ആളൂര് പറഞ്ഞപ്പോള് കേരള പോലീസ് ഉണര്ന്നോ? ഗോവിന്ദച്ചാമിയുടെ 'ബന്ധങ്ങള്' അന്വേഷിക്കും
തിരുവനന്തപുരം: സൗമ്യ വധക്കേസിലെ പ്രതി ഗോവിന്ദച്ചാമിയുടെ പിറകില് ആരാണെന്ന് പോലീസിന് ഇത്രകാലമായിട്ടും അറിയില്ലായിരുന്നു. അല്ലെങ്കില് പോലീസ് അത് സംബന്ധിച്ച് അന്വേഷിച്ചിരുന്നില്ല.
ഇപ്പോഴിതാ ഗോവിന്ദച്ചാമിയുടെ അഭിഭാഷകനായ അഡ്വ ബിഎ ആളൂര് തന്നെ ആ ബന്ധങ്ങളെ കുറിച്ച് വെളിപ്പെടുത്തിയിരിക്കുന്നു. മുംബൈയിലെ മയക്കുമരുന്ന് മാഫിയയാണ് ഗോവിന്ദച്ചാമിയ്ക്ക് വേണ്ടി തന്നെ സമീപിച്ചത് എന്നാണ് ആളൂര് വെളിപ്പെടുത്തിയത്.
സത്യത്തില് ഞെട്ടിപ്പിക്കുന്ന ഒരു വെളിപ്പെടുത്തല് തന്നെ ആയിരുന്ന് അത്. എങ്ങനെയാണ് ഗോവിന്ദച്ചാമി മയക്കുമരുന്ന് മാഫിയയുമായി ബന്ധപ്പെട്ടത്? സൗമ്യ കേസ് അന്വേഷിച്ച കേരള പോലീസിന് ഇത് സംബന്ധിച്ച് ഒരു സൂചന പോലും കിട്ടിയിരുന്നില്ല. ഗോവിന്ദച്ചാമി മാഫിയയിലെ കണ്ണിയാണെന്നാണ് ആളൂര് പറഞ്ഞിട്ടുള്ളത്.
എന്തായാലും ഇപ്പോള് കേരള പോലീസ് ഉണര്ന്നുകഴിഞ്ഞു. ഗോവിന്ദച്ചാമിയുടെ ബന്ധങ്ങള് അന്വേഷിക്കാനാണ് നീക്കം. രഹസ്യാന്വേഷണ വിഭാഗമാണ് അന്വേഷണം നടത്തുക. ഗോവിന്ദച്ചാമിയുടെ മാഫിയ ബന്ധം, ആ മാഫിയയയില് മലയാളികള് ആരെങ്കിലും ഉണ്ടോ, മാഫിയയുടെ ഭാഗമായുളള പ്രവര്ത്തനത്തില് ഗോവിന്ദച്ചാമിക്കെതിരെ കേസുകള് രജിസ്റ്റര് ചെയ്യപ്പെട്ടിട്ടുണ്ടോ തുടങ്ങിയ കാര്യങ്ങളാകും അന്വേഷണ പരിധിയില് വരിക.