ബംഗാള് ഉള്ക്കടലില് രൂപംകൊണ്ട ന്യൂനമര്ദ്ദം ശക്തിപ്രാപിച്ചു; കേരളത്തില് രണ്ട് ദിവസം മഴ
തിരുവനന്തപുരം: ബംഗാള് ഉള്ക്കടലില് രൂപംകൊണ്ട ന്യൂനമര്ദ്ദം അതി തീവ്ര ന്യൂനമര്ദ്ദമായി ശക്തി പ്രാപിച്ചെന്ന് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പ്. തെക്ക് പടിഞ്ഞാറന് ബംഗാള് ഉള്ക്കടലിലാണ് തീവ്ര ന്യൂനമര്ദ്ദം ശക്തി പ്രാപിച്ച് അതിതീവ്ര ന്യൂന മര്ദ്ദമായി മാറിയത്. ഈ സാഹചര്യത്തില് കേരളത്തില് മാര്ച്ച് 7, 8 തീയതികളില് ഒറ്റപ്പെട്ട മഴക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്.
ട്രിങ്കോമലിക്ക് 220 കി മി വടക്ക് കിഴക്കായും നാഗപ്പട്ടണത്തിന് 320 കി മി കിഴക്ക് - തെക്ക് കിഴക്കായും പുതുച്ചേരിയില് നിന്ന് 380 കി മി കിഴക്ക് - തെക്ക് കിഴക്കായും ചെന്നൈയില് നിന്ന് 420 കി മി തെക്ക് - തെക്ക് കിഴക്കായുമാണ് ന്യൂനമര്ദ്ദം സ്ഥിതി ചെയ്യുന്നത്. നാളെ രാവിലെ ( മാര്ച്ച് 5) വരെ വടക്ക് പടിഞ്ഞാറു ദിശയില് ശ്രീലങ്കയുടെ കിഴക്കന് തീരത്തിലൂടെ സഞ്ചരിക്കുന്ന അതി തീവ്ര ന്യുന മര്ദ്ദം തുടര്ന്നുള്ള 36 മണിക്കൂറില് പടിഞ്ഞാറു - വടക്ക് പടിഞ്ഞാറു ദിശയില് സഞ്ചരിച്ചു തമിഴ് നാടിന്റെ വടക്കന് തീരത്തേക്ക് നീങ്ങാന് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു. ഇതോടെ കേരളത്തില് മാര്ച്ച് 7,8 തീയതികളില് ഒറ്റപ്പെട്ട മഴക്ക് സാധ്യതയെന്നാണ് കാലാവസ്ഥ നിരീക്ഷണ കേന്ദ്രം അറിയിക്കുന്നത്.
മത്സ്യത്തൊഴിലാളികള്ക്കുള്ള പ്രത്യേക ജാഗ്രതാ നിര്ദ്ദേശം
കേരള - കര്ണാടക - ലക്ഷദ്വീപ് തീരങ്ങളില് മത്സ്യബന്ധനത്തിന് തടസ്സമില്ല എന്ന് കേന്ദ്ര കാലാവസ്ഥ വകുപ്പ് അറിയിച്ചു.
04-03-2022 & 05032022: തെക്ക് പടിഞ്ഞാറന് ബംഗാള് ഉള്ക്കടല് അതിനോട് ചേര്ന്നുള്ള മധ്യ പടിഞ്ഞാറന് ബംഗാള് ഉള്ക്കടല്, ഗള്ഫ് ഓഫ് മാന്നാര്, വടക്കന് തമിഴ്നാട് തീരം, പുതുച്ചേരി, തെക്കന് ആന്ധ്രപ്രദേശ് തീരം എന്നിവിടങ്ങളില് മണിക്കൂറില് 45-55 കിലോമീറ്റര് വരെ വേഗതയിലും ചില അവസരങ്ങളില് 65 കിലോമീറ്റര് വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
06-03-2022: തെക്ക് പടിഞ്ഞാറന് ബംഗാള് ഉള്ക്കടല് അതിനോട് ചേര്ന്നുള്ള മധ്യ പടിഞ്ഞാറന് ബംഗാള് ഉള്ക്കടല്, വടക്കന് തമിഴ്നാട് തീരം, പുതുച്ചേരി, തെക്കന് ആന്ധ്രപ്രദേശ് തീരം എന്നിവിടങ്ങളില് മണിക്കൂറില് 40-50 കിലോമീറ്റര് വേഗത്തിലും ചില അവസരങ്ങളില് 60 കിലോമീറ്റര് വേഗത്തിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത. മേല്പ്പറഞ്ഞ തീയതികളില് മേല്പ്പറഞ്ഞ പ്രദേശങ്ങളില് മല്സ്യബന്ധനത്തിന് പോകാന് പാടുള്ളതല്ല.
Click it and Unblock the Notifications
Sign in with Google