സിക്ക വൈറസ് പരിശോധനയ്ക്ക് കേരളം സജ്ജം: 2100 പരിശോധനാ കിറ്റുകളെത്തിയെന്ന് ആരോഗ്യമന്ത്രി

തിരുവനന്തപുരം: തലസ്ഥാനത്ത് സിക്ക വൈറസ് കേസുകൾ വർധിച്ച് വരുന്ന സാഹചര്യത്തിൽ സംസ്ഥാനത്ത് പരിശോധന നടത്താൻ സുസജ്ജമാണെന്ന് ആരോഗ്യവകുപ്പ് മന്ത്രി വീണാ ജോർജ്. തിരുവനന്തപുരം, തൃശ്ശൂർ, കോഴിക്കോട് മെഡിക്കൽ കോളേജുകൾ, ആലപ്പുഴയിലെ എൻഐവി യൂണിറ്റ് എന്നിവിടങ്ങകൾ കേന്ദ്രീകരിച്ചാണ് ആദ്യഘട്ടത്തിൽ സിക്ക വൈറസ് പരിശോധന നടത്തുന്നത്. ഇതിനായി എൻഐവി പൂനെയിൽ നിന്ന് പരിശോധന നടത്താൻ സാധിക്കുന്ന 2100 പിസിആർ കിറ്റുകൾ പൂനെയിൽ നിന്ന് കേരളത്തിലേക്ക് എത്തിച്ചിട്ടുണ്ട്.

സിക്ക വൈറസ് കേസുകൾ റിപ്പോർട്ട് ചെയ്ത തിരുവനന്തപുരത്ത് 1000, തൃശ്ശൂർ 300, കോഴിക്കോട് 300, ആലപ്പുഴ എന്നീ ക്രമത്തിലാണ് കിറ്റുകൾ ലഭിച്ചിട്ടുള്ളത്. അതേ സമയം തിരുവനന്തപുരം മെഡിക്കൽ കോളേജിന് ചിക്കൻഗുനിയ, സിക്ക, ഡെങ്കിപ്പനി എന്നീ രോഗങ്ങൾ തിരിച്ചറിയുന്നതിനുള്ള 500 ട്രയോ പ്ലക്സ് കിറ്റുകളും സിക്ക വൈറസ് പരിശോധനയ്ക്കുള്ള 500 സിംഗിൾ പ്ലക്സ് കിറ്റുകളുമാണ് ലഭിച്ചിട്ടുള്ളത്. അതേ സമയം മറ്റ് മൂന്ന് ആശുപത്രികളിലും സിംഗിൾ പ്ലക്സ് കിറ്റുകളാണ് ലഭിച്ചിട്ടുള്ളത്.

രക്തം, മൂത്രം എന്നിവ ശേഖരിച്ചാണ് സിക്ക വൈറസ് പരിശോധന നടത്തുന്നത്. അതേ സമയം രക്തസാമ്പിളുകളിലൂടെ പരിശോധന നടത്താനാണ് പൂനെ എൻഐവി നിർദേശിച്ചിട്ടുള്ളത്. നിലവിൽ ആർടിപിസിആർ പരിശോധന നടത്താൻ കഴിയുന്ന ലാബുകളാണുള്ളത്. എന്നാൽ കൊവിഡ് വ്യാപനത്തോടെ സംസ്ഥാനത്ത് സർക്കാർ ലാബുകളും പ്രവർത്തനം ആരംഭിച്ചിരുന്നു. എന്നാൽ പരിശോധനാ കിറ്റുകൾ ലഭിക്കുന്നതിന് അനുസരിച്ച് പരിശോധന വ്യാപിപ്പിക്കാനാണ് നീക്കം. ഇതിനായി ഐൻഐവിയുടെ അനുമതിയും തേടും.

സിക്ക വൈറസ് കേസുകൾ റിപ്പോർട്ട് ചെയ്ത സാഹചര്യത്തിൽ രോഗപ്രതിരോധവും ശക്തമാക്കിയിട്ടുണ്ട്. പനി, ചുവന്ന പാടുകൾ, ശരീരവേദന എന്നീ ലക്ഷണങ്ങളുള്ളവരെയാണ് പരിശോധിക്കുക. ആശുപത്രികളിൽ ഇത്തരം രോഗലക്ഷണങ്ങളുമായി എത്തുന്നവരെയും ഗർഭിണികളെയുമാണ് സിക്ക വൈറസ് പരിശോധനയ്ക്ക് വിധേയമാക്കാൻ നിർദേശം നൽകിയിട്ടുണ്ടെന്ന് ആരോഗ്യമന്ത്രി വ്യക്തമാക്കി.

English summary

Kerala sets to conduct widespread Zika virus test says health minister Veena George