സംസ്ഥാനത്ത് ഇന്നും കനത്ത മഴയ്ക്ക് സാധ്യത; ജാഗ്രത പാലിക്കാന് നിര്ദ്ദേശം, ശബരിമല ദര്ശനത്തിന് നിയന്ത്രണം
തിരുവനന്തപുരം: സംസ്ഥാനത്ത് ഇന്നും ശക്തമായ മഴ തുടരുമെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. യെല്ലോ, ഓറഞ്ച്, റെഡ് അലര്ട്ടുകള് പ്രഖ്യാപിച്ചില്ലെങ്കിലും ജാഗ്രത തുടരണമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. തമിഴ്നാടിന് മുകളിലായുള്ള ന്യൂനമര്ദ്ദത്തിന്റെ പ്രഭാവത്തില് ഒറ്റപ്പെട്ട ശക്തമായ മഴ തുടരാനാണ് സാധ്യത. വടക്കന് ജില്ലകളില് കൂടുതല് മഴ ലഭിക്കാന് സാധ്യതയുണ്ട്. ഒപ്പം മലയോര മേഖലകളിലും ശക്തമായ മഴ ലഭിച്ചേക്കും. ശക്തമായ ഇടിമിന്നലിനും കാറ്റിനും സാധ്യതയുണ്ട്.
Recommended Video
അതേസമയം, കനത്ത മഴയില് ജലനിരപ്പ് ഉയര്ന്ന പശ്ചാത്തലത്തില് മുല്ലപ്പെരിയാര് ഡാമിന്റെ വി 3, വി 4 ഷറ്ററുകള് 30 സെമി വീതം രാവിലെ 6 മണിക്ക് ഉയര്ത്തി. ഇടുക്കി അണക്കെട്ടിലും ജലനിരപ്പ് ഉയരുന്നുണ്ട്. അതേസമയം, പമ്പാ അണക്കെട്ടില് ജലനിരപ്പ് ഉയര്ന്ന പശ്ചാത്തലത്തില് റെഡ് അലര്ട്ട് പ്രഖ്യാപിച്ചിരിക്കുകയാണ്. ഡാമിന്റെ വൃഷ്ടിപ്രദേശത്ത് മഴ തുടരുന്നതിനാലും ഡാമിലേക്കുള്ള നീരൊഴുക്ക് ശക്തമായതിനാലും കാലാവസ്ഥ പ്രവചനം പ്രകാരം വൃഷ്ടി പ്രദേശത്ത് മഴ തുടരുമെന്നതിനാലും റെഡ് അലര്ട്ട് പ്രഖ്യാപിച്ചിരിക്കുകയാണ്. ഈ സാഹചര്യത്തില് പമ്പാ നദിയുടെയും കക്കാട്ടാറിന്റെ ഇരുകരകളില് താമസിക്കുന്നവരും പൊതുജനങ്ങളും ജാഗ്രത പുലര്ത്തണമെന്ന് ജില്ലാ കളക്ടര് ഡോ. ദിവ്യ എസ്. അയ്യര് അറിയിച്ചു.
ഷട്ടറുകള് ഉയര്ത്തുന്നത് മൂലം പമ്പയാറിലും കക്കാട്ടാറിലും ജലനിരപ്പ് ഉയര്ന്നേക്കാമെന്നുള്ള സാഹചര്യത്തില് നദികളുടെ തീരത്ത് താമസിക്കുന്ന ആളുകളും പൊതുജനങ്ങളും ജാഗ്രതാ പുലര്ത്തേണ്ടതും, ശബരിമല തീര്ഥാടകര് ഉള്പ്പെടെയുള്ളവര് നദികളില് ഇറങ്ങുന്നത് ഏതു സാഹചര്യത്തിലും ഒഴിവാക്കണം. താഴ്ന്ന പ്രദേശങ്ങളില് നിന്നും ജനങ്ങള് പൂര്ണ്ണമായും സുരക്ഷിത സ്ഥാനങ്ങളിലേക്ക് മാറണമെന്നും ജില്ലാ കളക്ടര് അറിയിച്ചു.
അതേസമയം, മഴ കനത്ത സാഹചര്യത്തില് ശബരിമല തീര്ത്ഥാടനം താല്ക്കാലികമായി നിര്ത്തിവച്ചിരിക്കുകയാണ്. പത്തനംതിട്ട ജില്ലയില് ലഭിച്ചുകൊണ്ടിരിക്കുന്ന കനത്ത മഴയുടെ സാഹചര്യത്തില് പമ്പാ നദിയിലെ ജലനിരപ്പ് ഉയര്ന്നിരിക്കുകയാണ് എന്നതും, കക്കി ഡാം തുറന്നിട്ടുള്ളതും പമ്പാ ഡാമില് റെഡ് അലര്ട്ട് പ്രഖ്യാപിച്ചിട്ടുള്ളതും കണക്കിലെടുത്തുകൊണ്ട് ഭക്തരുടെ സുരക്ഷിതത്വം ഉറപ്പു വരുത്തുന്നതിലേക്കായി ഇന്ന് പമ്പയിലേക്കും ശബരിമലയിലേക്കുമുള്ള തീര്ഥാടകരുടെ യാത്ര നിരോധിച്ചിട്ടുള്ളതായി അറിയിക്കുന്നു.
ജലനിരപ്പ് കുറയുന്ന മുറക്ക് ഏറ്റവും അടുത്ത അവസരത്തില് തന്നെ വെര്ച്വല് ക്യൂ മുഖേനെ ബുക്ക് ചെയ്ത എല്ലാ ഭക്തര്ക്കും ദര്ശനത്തൊനുള്ള സൗകര്യം ഒരുക്കുന്നതായിരിക്കും. അവരവരുടെ ഇടങ്ങളില് നിന്നുമുള്ള യാത്ര നാളെ ഒഴിവാക്കിക്കൊണ്ട് തീര്ത്ഥാടകര് സഹകരിക്കണമെന്ന് കളക്ടര് അഭ്യര്ത്ഥിച്ചു.
Click it and Unblock the Notifications
Sign in with Google