ബുധനാഴ്ചയും അവധി പ്രഖ്യാപിച്ചു; ഏതൊക്കെ ജില്ലകള്, താലൂക്കുകള്, അറിയേണ്ടതെല്ലാം
ആലപ്പുഴ: കുട്ടനാട് താലൂക്കിലെ സ്കൂളുകള്ക്കും പ്രൊഫഷണല് കോളേജുകള്ക്കും അവധി പ്രഖ്യാപിച്ച് ജില്ലാ കളക്ടര് ഉത്തരവിറക്കി. ഇതോടൊപ്പം ട്യൂഷന് സെന്ററുകള്ക്കും അങ്കണവാടികള്ക്കും ഉള്പ്പെടെ വിദ്യാഭ്യാസവുമായി ബന്ധപ്പെട്ട സ്ഥാപനങ്ങള്ക്കും അവധി പ്രഖ്യാപിച്ചിട്ടുണ്ട്. ജില്ലയിലെ ദുരിതാശ്വാസ ക്യാമ്പുകള് പ്രവര്ത്തിക്കുന്ന വിദ്യാഭ്യാസസ്ഥാപനങ്ങള്ക്കും അവധി പ്രഖ്യാപിച്ചിട്ടുണ്ട്.
എന്നാല് മുന് നിശ്ചയിച്ച പ്രകാരമുള്ള പരീക്ഷകള്ക്ക് മാറ്റമുണ്ടായിരിക്കുന്നതല്ല. കോട്ടയം ജില്ലയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും കളക്ടര് അവധി പ്രഖ്യാപിച്ചിട്ടുണ്ട്.
കുട്ടനാട് താലൂക്കില് വിവിധ പാടശേഖരങ്ങളില് നിലവില് ഏകദേശം പൂര്ണ്ണമായും വെളളക്കെട്ട് നിലനില്ക്കുന്ന സാഹചര്യത്തിലും താലൂക്കിലെ മിക്ക സ്കൂളുകള്ക്ക് ഇന്നും കളക്ടര് അവധി പ്രഖ്യാപിച്ചിരുന്നു. അതേസമയം, കുട്ടനാടന് മേഖലയില് ജലനിരപ്പ് ഉയരുന്ന സാഹചര്യത്തില് അടിയന്തിര സാഹചര്യം നേരിടുന്നതിനായി ആരോഗ്യ വകുപ്പിന്റെ നേതൃത്വത്തില് 24 മണിക്കൂറും പ്രവര്ത്തിക്കുന്ന വാട്ടര് ആംബുലന്സ് പ്രവര്ത്തനം ആരംഭിച്ചിരുന്നു.
ആംബുലന്സിന് പുറമേ മൂന്ന് മൊബൈല് ഫ്ളോട്ടിംഗ് ഡിസ്പെന്സറികള്, കരയില് സഞ്ചരിക്കുന്ന മൊബൈല് യൂണിറ്റ് എന്നിവയും പ്രവര്ത്തനം ആരംഭിച്ചു. കുട്ടനാടന് മേഖലയിലുള്ളവര്ക്ക് 24 മണിക്കൂറും ഈ ആംബുലന്സിന്റെ സേവനം ലഭ്യമാണ്. ജലനിരപ്പ് ഉയര്ന്നതോടെ വാഹനം എത്താത്ത പ്രദേശങ്ങളിലെ വീടുകളില് നിന്നുള്പ്പടെയുള്ള രോഗികളെ വാട്ടര് ആംബുലന്സില് കയറ്റി കരയ്ക്കെത്തിച്ച് ആശുപത്രിയിലേക്ക് മാറ്റുന്ന രീതിയിലാണ് ഈ സംവിധാനം. ഓക്സിജന് ഉള്പ്പടെയുള്ള സേവനവും വാട്ടര് ആംബുലന്സില് ലഭ്യമാക്കിയിട്ടുണ്ട്.
Click it and Unblock the Notifications
Sign in with Google