'കെ–റെയിൽ ഉദ്യോഗസ്ഥർ എന്തിനാണ് ധൃതി കാണിക്കുന്നത്?, എല്ലാവരും ഇടത് വിരുദ്ധർ അല്ല' - കെ.പ്രകാശ്ബാബു

Updated: Saturday, March 26, 2022, 10:55 [IST]

തിരുവനന്തപുരം: സിൽവർ ലൈൻ പദ്ധതിയിൽ പ്രതികരണവുമായി സിപിഐ സംസ്ഥാന അസിസ്റ്റന്റ് സെക്രട്ടറി കെ.പ്രകാശ്ബാബു. പദ്ധതി കേരളത്തിലെ ജനങ്ങളുടെ ആശങ്കകൾ പരിഹരിച്ച് കൊണ്ട് നടപ്പിലാക്കണമെന്ന് അദ്ദേഹം വ്യക്തമാക്കി.

ഈ പദ്ധതിയെ എതിർക്കുന്ന എല്ലാവരും ഇടത് വിരുദ്ധരും സർക്കാർ വിരുദ്ധരും അല്ല. ചില കാര്യങ്ങൾ തിരുത്താൻ സർക്കാർ തയ്യാറാകണം. കെ-റെയിൽ ഉദ്യോഗസ്ഥർ എന്തിനാണ് ധൃതി കാണിക്കുന്നത്? എന്നും അദ്ദേഹം ചോദിച്ചു.

പദ്ധതിയിൽ ചില ഉദ്യോഗസ്ഥരുടെ തീരുമാനങ്ങൾ ആശങ്ക ഉണ്ടാക്കുന്നതാണ്. പരിസ്ഥിതി വിഷയം, സാമൂഹികാഘാത പഠനം എന്നിവയിൽ സർക്കാരിന്റെ സമീപനം ജനങ്ങളെ ബോധ്യപ്പെടുത്താൻ കഴിയണം. പദ്ധതിയിൽ ജനങ്ങൾക്കുളള ആശങ്കകൾ പരിഹരിച്ചാൽ പ്രതിപക്ഷ നിലപാടിനെ തളളി ജനങ്ങൾ മുന്നോട്ട് വരുമെന്നും അദ്ദേഹം കൂട്ടിചേർത്തു.

കേരളത്തിലെ സിൽവർ ലൈൻ പദ്ധതി ഒരാളെയും ദ്രോഹിച്ച് നടപ്പാക്കില്ലെന്ന് മുഖ്യമന്ത്രി പിണറായി വിജയൻ പറഞ്ഞിരുന്നു. ഇതിന്റെ അർഥം മനസ്സിലാക്കി കൊണ്ട് ഉദ്യോഗസ്ഥർ പെരുമാറാൻ തയ്യാറാകണം പ്രകാശ്ബാബു വ്യക്തമാക്കി.

സില്‍വർ ലൈൻ സമരങ്ങളെ നേരിടാന്‍ സിപിഎം ഒരുങ്ങുകയാണ്. വിഷയത്തിൽ ദേശീയ തലത്തില്‍ പ്രചാരണം നടത്താനാണ് സിപിഎം തീരുമാനം. പാര്‍ട്ടി കോണ്‍ഗ്രസിന് ശേഷം വിപുലമായ ബോധവല്‍കരണ പരിപാടികൾ പദ്ധതിയുടെ ഭാഗമായി നടത്തും. ഡൽഹിയിൽ‌ നടക്കുന്ന സിപിഎം കേന്ദ്രകമ്മിറ്റി യോഗത്തിൽ ഇത് സംബന്ധിച്ച് തീരുമാനം എടുത്തത്.