കേരളത്തില് ഇന്നും മഴ കനക്കും; മൂന്ന് ജില്ലകളില് ഓറഞ്ച് അലര്ട്ട്, മൂന്നിടത്ത് യെല്ലോ അലര്ട്ട്
തിരുവനന്തപുരം: സംസ്ഥാനത്ത് ഇന്നും അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. മൂന്ന് ജില്ലകളില് യെല്ലോ അലര്ട്ടും മൂന്ന് ജില്ലകളില് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്. പത്തനംതിട്ട, ഇടുക്കി, മലപ്പുറം ജില്ലകളില് ആണ് ഇന്ന് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്. ആലപ്പുഴ, എറണാകുളം, പാലക്കാട് ജില്ലകളില് യെല്ലോ അലര്ട്ട് ആണ്.
മുന്നറിയിപ്പ് പ്രഖ്യാപിച്ചിരിക്കുന്ന ജില്ലകളില് ഇടിയോട് കൂടിയ മഴയ്ക്കാണ് സാധ്യത എന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇടി മിന്നല് ജാഗ്രത കര്ശനമായി പാലിക്കണം എന്നും അധികൃതര് പറഞ്ഞു. അതേസമയം കേരളാ തീരത്ത് മത്സ്യബന്ധനത്തിന് വിലക്കേര്പ്പെടുത്തിയിട്ടില്ല. തെക്കന് തമിഴ്നാട് തീരത്ത് രൂപപ്പെട്ട ചക്രവാതച്ചുഴിയുടേയും ബംഗാള് ഉള്ക്കടലില് നിന്നുള്ള കാറ്റിന്റേയും സ്വാധീനഫലമായാണ് തുലാവര്ഷം ശക്തമാകുന്നത്.
അതിനിടെ എറണാകുളം ജില്ലയുടെ വിവിധ മേഖലകളില് ഇന്നലെയും കനത്ത മഴയാണ് പെയ്തത്. കാലടി നീലേശ്വരത്ത് ആറ് മണിക്കൂറില് 16 സെന്റീമീറ്റര് മഴയാണ് പെയ്തത് എന്നാണ് റിപ്പോര്ട്ട്. അടുത്ത രണ്ട് ദിവസം കൂടി എറണാകുളത്ത് യെല്ലോ അലര്ട്ടാണ് പ്രഖ്യാപിച്ചിരിക്കുന്നത്. നവംബര് ഏഴ് വരെ സംസ്ഥാനത്ത് ഇടിമിന്നല് ജാഗ്രതാ നിര്ദേശവും പുറപ്പെടുവിച്ചിരിക്കുകയാണ്.
നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, വയനാട് ജില്ലകളില് യെല്ലോ അലര്ട്ടാണ്. ചൊവ്വാഴ്ച എറണാകുളം ജില്ലയിലാണ് യെല്ലോ അലര്ട്ടുള്ളത്. തെക്ക് തമിഴ്നാടിനും സമീപപ്രദേശത്തിനും മുകളിലായി നില്ക്കുന്ന ചക്രവാതച്ചുഴി വരും ദിവസങ്ങളില് ശക്തിപ്രാപിച്ച് മധ്യ- കിഴക്കന് അറബിക്കടലിന് മുകളില് നവംബര് എട്ടിന് ന്യൂനമര്ദ്ദം ആയി മാറാന് സാധ്യതയുണ്ട്.
ബംഗാള് ഉള്ക്കടലില് നിന്നും വീശുന്ന കിഴക്കന് കാറ്റിന്റെ സ്വാധീനഫലമായി കേരളത്തില് അടുത്ത ഏഴ് ദിവസം വ്യാപകമായ മഴ ലഭിക്കാനിടയുണ്ട് എന്നും കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു. എട്ടാം തിയതി വരെ കേരളത്തില് ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും ഇന്ന് ഒറ്റപ്പെട്ട സ്ഥലങ്ങളില് അതിശക്തമായ മഴയ്ക്കും സാധ്യതയുണ്ട് എന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. പലയിടത്തും രാവിലെ മുതല് തന്നെ മഴ ലഭിക്കും എന്നാണ് പ്രവചനം. ഇടി മിന്നലിനൊപ്പം കടലാക്രമണത്തിനും സാധ്യതയുണ്ട്.
Click it and Unblock the Notifications
Sign in with Google