അഭിനയത്തിലും മാണിസാര്‍ ബഹുദൂരം മുന്നില്‍

രാഷ്ട്രീയത്തില്‍ മാത്രമല്ല, അഭിനയത്തിലും താന്‍ ബഹുദൂരം മുന്നിലാണെന്ന് കെ എം മാണി തെളിയിച്ചുകഴിഞ്ഞു. ഒരു പരിഭ്രമവും കൂടാതെ, ഒന്നാന്തരം നായകന്മാരെ വെല്ലുന്ന തരത്തിലുള്ള പ്രകടനമായിരുന്നു അരമണിക്കൂര്‍ ക്യാമറയ്ക്ക് മുന്നില്‍ മാണി സാറിന്റെ പ്രകടനം.

മൈ ഫ്രാ ക്രിയേഷന്‍സിന്റെ ബാനറില്‍ ലോട്ടറി വകുപ്പിന്റെ സഹകരണത്തോടെ നിര്‍മിച്ച ഷോര്‍ട്ട് ഫിലിം വൈറ്റ് ഡ്രോപ്‌സിന്റെ ഷൂട്ടിങ് വേളയിലാണ് കെ എം മാണി തകര്‍ത്തഭിനയിച്ചത്.

ക്യാന്‍സറിനെതിരായ ചിത്രത്തില്‍ ക്യാന്‍സര്‍ ബോധവത്കരണ സന്ദേശവും കാരുണ്യ ലോട്ടറി ബെനവലന്റ് ഫണ്ടിന്റെ പ്രസക്തിയെയും കുറിച്ച് പറയുന്ന രംഗമായിരുന്നു. ലവലേശം സങ്കോചമില്ലാതെ മാണിസാര്‍ തകര്‍ത്തഭിനയിക്കുന്നതുകണ്ടപ്പോള്‍ ചുറ്റുമുള്ളവര്‍ കൈയ്യടിച്ചുപോയി.

ക്ലിഫ് ഹൗസിന് സമീപത്തുള്ള മാണിയുടെ വസതിയ്ക്ക് മുന്നിലായിരുന്നു ചിത്രീകരണം. ഒരുമണിക്കൂര്‍ നീണ്ട ഷൂട്ടിങില്‍ അരമണിയ്ക്കൂര്‍ അദ്ദേഹം ക്യാമറയ്ക്ക് മുന്നില്‍ ചെലവഴിച്ചു. മഹിര്‍ ഖാന്‍ നയകനാകുന്ന ചിത്രത്തിന് ക്യാമറ ചലിപ്പിച്ചത് വിമല്‍ കൃഷ്ണനാണ്.

English summary

KM Mani acted in a Malayalam film