കൊച്ചിയില് ചുംബിച്ചവരില് മാവോയിസ്റ്റുകളും?
കൊച്ചി: ചുംബന കൂട്ടായ്മയുടെ പേരില് മറൈന് ഡ്രൈവില് അണിനിരന്ന 17 പേര്ക്ക് മാവോയിസ്റ്റ് ബന്ധമെന്ന് പൊലീസ് രഹസ്യാന്വേഷണ റിപ്പോര്ട്ട്. സമര രീതിയില് മാറ്റം വരുത്തിയുള്ള പുതിയ രീതിയാണ് മാവോയിസ്റ്റുകള് നടപ്പിലാക്കിയതെന്നാണ് ആഭ്യന്തര വകുപ്പിന് നല്കിയ റിപ്പോര്ട്ടില് പറയുന്നത്. ചുംബന സമരത്തിന് നേതൃത്വം നല്കിയ 17 പേര്ക്കും മാവോയിസ്റ്റ് ബന്ധമുണ്ടെന്ന വിശദ റിപ്പോര്ട്ടാണ് പൊലീസ് സമര്പ്പിച്ചത്. മംഗളം പത്രമാണ് ഇക്കാര്യം റിപ്പോര്ട്ട് ചെയ്യുന്നത്.
പോരാട്ടം സംഘടനയുടെ സംസ്ഥാന കണ്വീനര് മാനുവല്, ജോയിന്റ് കണ്വീനര് അഖിലന്, സര്ക്കാര് ജീവനക്കാരനായ ജെയ്സണ് ക്ളീറ്റസ്, അഡ്വക്കേറ്റ് തുഷാര് നിര്മല് സാരഥി, അഡ്വ. നന്ദിനി, പിഎന് ജോയി, ആര്പിഎഫ് നേതാവ് അജയന് മണ്ണൂരിന്റെ സഹോദരന് അരവിന്ദന്, മാവോയിസ്റ്റെന്ന് പൊലീസ് കണ്ടെത്തിയതോടെ ഒളിവില് കഴിയുന്ന മുരളി കണ്ണമ്പള്ളിയുടെ ഭാര്യ വിസി ജെന്നി, സുജാ ഭാരതി, പ്രശാന്ത് സുബ്രഹ്മണ്യം എന്നിവരടക്കം 17 പേര് ചുംബന കൂട്ടായ്മയ്ക്ക് നേതൃത്വം നല്കിയെന്നാണ് പൊലീസ് രഹസ്യാന്വേഷണ വിഭാഗം പറയുന്നത്.
നവംബംര് രണ്ട് ഞായാറാഴ്ചയാണ് ചുംബന കൂട്ടായ്മ സംഘടിപ്പിച്ചത്. ഇതില് 32 പേര് അറസ്റ്റിലായിരുന്നു. ഫേസ്ബുക്ക് കൂട്ടായ്മയായ ഫ്രീ തിങ്കേഴ്സ് പ്രഖ്യാപിച്ച ചുംബന സമരത്തിന്റെ നിയന്ത്രണം മാവോയിസ്റ്റ് ബന്ധമുള്ളവര് പിടിച്ചെടുത്തതായാണ് പൊലീസ് കണ്ടെത്തല്. ജാമ്യം കിട്ടിയെങ്കിലും ഇവര്ക്കെതിരെ കൂടുതല് അന്വേഷണം ഉണ്ടാകും.