94കാരിയുടെ മരണം, അയല്വാസി അറസ്റ്റില്
തിരുവനന്തപുരം:കൊല്ലം ചവറയില് ബലാത്സംഗത്തെത്തുടര്ന്ന് 94 കാരി മരിച്ച സംഭവത്തില് അയല്വാസി അറസ്റ്റില്. തിരുവനന്തപുരം മെഡിക്കല് കൊളെജ് ആശുപത്രിയില് ചികിത്സയിലിരിയ്ക്കെയാണ് വൃദ്ധ മരിച്ചത്. കഴിഞ്ഞ ഈസ്റ്റര് ദിനത്തിലാണ് വൃദ്ധ ബലാത്സംഗത്തിന് ഇരയായതെന്ന് കരുതുന്നു. പോസ്റ്റ്മോര്ട്ടം റിപ്പോര്ട്ടിലാണ് ഇവര് പീഡനത്തിന് ഇരയായെന്ന് കണ്ടെത്തിയത്.
പരിക്കേറ്റ നിലയിലാണ് വൃദ്ധയെ മെഡിക്കല് കൊളെജ് ആശുപത്രിയില് പ്രവേശിപ്പിച്ചിരുന്നത്. പിന്നീട് ഇവര് മരിയ്ക്കുകയായിരുന്നു. തിരുവനന്തപുരം പേട്ട പൊലീസാണ് കേസില് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചത്.
കേസിന്റെ അന്വേഷണം ഡിജിപി നടത്തുമെന്ന് ആഭ്യന്തരമന്ത്രി രമേശ് ചെന്നിത്തല രാവിലെ അറിയിച്ചിരുന്നു. സ്ത്രീയുടെ മരണത്തില് അസ്വാഭാവികതയുണ്ടെന്ന് കാട്ടി ബന്ധുക്കള് നല്കിയ പരാതിയിന്മേല് കേസെടുക്കാന് ചവര പൊലീസ് വിസമ്മതിച്ചിരുന്നതായി ബന്ധുക്കള് ആരോപിയ്ക്കുന്നു. അറസ്റ്റിലായ പ്രതിയെപ്പറ്റി കൂടുതല് വിവരങ്ങള് ലഭ്യമല്ല.