മന്ദൗസ് ചുഴലിക്കാറ്റ്: കേരളത്തില് ഇടിമിന്നലോട് കൂടിയ മഴ, ഈ ജില്ലകളില് യെല്ലോ അലര്ട്ട്
തിരുവനന്തപുരം: മന്ദൗസ് ചുഴലിക്കാറ്റിന്റെ പശ്ചാത്തലത്തില് സംസ്ഥാനത്ത് ഇടിമിന്നലോട് കൂടിയ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. തെക്കന് ജില്ലകളില് ശനിയാഴ്ച രാത്രി മുതല് പെയ്യുന്ന മഴയില് കനത്ത പലയിടത്തും വെള്ളക്കെട്ട് രൂപപ്പെട്ടിട്ടുണ്ട്. മഴ തുടരുന്ന സാഹചര്യത്തില് അഞ്ച് ജില്ലകളില് യെല്ലോ അലര്ച്ച് പ്രഖ്യാപിച്ചിട്ടുണ്ട്. ഇടുക്കി, എറണാകുളം, തൃശൂര്, പാലക്കാട്, മലപ്പുറം ജില്ലകളിലാണ് യെല്ലോ അലര്ട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയാണ് പ്രവചിച്ചിരിക്കുന്നത്.
11-12-2022 : എറണാകുളം, ഇടുക്കി, തൃശൂര്, പാലക്കാട്, മലപ്പുറം.
12-12-2022 : എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസറഗോഡ്.
13-12-2022: എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസറഗോഡ്.
എന്നീ ജില്ലകളിലാണ് മഞ്ഞ അലേര്ട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്.
അതേസമയം, മത്സ്യത്തൊഴിലാളികള്ക്കും ജാഗ്രത നിര്ദ്ദേശം പുറപ്പെടുവിച്ചിട്ടുണ്ട്. കേരള -കര്ണാടക- ലക്ഷദ്വീപ് തീരങ്ങളില് മത്സ്യബന്ധനത്തിന് ഡിസംബര് 12 നും ഡിസംബര് 13 നും പോകാന് പാടില്ല എന്ന് കേന്ദ്ര കാലാവസ്ഥ വകുപ്പ് അറിയിച്ചു.
കേരള -കര്ണാടക- ലക്ഷദ്വീപ് തീരങ്ങളില് ഡിസംബര് 12 നും ഡിസംബര് 13 നും മണിക്കൂറില് 40 മുതല് 45 കിലോമീറ്റര് വരെ വേഗതയിലും ചില അവസരങ്ങളില് മണിക്കൂറില് 55 കിലോമീറ്റര് വരെ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത.
പ്രത്യേക ജാഗ്രത നിര്ദ്ദേശങ്ങള്
10-12-2022: വടക്കന് തമിഴ്നാട്- പുതുച്ചേരി തീരം, അതിനോട് ചേര്ന്നുള്ള തെക്ക്-പടിഞ്ഞാറന് ബംഗാള് ഉള്ക്കടല്, തെക്കന് ആന്ധ്രപ്രദേശ് തീരം, അതിനോട് ചേര്ന്നുള്ള മധ്യ-പടിഞ്ഞാറന് ബംഗാള് ഉള്ക്കടല് എന്നിവിടങ്ങളില് മണിക്കൂറില് 50 മുതല് 60 കിലോമീറ്റര് വരെ വേഗതയിലും ചില അവസരങ്ങളില് മണിക്കൂറില് 70 കിലോമീറ്റര് വരെ വേഗതയിലും ശക്തമായ കാറ്റിന് സാധ്യത.
12-12-2022 നും 13-12-2022 നും: തെക്ക്-കിഴക്കന്, മധ്യ-കിഴക്കന് അറബിക്കടല്, കേരള-കര്ണാടക തീരം, ലക്ഷദ്വീപ് തീരം എന്നിവിടങ്ങളില് മണിക്കൂറില് 40 മുതല് 45 കിലോമീറ്റര് വരെ വേഗതയിലും ചില അവസരങ്ങളില് മണിക്കൂറില് 55 കിലോമീറ്റര് വരെ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത.
14-12-2022: തെക്ക്-കിഴക്കന് അറബിക്കടല്, അതിനോട് ചേര്ന്നുള്ള മധ്യ-കിഴക്കന് അറബിക്കടല് എന്നിവിടങ്ങളില് മണിക്കൂറില് 40 മുതല് 45 കിലോമീറ്റര് വരെ വേഗതയിലും ചില അവസരങ്ങളില് മണിക്കൂറില് 55 കിലോമീറ്റര് വരെ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത. മേല്പ്പറഞ്ഞ പ്രദേശങ്ങളില് മുന്നറിയിപ്പുള്ള തീയതികളില് മല്സ്യബന്ധനത്തിന് പോകാന് പാടുള്ളതല്ല.
അതേസമയം, ചുഴലിക്കാറ്റിന്റെ പശ്ചാത്തലത്തില് തമിഴ്നാട്ടില് കനത്ത മഴയാണ് ലഭിക്കുന്നത്. മഴയെ തുടര്ന്നുണ്ടായ അനിഷ്ട സംഭവങ്ങളില് അഞ്ചോളം പേര്ക്ക് ജീവന് നഷ്ടപ്പെട്ടിട്ടുണ്ട്. 12 വരെ തമിഴ്നാട്ടില് മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രം അറിയിക്കുന്നത്. അടുത്ത 48 മണിക്കൂറിനുള്ളില് ചെന്നൈയിലും സംസ്ഥാനത്തിന്റെ മറ്റ് ഭാഗങ്ങളിലും ഇടിമിന്നലുണ്ടാകുമെന്നും ഡിസംബര് 12 മുതല് മഴ ക്രമേണ കുറയാന് സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം അറിയിക്കുന്നു. ചെന്നൈയില് നിന്ന് 55 കിലോമീറ്റര് അകലെ മാമല്ലപുരത്തിന് സമീപം ശനിയാഴ്ച പുലര്ച്ചെയാണ് മന്ദൗസ് ചുഴലിക്കാറ്റ് തീരം തൊട്ടത്.
Click it and Unblock the Notifications
Sign in with Google