സംസ്ഥാനത്ത് ഇന്ന് അതിതീവ്ര മഴയ്ക്ക് സാധ്യത; 5 ജില്ലകളില് റെഡ് അലര്ട്ട്, ജാഗ്രതാ നിര്ദ്ദേശം
തിരുവനന്തപുരം: സംസ്ഥാനത്ത് ഇന്ന് അതിതീവ്ര മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ഈ സാഹചര്യത്തില് അഞ്ച് ജില്ലകളില് റെഡ് അലര്ട്ട് പ്രഖ്യാപിച്ചു. എറണാകുളം, ഇടുക്കി, തൃശൂര്, കോഴിക്കോട്, കണ്ണൂര് എന്നീ ജില്ലകളിലാണ് ഇപ്പോള് റെഡ് അലര്ട്ട് പ്രഖ്യാപിച്ചിരിക്കുന്നത്. വലിയ അപകടങ്ങള്ക്ക് സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രം അറിയിക്കുന്നത്.
ഏഴ് ജില്ലകളില് തീവ്ര മഴയ്ക്ക് സാധ്യതയുള്ളതിനാല് ഓറഞ്ച് അലര്ട്ടാണ് പ്രഖ്യാപിച്ചിരിക്കുന്നത്. കൊല്ലം, പത്തനംതിട്ട, കോട്ടയം, ആലപ്പുഴ, മലപ്പുറം, വയനാട്, കാസര്ഗോഡ് ജില്ലകളിലാണ് ഓറഞ്ച് അലേര്ട്ട് പ്രഖ്യാപിച്ചിരിക്കുന്നത്. തിരുവനന്തപുരം, പാലക്കാട് ജില്ലകളില് യെല്ലോ അലേര്ട്ടും നിലനില്ക്കുന്നുണ്ട്. മഴയ്ക്കൊപ്പം കാറ്റിനും സാധ്യതയുള്ളതിനാല് മത്സ്യത്തൊഴിലാളികള്ക്കും ജാഗ്രതാ നിര്ദേശം പുറപ്പെടുവിച്ചിചട്ടുണ്ട്.
അതേസമയം, മഴയുടെ പശ്ചാത്തലത്തില് ഓരോ ജില്ലകളിലും ജില്ലാ ഭരണകൂടം സ്ഥിതിഗതികള് വിലയിരുത്തുന്നുണ്ട്. തൃശൂര് ജില്ലയില് റെഡ് അലേര്ട്ട് സാഹചര്യത്തില് വിവിധ വകുപ്പ് മേധാവികളുടെയും തഹസില്ദാര്മാരുടെയും അടിയന്തര യോഗം ചേര്ന്ന് സ്ഥിതിഗതികള് വിലയിരുത്തി. ജില്ലാ പഞ്ചായത്ത് പ്രസിഡന്റ് പി കെ ഡേവിസ് മാസ്റ്റര്, ജില്ലാ കലക്ടര് ഹരിത വി കുമാര് എന്നിവരുടെ നേതൃത്വത്തില് നടന്ന ഓണ്ലൈന് യോഗത്തില് മഴ തുടര്ന്നാല് വിവിധ വകുപ്പുകള് സ്വീകരിക്കേണ്ട പ്രവര്ത്തനങ്ങളെക്കുറിച്ച് ചര്ച്ചചെയ്തു.
കാലാവസ്ഥാ മുന്നറിയിപ്പുകള് ഗൗരവത്തോടെ നിരീക്ഷിക്കുകയും അധികൃതരുടെ നിര്ദേശങ്ങള് അനുസരിക്കുകയും ചെയ്യണം. ആവശ്യപ്പെടുന്ന സമയത്ത് ക്യാമ്പുകളിലേക്ക് മാറാന് തയ്യാറാവണമെന്ന് മുഖ്യമന്ത്രി പിണറായി വിജയന് അറിയിച്ചു. ശബരി മലയിലെ മാസപൂജക്കായി ദര്ശനത്തിന് എത്തുന്നവര് മഴ മുന്നറിയിപ്പ് കൂടി പരിശോധിച്ച് ആവശ്യമായ ജാഗ്രതയോടെ ആയിരിക്കണം ദര്ശനത്തിന് എത്തുന്നത്. രാത്രി യാത്രകളും ജലാശയങ്ങളില് ഇറങ്ങുന്നതും ഒഴിവാക്കണം.
മലയോര മേഖലകളിലേക്കുള്ള അത്യാവശ്യമല്ലാത്ത എല്ലാ യാത്രകളും മഴ മുന്നറിയിപ്പ് മാറുന്നത് വരെ ഒഴിവാക്കുക. വിനോദ സഞ്ചാരികള് രാത്രി യാത്രകള് ഒഴിവാക്കുകയും പരമാവധി താമസ സ്ഥലത്തു തുടരുകയും ചെയ്യണം. ടൂറിസം വകുപ്പിന്റെയും ജില്ലാ ഭരണകൂടത്തിന്റെയും നിര്ദേശങ്ങള് കര്ശനമായി പാലിക്കണം. സുരക്ഷാ സജ്ജീകരണങ്ങളില്ലാത്തതും അനുമതി ഇല്ലാത്തതുമായ ഒരു സ്ഥലത്തും പോകാന് പാടുള്ളതല്ല .
Click it and Unblock the Notifications
Sign in with Google