ഇടിച്ചുകുത്തി മഴ പെയ്യും; എല്ലാ ജില്ലകളിലും വ്യാപകമഴയ്ക്ക് സാധ്യത; എട്ടിടത്ത് യെല്ലോ അലര്ട്ട്
തിരുവനന്തപുരം: സംസ്ഥാനത്ത് ഇന്നും ശക്തമായ മഴ പെയ്യുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ശക്തമായ മഴയ്ക്കുള്ള സാധ്യത കണക്കിലെടുത്ത് ഇന്ന് എട്ട് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. 24 മണിക്കൂറില് 64.5 മില്ലി മീറ്റര് മുതല് 115.5 മില്ലി മീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ നിരീക്ഷണ കേന്ദ്രം അര്ത്ഥമാക്കുന്നത്
തിരുവനന്തപുരം, കൊല്ലം, ആലപ്പുഴ, ഇടുക്കി, പത്തനംതിട്ട, കോട്ടയം, എറണാകുളം, തൃശൂര് ജില്ലകളിലാണ് യെല്ലോ അലെര്ട്ട് പ്രഖ്യാപിച്ചിരിക്കുന്നത്. മറ്റ് ജില്ലകളില് മുന്നറിയിപ്പില്ലെങ്കിലും വ്യാപകമായ മഴയ്ക്ക് സാധ്യത ഉണ്ട് എന്ന് കാലാവസ്ഥാ വകുപ്പ് വ്യക്തമാക്കി. ന്യൂനമര്ദ്ദത്തിന്റെയും ന്യൂനമര്ദ്ദപാത്തിയുടെയും ചക്രവാതച്ചുഴിയുടെയും സ്വാധീനത്താലാണ് സംസ്ഥാനത്ത് മഴ കനക്കുന്നത്.
മധ്യകിഴക്കന് അറബിക്കടലില് മഹാരാഷ്ട്ര തീരത്തിന് സമീപം ശക്തി കൂടിയ ന്യൂനമര്ദ്ദം സ്ഥിതി ചെയ്യുന്നുണ്ട്. ഇന്ത്യന് തീരത്ത് നിന്ന് അകന്നു പോകുന്ന ന്യൂനമര്ദ്ദം ഞായറാഴ്ചയോടെ തീവ്ര ന്യൂനമര്ദ്ദമായി ശക്തി പ്രാപിച്ചേക്കും. മഹാരാഷ്ട്ര തീരത്തെ മധ്യ കിഴക്കന് അറബിക്കടല് മുതല് തെക്കന് കേരള തീരത്തിനു സമീപത്ത് തെക്ക് കിഴക്കന് അറബിക്കടല് വരെയാ് ന്യൂനമര്ദ്ദപാത്തി സ്ഥിതി ചെയ്യുന്നത്.
ബംഗാള് ഉള്ക്കടലില് തമിഴ്നാട് തീരത്തിന് സമീപവും തെക്ക് പടിഞ്ഞാറന് ബംഗാള് ഉള്ക്കടലിലും മുകളിലായി രണ്ട് ചക്രവാതചുഴികളും രൂപപ്പെട്ടിട്ടുണ്ട്. ഈ സാഹചര്യത്തില് വരും ദിവസങ്ങളിലും ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 15-ാം തിയതി വരെയുള്ള മഴ മുന്നറിയിപ്പ് നിലവിലെ സാഹചര്യത്തില് കാലാവസ്ഥാ വകുപ്പ് പുറപ്പെടുവിച്ചിട്ടുണ്ട്.
നാളെ പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, പാലക്കാട് ജില്ലകളില് യെല്ലോ അലര്ട്ടായിരിക്കും. 14 ന് ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലും 15 ന് പാലക്കാട്, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലും യെല്ലോ അലര്ട്ടായിരിക്കും. ഒറ്റപ്പെട്ട സ്ഥലങ്ങളില് ശക്തമായ മഴക്കും ഇടിമിന്നലിന് സാധ്യതയുണ്ട് എന്നാണ് മുന്നറിയിപ്പ്.
അതേസമയം കേരള -ലക്ഷദ്വീപ് തീരങ്ങളില് മത്സ്യബന്ധനത്തിന് വിലക്കേര്പ്പെടുത്തി. മണിക്കൂറില് 35 -45 കിലോമീറ്റര് വരെയും ചിലപ്പോള് 55 കിലോമീറ്റര് വരെയും വേഗതയില് കാറ്റിനും മോശം കാലാവസ്ഥയ്ക്കും സാധ്യതയുണ്ട് എന്ന മുന്നറിയിപ്പിനെ തുടര്ന്നാണിത്. അതിനിടെ കോട്ടയം ജില്ലയിലെ മണിമല നദിയില് ജലനിരപ്പ് അപകടകരമായ വിധത്തില് ഉയരുന്നതിനാല് കേന്ദ്ര ജലകമ്മീഷന് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്.
Click it and Unblock the Notifications
Sign in with Google