ബ്ലോക്ക് ചെയ്ത കിസ്സ് ഓഫ് ലവ് ഫേസ്ബുക്ക് പേജ് തിരിച്ചുപിടിച്ചു

By Soorya Chandran

Updated: Monday, November 3, 2014, 17:08 [IST]

കൊച്ചി: ഒരു വിഭാഗം ആളുകള്‍ റിപ്പോര്‍ട്ട് ചെയ്തതിന്റെ പേരില്‍ ബ്ലോക്ക് ചെയ്യപ്പെട്ട കിസ്സ് ഓഫ് ലവിന്റെ ഫേസ്ബുക്ക് പേജ് തിരിച്ചുവന്നു. പേജിന്റെ അഡ്മിന്‍മാര്‍ ഫേസ്ബുക്ക് അധികൃതരുമായി ബന്ധപ്പെട്ടാണ് പേജ് തിരിച്ചുകൊണ്ടുവന്നത്.

കിസ്സ് ഓഫ് ലവിന്റെ പേജ് ചിലര്‍ ഹാക്ക് ചെയ്തു എന്നാണ് തുടക്കത്തില്‍ റിപ്പോര്‍ട്ടുകള്‍ വന്നത്. പിന്നീട് സൈബര്‍ സെല്ലിന്റെ ഇടപെടലുണ്ടോ എന്നും സംശയിച്ചു. മാസ് റിപ്പോര്‍ട്ടിങ് വഴി ബ്ലോക്ക് ചെയ്യിച്ചതാണോ എന്നും സംശയം ഉണ്ടായിരുന്നു.

വികാരം വ്രണപ്പെടുത്തി എന്ന് പറഞ്ഞ് നിരവധിപേര്‍ റിപ്പോര്‍ട്ട് ചെയ്തതിനെ തുടര്‍ന്നാണ് പേജിനെ താത്കാലികമായി വിലക്കിയതെന്ന് ഫേസ്ബുക്ക് അധികൃതര്‍ അറിയിച്ചുവെന്ന് കിസ്സ് ഓഫ് ലവ് പ്രവര്‍ത്തകര്‍ പറഞ്ഞു. തുടര്‍ന്ന് കാര്യങ്ങള്‍ വിശദമാക്കിയതോടെ പേജ് വീണ്ടും പ്രത്യക്ഷപ്പെടുകയായിരുന്നു.

കിസ്സ് ഓഫ് ലവിന്റെ പേജ് റിപ്പോര്‍ട്ട് ചെയ്ത് ബ്ലോക്ക് ചെയ്തതിനൊപ്പം ഫ്രീതിങ്കേഴ്‌സ് എന്ന ഗ്രൂപ്പും ബ്ലോക്ക് ചെയ്യപ്പെട്ടിട്ടുണ്ട്. ഈ ഗ്രൂപ്പിലെ അംഗങ്ങളായിരുന്നു കിസ്സ് ഓഫ് ലവ് ചുംബനക്കൂട്ടായ്മക്ക് നേതൃത്വം നല്‍കിയത്. എന്നാല്‍ ഫ്രീ തിങ്കേഴ്‌സ് ഗ്രൂപ്പ് ഇതുവരെ തിരിച്ചുവന്നിട്ടില്ല.

എഴുപത്തി അയ്യായിരത്തോളം പേരാണ് കിസ്സ് ഓഫ് ലവിന്റെ പേജ് ലൈക്ക് ചെയ്തിരിക്കുന്നു. പേജ് അപ്രത്യക്ഷമായ ഉടന്‍ തന്നെ അതേ പേരില്‍ പുതിയൊരു പേരും സൃഷ്ടിക്കപ്പെട്ടിരുന്നു. അല്‍പ നേരം കൊണ്ട് മൂവായിരത്തി അഞ്ഞൂറിലധികം ലൈക്കാണ് ആ പേജും നേടിയത്.