കൊച്ചി മയക്കുമരുന്ന് കേസ്: മുഖ്യപ്രതി എച്ച് ഐ വി ബാധിതന്‍?

കൊച്ചി: കോളിളക്കം സൃഷ്ടിച്ച കൊച്ചി മയക്കുമരുന്ന് കേസിലെ കണ്ണിയെന്ന് കരുതപ്പെടുന്ന നൈജീരിയിന്‍ സ്വദേശി എയ്ഡ്‌സ് രോഗിയെന്ന് സൂചനകള്‍. നൈജീരിയിന്‍ സ്വദേശി ഒക്കോവ ചിഗോസി എച്ച് ഐ വി ബാധിതനാണെന്ന് പോലീസിനോട് സമ്മതിച്ചതായാണ് റിപ്പോര്‍ട്ട്. പോലീസ് ഒക്കോവ ചിഗോസിയെ എച്ച് ഐ വി പരിശോധനയ്ക്ക് വിധേയമാക്കിയിട്ടുണ്ട്. ഇതിന്റെ ഫലം ദിവസങ്ങള്‍ക്കകം പുറത്തുവരും.

അതേസമയം ഒക്കോവ ചിഗോസി എച്ച് ഐ വി ബാധിതനാണ് എന്ന കാര്യം പോലീസ് സ്ഥിരീകരിച്ചിട്ടില്ല. പരിശോധന ഫലം കിട്ടിയാലേ ഇക്കാര്യം വ്യക്തമാകൂ. കൊച്ചിയിലെ ഫഌറ്റില്‍ നിന്നും നടന്‍ ഷൈന്‍ ടോം ചാക്കോയേയും നാല് യുവതികളെയും പോലീസ് അറസ്റ്റ് ചെയ്ത സംഭവത്തോടെയാണ് കൊച്ചി മയക്കുമരുന്ന് കേസ് വന്‍ വാര്‍ത്താ പ്രാധാന്യം നേടിയത്.

നൈജീരിയക്കാരനായ ഒക്കോവ ചിഗോസി ബിസിനസ് വിസയിലാണത്രെ ഗോവയിലെത്തിയത്. ഗോവയിലെ മയക്കുമരുന്ന് മാഫിയയുമായും രാജ്യാന്തര റാക്കറ്റുകളുമായും ഇയാള്‍ക്ക് ബന്ധമുണ്ട്. കൊച്ചി കേസിലെ പ്രതികളായ രേഷ്മയും ബ്ലസിയും ഇയാളുമായി മയക്കുമരുന്ന് ഇടപാട് നടത്തിയതായാണ് റിപ്പോര്‍ട്ട്. ജുഡീഷ്യല്‍ കസ്റ്റഡിയിലുള്ള കേസിലെ മറ്റു പ്രതികളേയും കൂടി പോലീസ് ചോദ്യം ചെയ്യാന്‍ പദ്ധതിയിടുന്നുണ്ടത്രെ.

ഇവരുടെ മൊഴിയും ടെലിഫോണ്‍ കോളുകളും ആധാരമാക്കിയാണ് പോലീസ് ഒക്കോവ ചിഗോസിയിലേക്ക് എത്തിയത്. അതോടെയാണ് കേസിലെ മുഖ്യ പ്രതി രേഷ്മയോ, ബ്ലസ്സിയോ, ഷൈന്‍ ടോം ചാക്കോയോ അല്ല ഒക്കോവ ചിഗോസിയാണെന്ന് പോലീസ് തിരിച്ചറിഞ്ഞത്. രേഷ്മക്കും ബ്ലസ്സിക്കും എല്ലാം മയക്കുമരുന്ന് എത്തിച്ച് നല്‍കിയത് ചിഗോസിയാണത്രെ.

English summary

Report says that Kochi cocaine case main accused is a suspected HIV patient.