ന്യൂനമര്ദ്ദത്തിനൊപ്പം എംജെഒ പ്രതിഭാസവും, കേരളത്തില് ഇടിച്ചുകുത്തി മഴ പെയ്യും
തിരുവനന്തപുരം: സംസ്ഥാനത്ത് ഇന്നും നാളേയും കനത്ത മഴ പെയ്യും എന്ന് കേന്ദ്ര കാലാവസ്ഥാ വകുപ്പ്. ആഗോള മഴപ്പാത്തിയായ എംജെഒ (മാഡന് ജൂലിയന് ഓസിലേഷന്) കിഴക്കന് ഇന്ത്യന് മഹാസമുദ്രത്തില് നിന്ന് പടിഞ്ഞാറന് പസിഫിക് സമുദ്രത്തിലേക്ക് നീങ്ങുകയാണ്. ഇതാണ് മഴ കനക്കാന് കാരണം. മേഘങ്ങള് കൂട്ടത്തോടെ ഭൂമധ്യരേഖയ്ക്ക് കുറുകെ നീങ്ങുന്നതിനെ ആണ് എം ജെ ഒ പ്രതിഭാസം എന്ന് വിശേഷിപ്പിക്കുന്നത്.
അമേരിക്കന് ശാസ്ത്രജ്ഞരായ റോളന്ഡ് മാഡനും പോള് ജൂലിയനും ചേര്ന്നാണ് ഇത് കണ്ടെത്തിയത്. അതിനാലാണ് ഈ പേര് വന്നത്. 1971 മുതലാണ് ഈ പ്രതിഭാസത്തെ എം ജെ ഒ എന്ന് വിശേഷിപ്പിച്ച് തുടങ്ങിയത്. ബംഗാള് ഉള്ക്കടലില് ന്യൂനമര്ദം രൂപപ്പെട്ടതിന്റെ ഫലമായും മഴ കനക്കും. വടക്കന് കേരള തീരം മുതല് തെക്കന് ഗുജറാത്ത് തീരം വരെ ന്യൂനമര്ദ പാത്തി സ്ഥിതി ചെയ്യുന്നുണ്ട്.
മധ്യ പടിഞ്ഞാറന് ബംഗാള് ഉള്ക്കടലില് ഒഡിഷ തീരത്ത് ന്യൂനമര്ദവും രൂപപ്പെട്ടിട്ടുണ്ട്. ഇതിന്റെയെല്ലാം ഫലമായി കേരളത്തില് വ്യാപകമായി ഇടിന്നലോടും കാറ്റോടും കൂടിയ അതിശക്തമായ മഴയ്ക്കാണ് സാധ്യത എന്ന് കാലാവസ്ഥാ വകുപ്പ് അറിയിച്ചു. അതേസമയം അതിശക്തമായ മഴയ്ക്ക് സാധ്യതയുള്ളതിനാല് ഇന്ന് സംസ്ഥാനത്തെ അഞ്ച് ജില്ലകളില് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്.
മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്. 24 മണിക്കൂറില് 115.6 മില്ലി മീറ്റര് മുതല് 204.4 മില്ലി മീറ്റര് വരെ മഴ ലഭിക്കുന്നതിനെ ആണ് അതിശക്തമായ മഴ എന്നത് കൊണ്ട് കാലാവസ്ഥ വകുപ്പ് അര്ത്ഥമാക്കുന്നത്. ഇന്ന് കോട്ടയം, ഇടുക്കി, പത്തനംതിട്ട, ആലപ്പുഴ, എറണാകുളം, തൃശൂര്, പാലക്കാട് ജില്ലകളില് യെല്ലോ അലര്ട്ടാണ്.
കേരളത്തില് അടുത്ത അഞ്ച് ദിവസം ഇടത്തരം മഴയ്ക്കോ ഒറ്റപ്പെട്ട സ്ഥലങ്ങളില് അതിശക്തമായ മഴയ്ക്കോ സാധ്യതയുണ്ട്. നാളെയും മറ്റന്നാളും കോഴിക്കോട്, കണ്ണൂര്, കാസറഗോഡ് ജില്ലകളില്ം കേന്ദ്ര കാലാവസ്ഥ വകുപ്പ് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
നാളെ പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, വയനാട് ജില്ലകളിലും 18 ന് എറണാകുളം, ഇടുക്കി, തൃശൂര്, പാലക്കാട്, മലപ്പുറം, വയനാട് ജില്ലകളിലും യെല്ലോ അലര്ട്ടായിരിക്കും. 19 ന് മലപ്പുറം, കോഴിക്കോട്, കണ്ണൂര്, കാസറഗോഡ് ജില്ലകളിലും യെല്ലോ അലര്ട്ടാണ്. ഇവിടങ്ങളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.
അതേസമയം അതിതീവ്ര മഴ അപകടങ്ങളുണ്ടാക്കും എന്നതിനാല് പൊതുജനങ്ങള് ജാഗ്രത പാലിക്കണമെന്ന് കാലാവസ്ഥാ വകുപ്പ് അറിയിച്ചു. കുറഞ്ഞ സമയം കൊണ്ട് വലിയ മഴയുണ്ടാകുകയും വെള്ളം പൊങ്ങുകയും ചെയ്യും. അപ്രതീക്ഷിത മലവെള്ളപ്പാച്ചിലും മിന്നല് പ്രളയങ്ങളും ഉണ്ടാകാം. നഗരപ്രദേശങ്ങളിലും പൊതുവെ താഴ്ന്ന പ്രദേശങ്ങളിലും വെള്ളക്കെട്ട് രൂപപ്പെടാനും സാധ്യതയുണ്ട് എന്ന് കാലാവസ്ഥാ വകുപ്പ് ചൂണ്ടിക്കാട്ടി.
മണ്ണിടിച്ചിലിനും ഉരുള്പൊട്ടലിനും സാധ്യതയുണ്ട്. അതിനിടെ സംസ്ഥാനത്ത് മഴക്കെടുതി രൂക്ഷമാകുകയാണ്. കനത്ത മഴയില് പെരിയാറില് വെള്ളം ഉയര്ന്നതോടെ ആലുവ ശിവക്ഷേത്രം മുങ്ങി. ക്ഷേത്ര പരിസരത്തെ മണപ്പുറം പൂര്ണമായും മുങ്ങി. കുമരകം-ചേര്ത്തല പാതയില് ബണ്ട് റോഡില് ഓടിക്കൊണ്ടിരുന്ന രണ്ട് കാറുകള്ക്ക് മുകളിലേക്കു മരം വീണ് അപകടമുണ്ടായി. ഇടുക്കി ജില്ലയില് കനത്ത മഴ തുടരുന്ന സാഹചര്യത്തില് വൈകിട്ട് 7 മുതല് രാവിലെ 6 വരെ യാത്ര നിരോധിച്ചിരിക്കുകയാണ്.
Click it and Unblock the Notifications
Sign in with Google