ഫൈസല്‍ വധക്കേസിലെ പ്രതിയുടെ കൊല....പിന്നില്‍ എസ്ഡിപിഐ, 2 പേര്‍ പിടിയില്‍

കേസിലെ രണ്ടാം പ്രതിയായ ബിബിന്‍ ആഗസ്റ്റ് 24നാണ് കൊല്ലപ്പെട്ടത്

മലപ്പുറം: വിവാദമായ കൊടിഞ്ഞി ഫൈസല്‍ വധക്കേസിലെ രണ്ടാം പ്രതിയും ആര്‍എസ്എസ് പ്രവര്‍ത്തകനുമായ ബിബിന്‍ കൊല്ലപ്പെട്ട കേസില്‍ രണ്ട് എസ്ഡിപിഐ പ്രവര്‍ത്തകരെ അറസ്റ്റ് ചെയ്തു. സുഹൈല്‍, മുഹമ്മദ് അന്‍വര്‍ എന്നിവരെയാണ് പോലീസ് അറസ്റ്റ് ചെയ്തത്. കൊലപാതകവുമായി ബന്ധപ്പെട്ടു നടത്തിയ ഗൂഡാലോചനയിലാണ് ഇവരെ പിടികൂടിയത്.

ആഗസ്റ്റ് 24നാണ് ബിബിനെ റോഡരികില്‍ വെട്ടേറ്റ് ഗുരുതരമായ പരിക്കുകളോടെ കണ്ടെത്തിയത്. ആശുപത്രിയില്‍ എത്തിക്കുമ്പോഴേക്കും മരണം സംഭവിച്ചിരുന്നു. രാവിലെ ബൈക്കില്‍ ജോലിക്കു പോവുകയായിരുന്ന ബിബിനെ തടഞ്ഞുനിര്‍ത്തിയാണ് ആക്രമിച്ചത്. സംഭവവുമായി ബന്ധപ്പെട്ടു മൂന്നു പേരെ നേരത്തേ തന്നെ പോലീസ് കസ്റ്റഡിയിലെടുത്തിരുന്നു.

ഇസ്ലാം മതത്തിലേക്ക് മാറിയതിനെ തുടര്‍ന്നാണ് 2016 നവംബര്‍ 19നു പുലര്‍ച്ചെ ഫൈസലിനെ കൊലപ്പെടുത്തിയത്. പുലര്‍ച്ചെ റെയില്‍വേ സ്റ്റേഷനില്‍ നിന്നു ഭാര്യയുടെ അച്ഛനെയും അമ്മയെയും കൂട്ടിക്കൊണ്ടുവരാന്‍ പോയപ്പോഴാണ് ഫൈസല്‍ ആക്രമിക്കപ്പെട്ടത്. ഈ കേസില്‍ 16 ആര്‍എസ്എസ്, ബിജെപി പ്രവര്‍ത്തകരെ പോലീസ് അറസ്റ്റ് ചെയ്തിരുന്നു. കര്‍ശന വ്യവസ്ഥകളോടെ പിന്നീട് ഇവരെ ജാമ്യത്തില്‍ വിടുകയായിരുന്നു.

English summary

Kodinji Faisal case convict murder: 2 sdpi workers arrested