സംസ്ഥാന ഭാഗ്യക്കുറി വകുപ്പിന്റെ വിഷു ബംപര്‍ ലോട്ടറി നറുക്കെടുപ്പ് ഇന്ന്. ഉച്ചയ്ക്ക് രണ്ട് മണിക്ക് തിരുവനന്തപുരം ഗോര്‍ഖി ഭവനില്‍ വെച്ചാണ് നറുക്കെടുപ്പ്. അച്ചടിച്ച 45 ലക്ഷം ടിക്കറ്റുകളും വിറ്റ് തീര്‍ന്നു എന്ന സവിശേഷതയോടെയാണ് ഇത്തവണ ബംപര്‍ നറുക്കെടുപ്പ് നടക്കാനിരിക്കുന്നത്. 12 കോടി രൂപയാണ് ഒന്നാം സമ്മാനമായി ജേതാവിന്റെ കൈകളില്‍ എത്തുക. രണ്ടാം സമ്മാനം ഒരു കോടി രൂപ വീതം ആറ് പരമ്പരകള്‍ക്ക് ലഭിക്കും.

300 രൂപയാണ് ടിക്കറ്റ് വില. BR 109 നമ്പര്‍ വിഷു ബംപര്‍ ഭാഗ്യക്കുറി ടിക്കറ്റുകള്‍ VA, VB, VC, VD, VE, VG, എന്നിങ്ങനെ ആറ് പരമ്പരകളിലായാണ് ലഭ്യമാകുന്നത്. മൂന്നാം സമ്മാനം പത്ത് ലക്ഷം രൂപ വീതം ആറ് പരമ്പരകള്‍ക്ക് ലഭിക്കും. നാലാം സമ്മാനമായി അഞ്ച് ലക്ഷം രൂപ വീതം ആറ് പരമ്പരകള്‍ക്ക് ലഭിക്കും. 5000, 2000, 1000, 500, 300 വീതം രൂപ സമ്മാനങ്ങളും വിഷു ബംപര്‍ ഭാഗ്യക്കുറിയിലൂടെ വിതരണം ചെയ്യുന്നു.

പാലക്കാട് ജില്ലയിലാണ് ഏറ്റവും കൂടുതല്‍ ടിക്കറ്റുകള്‍ വിറ്റിരിക്കുന്നത്. തൃശൂര്‍, തിരുവനന്തപുരം ജില്ലകള്‍ ആണ് രണ്ടും മൂന്നും സ്ഥാനങ്ങളില്‍. ഫലം പ്രഖ്യാപിച്ചിലുടന്‍ വണ്‍ഇന്ത്യ മലയാളം ലൈവ് പേജിലും കേരള ഭാഗ്യക്കുറി വകുപ്പിന്റെ ഔദ്യോഗിക വെബ്‌സൈറ്റുകളായ https://www.keralalotteryresult.net/, http://www.keralalotteries.com/ എന്നിവയിലും ലഭ്യമാകും.