കോടികൾ കണ്ടപ്പോൾ കണ്ണുമഞ്ഞളിച്ചില്ല; രമേശന്റെ സത്യസന്ധതയ്ക്ക് കയ്യടി, മാറ്റിവച്ച ടിക്കറ്റിന് സമ്മാനം

Updated: Tuesday, September 27, 2022, 22:47 [IST]

കൂത്താട്ടുകുളം: കോടികള്‍ മുന്നിലെത്തിയാല്‍ കണ്ണുമഞ്ഞളിക്കുന്നവരെ നമ്മള്‍ കണ്ടിട്ടുണ്ട്. എന്നാല്‍ കൂത്താട്ടുകുളത്തെ ശിവശക്തി ലോട്ടറി വില്‍പന കേന്ദ്രത്തിലെ രമേശന് മാറ്റിവച്ച ടിക്കറ്റിന് ഒന്നാം സമ്മാനം അടിച്ചപ്പോള്‍ കണ്ണുമഞ്ഞളിച്ചില്ല. ഒരു ലോട്ടറി ടിക്കറ്റ് തനിക്ക് മാറ്റിവയ്ക്കണമെന്ന് ആവശ്യപ്പെട്ട് സുരേഷ് വിളിച്ചിരുന്നു. ഭാഗ്യവശാല്‍ ഈ ടിക്കറ്റിന് ഒന്നാം സമ്മാനം ലഭിച്ചതോടെ രമേശന്‍ ഈ ടിക്കറ്റ് സുരേഷിന് തന്നെ നല്‍കി. ഇതോടെ ഒട്ടേറ കയ്യടികളാണ് രമേശനെ തേടിയെത്തിയത്.

എല്ലാ ആഴ്ചയിലും ഇതേ സ്ഥലത്ത് നിന്നാണ് സുരേഷ് ലോട്ടറി എടുക്കുന്നത്. പതിവ് പോലെ ഇന്നലെ വിളിച്ചു പറഞ്ഞപ്പോള്‍ സുരേഷ് ടിക്കറ്റ് മാറ്റിവച്ചു. ഞായറാഴ്ച നറുക്കെടുത്ത ഫിഫ്റ്റി ഫിഫ്റ്റി ലോട്ടറിയുടെ ഒരു കോടിയുടെ സമ്മാനം അടിച്ചത് മാറ്റിവച്ച ഈ ടിക്കറ്റിനാണ്. വ്യത്യസ്ത സീരിയലിലുള്ള നമ്പര്‍ കയ്യില്‍ ഉണ്ടായിട്ടും രമേശന്‍ സുരേഷിന് ഈ ടിക്കറ്റ് തന്നെ നല്‍കി.

ഒരു കോടി അടിച്ച വിവരം രമേശന്‍ തന്നെയാണ് സുരേഷിനെ അറിയിച്ചത്. തുടര്‍ന്ന് സുരേഷ് ജോലി ചെയ്യുന്ന വര്‍ക്ക് ഷോപ്പില്‍ എത്തി ടിക്കറ്റ് കൈമാറുകയായിരുന്നു. ഇതോടെ സുരേഷിന് ഒരു വീട് നിര്‍മ്മിക്കുകയെന്ന സ്വപ്‌നം യാഥാര്‍ത്ഥ്യമാകും. അതേസമയം, മാധ്യമങ്ങള്‍ക്ക് മുമ്പില്‍ ഹാജരാകാന്‍ സുരേഷ് തയ്യാറായില്ല. സമ്മാനാര്‍ഹമായ ടിക്കറ്റ് കാനറാ ബാങ്കിന്റെ കൂത്താട്ടുകുളം ശാഖയില്‍ ഏല്‍പ്പിച്ചു.

എല്ലാ ഞായറാഴ്ചയും നറുക്കെടുക്കുന്ന ഫിഫ്റ്റി- ഫിഫ്റ്റി ലോട്ടറിയുടെ വില 50 രൂപയാണ്. ഒന്നാം സമ്മാനമായി 1 കോടി രൂപയും രണ്ടാം സമ്മാനമായി 10 ലക്ഷം രൂപയും ലഭ്യമാകും. നേരത്തെ പൗര്‍ണമി എന്ന പേരില്‍ നടത്തിയിരുന്ന ഞായറാഴ്ച ലോട്ടറിയാണ് ഫിഫ്റ്റി- ഫിഫ്റ്റി എന്ന പേരില്‍ ലോട്ടറി വകുപ്പ് പുനഃരാരംഭിച്ചിരിക്കുന്നത്.