സംസ്ഥാനത്ത് ശക്തമായ മഴ തുടരുന്നു; എറണാകുളത്ത് റെഡ് അലര്ട്ട്, 11 ജില്ലകളില് യെല്ലോ അലര്ട്ട്
തിരുവനന്തപുരം: സംസ്ഥാനത്ത് മഴ ശക്തമാകുന്നു. എറണാകുളം ജില്ലയില് റെഡ് അലര്ട്ട് പ്രഖ്യാപിച്ചു.ഈ വര്ഷം ആദ്യമായാണ് ഒരു ജില്ലയില് റെഡ് അലര്ട്ട് പ്രഖ്യാപിക്കുന്നത്. റെഡ് അലര്ട്ടിന് സമാനമായ രീതിയിലുള്ള മുന്നറിയിപ്പ് ജില്ലയില് സ്വീകരിക്കണമെന്ന നിര്ദ്ദേശം നല്കിയിട്ടുണ്ട്.
പത്തനംതിട്ട, ആലപ്പുഴ, കോട്ടയം, ഇടുക്കി, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് എന്നീ ജില്ലകളില് ഓറഞ്ച് അലര്ട്ട് പ്രഖ്യാപിച്ചു. തിരുവനന്തപുരം, കൊല്ലം എന്നീ ജില്ലകളില് യെല്ലോ അലര്ട്ടാണ്.
ഒറ്റപ്പെട്ടയിടങ്ങളില് അതിതീവ്രമായ മഴക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില് 204.4 എം എംല് കൂടുതല് മഴ ലഭിക്കുമെന്നാണ് അതിതീവ്രമായ മഴ എന്നത് കൊണ്ട് കാലാവസ്ഥ വകുപ്പ് അര്ത്ഥമാക്കുന്നത്. ഇന്നലെ രാത്രി മുതല് സംസ്ഥാനത്തിന്റെ വിവിധ ഭാഗങ്ങളില് ശക്തമായ മഴ പെയ്യുന്നുണ്ട്. മലയോര മേഖലയില് അതിശക്തമായ മഴയാണ് പെയ്യുന്നത്.
മണ്സൂണ് പാത്തി നിലവില് സാധാരണ സ്ഥാനത്തു നിന്നും തെക്ക് ഭാഗത്തായാണ് സ്ഥിതി ചെയ്യുന്നത്. കൂടാതെ തെക്കന് മഹാരാഷ്ട്ര തീരം മുതല് കേരള തീരം വരെ തീരദേശ ന്യൂനമര്ദ്ദ പാത്തി നിലനില്ക്കുന്നുണ്ട്. പടിഞ്ഞാറന് ബംഗാള് ഉള്ക്കടലിന്റെ മധ്യഭാഗത്തായി ഒരു ചക്രവാതചുഴിയും മറ്റൊരു ചക്രവാതചുഴി ആന്ഡമാന് കടലിന് മുകളിലും സ്ഥിതി ചെയ്യുന്നുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിക്കുന്നു.
ഇതേ തുടര്ന്ന് കേരളത്തില് അടുത്ത 5 ദിവസം ശക്തമായ മഴയ്ക്കും ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും ജൂലായ് 4, 5 തീയതികളില് ചിലയിടങ്ങളില് തീവ്രമായ മഴയ്ക്കും സാധ്യതയുണ്ടെന്ന് കാലാവസ്ഥ വകുപ്പിന്റെ മുന്നറിയിപ്പില് പറയുന്നു. അതിശക്തമായ മഴ ലഭിക്കുന്ന സാഹചര്യത്തില് മണ്ണിടിച്ചിലും മലവെള്ളപ്പാച്ചിലും ഉണ്ടാവാനുള്ള സാധ്യതയുമുണ്ട്. പൊതുജനങ്ങള് ജാഗ്രത പാലിക്കാനും നിർദ്ദേശമുണ്ട്.
ഓറഞ്ച് അലർട്ട് പ്രഖ്യാപിച്ച ജില്ലകൾ
03-07-2023 : പത്തനംതിട്ട, ആലപ്പുഴ, കോട്ടയം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്
04-07-2023 : പത്തനംതിട്ട, ആലപ്പുഴ, കോട്ടയം, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കാസറഗോഡ്
05-07-2023 : പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്
06-07-2023 : മലപ്പുറം, കോഴിക്കോട്, കണ്ണൂർ, കാസറഗോഡ്
മഞ്ഞ അലർട്ട് പ്രഖ്യാപിച്ച ജില്ലകൾ
03-07-2023 : തിരുവനന്തപുരം, കൊല്ലം
04-07-2023 : തിരുവനന്തപുരം, കൊല്ലം
05-07-2023 : കൊല്ലം
06-07-2023 : ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, വയനാട്
07-07-2023 : കോഴിക്കോട്, വയനാട്, കണ്ണൂർ, കാസറഗോഡ്
Click it and Unblock the Notifications
Sign in with Google