സ്വന്തം ഭര്ത്താവിനെ ചുംബിച്ചതിന് തിരക്കഥാകൃത്ത് ദീദി ദാമോദരന് നടപടി
കോഴിക്കോട്: കോഴിക്കോട്ട് നടന്ന ചുംബനസമരത്തില് പങ്കെടുത്ത തിരക്കഥാകൃത്ത് ദീദി ദാമോദരന് കാരണംകാണിക്കല് നോട്ടീസ്. സ്വന്തം ഭര്ത്താവിനെ ചുംബിച്ചതിനാണ് തിരക്കഥാകൃത്ത് ദീദി ദാമോദരനെതിരെ നടപടിയുണ്ടായിരിക്കുന്നത്. ദീദി അധ്യാപികയായി ജോലി ചെയ്യുന്ന കോഴിക്കോട് ഐഎച്ച്ആര്ഡി കേന്ദ്രം ഡയറക്ടറാണ് കാരണം വിശദീകരിക്കണമെന്നാവശ്യപ്പെട്ട് നോട്ടീസ് നല്കിയത്.
അഞ്ച് ദിവസത്തിനുള്ളില് മറുപടി നല്കിയില്ലെങ്കില് നടപടിയുണ്ടാകുമെന്നാണ് നോട്ടീസിലുളളത്. സ്വന്തം ഭര്ത്താവിനെ ചുംബിച്ചതിന് എന്ത് വിശദീകരണമാണ് നല്കേണ്ടതെന്നാണ് ദീദി ചിന്തിക്കുന്നത്. നല്ല കാര്യങ്ങള് പറഞ്ഞു കൊടുക്കേണ്ട അധ്യാപിക ചുംബനസമരത്തില് പങ്കെടുത്ത് കുട്ടികള്ക്ക് തെറ്റായ സന്ദേശം നല്കിയെന്നാണ് ആരോപണം.
രക്ഷിതാക്കള്ക്ക് കുട്ടികളുടെ ഭാവിയില് ആശങ്കയുണ്ടെന്നും നോട്ടീസില് ചൂണ്ടിക്കാട്ടുന്നുണ്ട്. മാതൃകാപരമായി അധ്യാപികയെ ശിക്ഷിക്കണമെന്ന ഊമക്കത്തിലെ ആവശ്യം പരിഗണിച്ചാണ് ഡയറക്ടര് വിശദീകരണം തേടിയത്. ജീവിതപങ്കാളിയെ ചുംബിച്ചത് അധികൃതര്ക്ക് കുറ്റകരമാകുന്നതെങ്ങനെയെന്നാണ് ദീദി ഇതിനെതിരെ പ്രതികരിച്ചത്.
ഡീസന്റ് ബിഹേവിയറിനെ നിര്വചിക്കുന്നതെങ്ങനെയാണ് അറിയാന് താല്പ്പര്യമുണ്ടെന്നും ദീദി ചോദിക്കുന്നു. അവധിദിവസം ചുംബനസമരത്തില് പങ്കെടുത്ത സര്ക്കാര് ജീവനക്കാരിക്കെതിരെ നടപടി എടുക്കാമെങ്കില് പ്രവര്ത്തി സമയത്തിന് ശേഷം ബാറില് മദ്യപിക്കാന് പോകുന്ന സര്ക്കാര് ഉദ്യോഗസ്ഥര്ക്കെതിരെയും അച്ചടക്കനടപടിയുണ്ടാകുമോ എന്നറിയണമായിരുന്നു എന്നും ദീദി ചോദിച്ചു.