സംസ്ഥാനത്ത് അതിശക്തമായ മഴയക്ക് സാധ്യത, 4 ജില്ലകളില് യെല്ലോ അലര്ട്ട്
തിരുവനന്തപുരം: കേരളത്തില് ഇന്ന് ശക്തമായ മഴയ്ക്ക് സാധ്യത. ജൂണ് 25 മുതല് 27 വരെ ഇടിമിന്നലോട് കൂടിയ മഴയ്ക്കും, മണിക്കൂറില് 30 മുതല് 40 കിലോമീറ്റര് വരെ വേഗതയില് വീശിയേക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇന്ന് നാല് ജില്ലകളിലാണ് യെല്ലോ അലര്ട്ട് പ്രഖ്യാപിച്ചിട്ടുള്ളത്. ആലപ്പുഴ, എറണാകുളം, തൃശൂര്, കോഴിക്കോട് ജില്ലകളിലാണ് യെല്ലോ അലര്ട്ട്.
26ന് എറണാകുളം, കണ്ണൂര് ജില്ലകളിലും, 27ന് ആലപ്പുഴ, കോട്ടയം, എറണാകുളം, ഇടുക്കി, തൃശൂര്, പാലക്കാട്, മലപ്പുറം ജില്ലകളിലുമാണ് യെല്ലോ അലര്ട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാകുന്നത്.
ചൊവ്വാഴ്ച്ച ഇടുക്കിയില് മഞ്ഞ അലര്ട്ട് ആണ് കേന്ദ്ര കാലാവസ്ഥാ വകുപ്പ് പ്രവചിച്ചിരിക്കുന്നത്. ഓറഞ്ച് അലര്ട്ടിന് സമാനമായ മഴ പ്രതീക്ഷിക്കാവുന്നതാണ്. 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ മഴ ഇവിടെ ലഭിച്ചേക്കാമെന്നും കാലാവസ്ഥാ വകുപ്പ് അറിയിച്ചു.
അതേസമയം മത്സ്യത്തൊഴിലാളികള്ക്കും ജാഗ്രതാ നിര്ദേശമുണ്ട്. കേരള-കര്ണാടക തീരത്തും, ലക്ഷദ്വീപ് പ്രദേശത്തും, മത്സ്യബന്ധനത്തിന് പോകാന് പാടില്ലെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. 28ന് കേരള-കര്ണാടക തീരത്ത് മണിക്കൂറില് 40 മുതല് 45 കിലോമീറ്റര് വരെ വേഗതയില് കാറ്റ് വീശിയടിക്കാനാണ് സാധ്യത. 27ന് ലക്ഷദ്വീപ് പ്രദേശത്ത് മണിക്കൂരില് 40 മുതല് 45 വരെ വേഗതയില് കാറ്റുവീശാനും സാധ്യതയുണ്ട്. ഇവിടങ്ങളിലൊന്നും മത്സ്യബന്ധനത്തിന് പോകരുതെന്നും മുന്നറിയിപ്പുണ്ട്.
ഗള്ഫ് ഓഫ് മാന്നാര്, തെക്കന് തമിഴ്നാട് തീരം, അതിനോട് ചേര്ന്ന കന്യാകുമാരി തീരം, ശ്രീലങ്കന് തീരത്തിന്റെ തെക്ക് പടിഞ്ഞാറന് ബംഗാള് ഉള്ക്കടലിലും, അതിനോട് ചേര്ന്ന തെക്ക് കിഴക്കന് ബംഗാള് ഉള്ക്കടല് എന്നിവിടങ്ങളിലും മണിക്കൂറില് 40 മുതല് 45 കിലോമീറ്റര് വരെ വേഗത്തില് കാറ്റുവീശാം. ഇത് 55 കിലോമീറ്റര് വേഗം വരെയായി ഉയരാമെന്നുമാണ് മുന്നറിയിപ്പ്.
Click it and Unblock the Notifications
Sign in with Google