ്യമാകുന്നതോടെ കേരളത്തിലെ പൊതുഗതാഗത രംഗത്ത് വൻ മാറ്റങ്ങൾ ഉണ്ടാകുമെന്നും കരുതപ്പെടുന്നു.