'ഗവർണ്ണറുടെ പത്രസമ്മേളനം മല എലിയെ പ്രസവിച്ച പോലെയായി, വധശ്രമം ഉണ്ടായെന്ന് വിശ്വസിക്കുന്നില്ല'; കെഎൻഎ ഖാദർ

Updated: Tuesday, September 20, 2022, 7:46 [IST]

തിരുവനന്തപുരം: ഗവർണർ ആരിഫ് മുഹമ്മദ് ഖാനെതിരെ രൂക്ഷവിമർശനവുമായി ലീഗ് നേതാവും മുൻ എംഎൽഎയുമായ കെഎൻഎ ഖാദർ.ഗവർണ്ണറുടെ പത്രസമ്മേളനം മല എലിയെ പ്രസവിച്ച പോലെയായെന്ന് ഖാദർ പരിഹസിച്ചു. ഗവർണർ പുറത്തുവിട്ട ചരിത്ര കോൺഗ്രസിലെ വീഡിയോ കണ്ടാൽ അദ്ദേഹത്തിനെതിരെ ഒരു വധശ്രമവും ഗൂഢാലോചനയും ഉണ്ടായിരുന്നുവെന്ന് വിശ്വാസിക്കാനാവുന്നില്ല.അതിശയോക്തി നിറഞ്ഞ ഒരു ആരോപണമാണിത്. കണ്ണൂരിലെ യൂത്ത് കോൺഗ്രസ്സുകാർ, വിമാനത്തിൽ വെച്ച് മുഖ്യമന്ത്രിയെ വധിക്കാൻ ശ്രമിച്ചുവെന്ന ആരോപണം പോലെ ഒന്നാണ് ഈ വധശ്രമ ആരോപണം. രണ്ടും ആ നിലയ്ക്ക് കാണാൻ കഴിയില്ല.സർക്കാരിന്റെ പിൻവാതിൽ നിയമനങ്ങളോടൊ, ബന്ധു നിയമനങ്ങളോടൊ,അനർഹരെ നിയമിക്കുന്നതിനോടൊ ഒരിക്കലും യോജിക്കാൻ കഴിയില്ല.അതെ സമയം ഗവർണ്ണർമാർ തിരഞ്ഞെടുക്കപ്പെട്ട സംസ്ഥാന സർക്കാരുകളോട് ഈ വിധം ഏറ്റുമുട്ടുന്നത് നല്ല കീഴ് വഴക്കം അല്ലെന്നും കെഎൻഎ ഖാദർ ഫേസ്ബുക്കിൽ കുറിച്ചു. പോസ്റ്റിന്റെ പൂർണരൂപം വായിക്കാം

ഗവർണ്ണറുടെ പത്രസമ്മേളനം മല എലിയെ പ്രസവിച്ച പോലെയായി.എന്തൊക്കെയോ സംഭവിക്കാൻ പോകുന്നുവെന്ന മട്ടിൽ ഈ പത്ര സമ്മേളനത്തിനു പരസ്യം നൽകിയതും മീഡിയ തന്നെ.സർവ്വകലാശാല, ലോകായുക്ത ബില്ലുകളിൽ അദ്ദേഹം ഒപ്പിടാൻ തയ്യാറില്ലന്നു നേരത്തെ വ്യക്തമാക്കിയതാണല്ലൊ.ആ രണ്ടു ബില്ലുകൾ പാസ്സാക്കുന്നതിനെ പ്രതിപക്ഷം ശക്തമായി എതിർത്തു പോന്നിട്ടുള്ളതാണ്.ഗവർണ്ണർ അവയിൽ ഒപ്പു വെക്കരുതെന്ന നിലപാടിനു മാറ്റമില്ല.

2019ലെ കണ്ണൂർ ചരിത്ര കോൺഗ്രസ്സിൽ ചില ബഹളങ്ങളും പ്രതിഷേധവുമൊക്കെ ഉണ്ടായിരുന്നതായി കേട്ടിട്ടുണ്ട്. അതിന്റെ നേർചിത്രം വീഡിയോ പ്രദർശനം വഴി ഇപ്പോൾ കണ്ടു. അദ്ദേഹത്തിനെതിരെ ഒരു വധശ്രമവും ഗൂഢാലോചനയും ഉണ്ടായിരുന്നുവെന്ന് വിശ്വാസിക്കാനാവുന്നില്ല.അതിശയോക്തി നിറഞ്ഞ ഒരു ആരോപണമാണിത്. പ്രത്യക്ഷത്തിൽ അങ്ങിനെ തോന്നിയില്ല.ഇർഫാൻ ഹബീബ്, വിസി എന്നിവർ ആ സമയത്ത് വേദിയിൽ അകാരണമായി ഉലാത്തുന്നത് എന്തിനാണെന്ന് മാത്രം മനസ്സിലായില്ല.അവർ ശാന്തരായി അവരവരുടെ സീറ്റുകളിൽ ഇരിക്കേണ്ടതായിരുന്നു.

സദസ്സിലെ ബഹളവും ഒഴിവാക്കാമായിരുന്നു.രാഗേഷ് താഴെ ഇറങ്ങി പ്രതിഷേധക്കാരെ അനുനയിപ്പിക്കാൻ ശ്രമിച്ചതായിട്ടാണ് തോന്നിയത്.സുരക്ഷ നൽകാൻ ആവശ്യാനുസരണം പോലീസ് ഉണ്ടായിരുന്നുവല്ലോ. സർക്കാരും ഗവർണ്ണറും തമ്മിൽ കൈമാറിയ കത്തുകൾ പുറത്തു വിടത്തക്ക പ്രാധാന്യം ഉള്ളവയല്ല. അദ്ദേഹം എന്തായാലും അന്വേഷണം ആവശ്യപ്പെട്ട് കണ്ടില്ല. പത്രക്കാരോട് അന്വേഷണം നടത്താൻ പറയുന്നത് കേട്ടു. അതിൽ എന്ത് അർഥമാണുള്ളത്.തമാശയായി തോന്നി.

കണ്ണൂരിലെ യൂത്ത് കോൺഗ്രസ്സുകാർ, വിമാനത്തിൽ വെച്ച് മുഖ്യമന്ത്രിയെ വധിക്കാൻ ശ്രമിച്ചുവെന്ന ആരോപണം പോലെ ഒന്നാണ് ഈ വധശ്രമ ആരോപണവും. രണ്ടും ആ നിലയ്ക്ക് കാണാൻ കഴിയില്ല.അല്ലെങ്കിലും ഇർഫാൻ ഹബീബിനു ചേർന്ന പണിയാണ് അതെന്നു തോന്നുന്നില്ല. സർക്കാരിന്റെ പിൻവാതിൽ നിയമനങ്ങളോടൊ, ബന്ധു നിയമനങ്ങളോടൊ,അനർഹരെ നിയമിക്കുന്നതിനോടൊ ഒരിക്കലും യോജിക്കാൻ കഴിയില്ല.അതെ സമയം ഗവർണ്ണർമാർ തിരഞ്ഞെടുക്കപ്പെട്ട സംസ്ഥാന സർക്കാരുകളോട് ഈ വിധം ഏറ്റുമുട്ടുന്നത് നല്ല കീഴ് വഴക്കം അല്ല.സർക്കാർ മാറി വരുമല്ലോ.

സഹകരണം രണ്ട് കൂട്ടർക്കും ആവശ്യമുള്ളതാണ്. ഗവർണ്ണർ ഒരക്ഷരം പരസ്യമായി പ്രതികരിക്കാതെ, ആ രണ്ട് ബില്ലുകളോട് വിയോജിച്ച് ഒപ്പിടാതെ മാറ്റിവെച്ചുവെങ്കിൽ കൂടുതൽ നന്നായേനെ. ഗവർണ്ണർ പദവി അല്ലെങ്കിലും ആവശ്യമായ ഒന്ന് അല്ലെന്ന് ഞാൻ മുമ്പ് എഴുതിയതാണ്.അത് ഇപ്പോഴത്തെ സംഭവങ്ങൾ കൊണ്ട് അല്ല.ആ പദവി നിലവിൽ വന്ന സാഹചര്യം ഇപ്പോൾ ഇല്ല.